Nɨawari 130

1 Yawé, ne yemekɨ ’ekɨ karima nepɨmetsihahɨawe waɨkawa netiuka’eniwatɨ kwie ‘ameukatewatsie. 2 Ti’aitame, neniuki keneu’eni. Yemekɨ heitseriemekɨ keneneu’eni waɨkawamekɨ kenemetiwawirie. 3 ‘Ekɨ Yawé, xɨka naime ke’axatemɨte’uyurikɨ pekatatsixeiriekake, Yawé, ¿kamɨtsɨ kemɨ’ane hetsie pɨkatiuhɨiyawe? 4 Peru ’ekɨ pepɨtareuyehɨwiriwa, ‘ayumieme peuyewetse temɨmetsi’ayemakaxenikɨ. 5 Ne Yawé nepɨtakwewie, ne’iyarikɨ naimekɨ nekanitakwewieka, niukieya kemaine mɨpaɨ nepɨtita’ikwewa. 6 Ne’iyarikɨ naimekɨ Yawé nepɨtakwewie, matsi waɨkawa tehɨwemete kememɨkateta’ikwewa ximeri mayanikɨ. Tehɨwemete ximeri kememɨtetakwewie hepaɨ, 7 xemeta mɨpaɨ, ‘ixaheritsixi, Yawé xeketenetakwewieka. Hetsiena waɨkawa naki’eriya muxuawekɨ, meta mɨkɨ yurikɨ tatsixɨname mɨhɨkɨkɨ. 8 Mɨkɨ ‘ixaheritsixi kaniwaxɨnamɨkɨ naime ke’axamemɨte’uyuri hepaɨtsita.