ኤርምያሳ ማፃፋ 14

1 ኮሻባ ጎዳይ ኤርምያሳስ ኦድዳ ቃላይ ሀይሳ፦ 2 “ይሁዳ ቢታይ ካዮቴስ፤ እያ ካታማት ላባንዶሶና። ያን ደእያ አሳት ቢታን ኡትድ ዬኮሶና፤ የሩሳላመፐ ግታ ዋሶይ ስኤትስ። 3 ዱረ አሳት ሃ ትካናዉ ባንታ አይለታ ኪቶሶና። ኤንቲ ሃ ኦላኮ ቦሶና፤ ሽን ሃ ደሞኮና፤ ባንታ ኦቱዋ መላ ቶክ ኤክድ ስሞሶና። ሀንያባ ይድ ዬላትሸ፥ ባንታ ሁጵያ ጉሉንቶሶና። 4 እር ቡኮና ግሾ ቢታይ መልድ ዛእስ። ጎሻንቾት ዬላትድ፥ ባንታ ሁጵያ ጉሉንትዶሶና። 5 ማት ባይና ግሾ ዎሽኤይ ባ የልዳ ጋሎ ማርዉ ደንባን የጋዳ ባዉሱ። 6 ባዞ ሀረት አይብካ ባይና ቃ ዙማታ ቦላ ኤቅድ፥ ዎርካናዳ ላፈቶሶና። ኤንታዉ ምያባይ ይን፥ ኤንታ አይፈይ ፄላናዉ ዳቡርስ” ያግስ። 7 አሳይ ሀይሳዳ ያግድ ዎስስ፦ “አቤት ጎዳዉ፥ ኑ ናጋራይ ኑ ቦላ ማርካትኮካ፥ ነ ሱን ግሾ፥ ኑስ እስባ ኦ። ኑ ነና አግድ ዳሮ ዎደ ጉየ ስምዳ፤ ነ ቦላ ናጋራ ኦዳ። 8 አቤት እስራኤለ ኡፋይሳዉ፥ መቶ ዎደ አሸይሶ፥ ነ እማዳ፥ እስ ቃማ አቃናዉ ገልዳ ኦገ አሳዳ አይስ ሀናይ? 9 ነ ዳጋምዳ አሳዳ፥ አሻናዉ ዳንዳኦና አሳዳ አይስ ሀናይ? አቤት ጎዳዉ፥ ነ ኑ ግዶን ደኣሳ! ኑኒ ነ ሱንን ፄገትዳ፤ ኑና አጎፋ!” ያግስ። 10 ሀ አሳታባ ጎዳይ ሀይሳዳ ያጌስ፦ “ኤንቲ ቶይላተ ዳሮ ዶሶሶና፤ ባንታ ቶሁዋ ተቆኮና። ሄሳ ግሾ፥ ጎዳይ ኤንታን ኡፋይተና። እ ኤንታ ኢታ ኦሱዋ ሀሳይድ፥ ኤንታ ናጋራ ግሾ ኤንታ ሴራና” ያጌስ። 11 ሄሳፈ ጉየ፥ ጎዳይ ታኮ፥ “ሀ አሳ ሳሮተስ ዎሶፋ። 12 ኤንቲ ፆምኮካ፥ ታ ኤንታ ዋሱዋ ስእከ። ፁሳ ያርሾነ ካ ያርሹዋ ኤንቲ ያርሽኮካ፥ ታ ኤክከ። ታኒ ኤንታ ኦላን፥ ኮሻንነ ጋዶን ይሳና” ያግስ። 13 ታኒ ዛራዳ፥ “አቤት ኡባ ሃርያ ጎዳዉ፥ ናበት ‘ህንተ ኦላ በኤከታ ዎይኮ ኮሽ ጋከና። ጎዳይ ሀ ቢታን ፖሎ ሳሮተ እማና’ ያጎሶና” ያጋስ። 14 ጎዳይ ዛሪድ፥ “ናበት ታ ሱንን ዎርዶ ኦዶሶና፤ ታ ኤንታ ኪታብከ ዎይኮ ኤንታዉ ኦዳብከ። ኤንቲ ህንተዉ ኦደይ ዎርዶ ቆንጨ፥ ፓና ካዮነ ባንታዉ መ ከስዳ ዎርዶ ሃሳዮሶና። 15 ሄሳ ግሾ፥ ጎዳ ሱንን ኦድያ ናበታ ታ ኪታብከ። ሽን ኤንቲ፥ ‘ኦል ዎይኮ ኮሽ ሀ ቢታ ቦቸና’ ያጎሶና። ሄ ናበት ባንታዉ ኦላንነ ኮሻን ያና! 16 ቃስ ትንብተይ ኦደትዳ አሳይ ኮሻነ ኦላ ጋሶን ሀይቃና፤ ኤንታ አሀይ የሩሳላመ ኦግያ ቦላ ሆለታና። ኤንታ ዎይኮ ኤንታ ማቸታ፥ ኤንታ አደ ናይታነ ዎይኮ ኤንታ ማጫ ናይታ ሞግያ አስ ያና። ኤንታዉ በሲያ ዋይያ ኤንታ ቦላ ትጋና” ያግስ። 17 ታ አዛኑዋባ ታ አሳስ ኦዳና መላ ጎዳይ ታና ኪትስ። “ታ አሳይ ደሸትድ፥ ዳሮ ማዱንፅዳ ግሾ፥ ታ አይፈይ ቃማነ ጋላስ ቃንፆና አፉፃና። 18 ታ ደምባ ከይኮ፥ ማሻን ሀይቅዳይሳታ በአይስ። ካታማ ገልኮ፥ ኮሻን ቆሄትዳይሳታ በአይስ። ናበትነ ካህነት ባንታ ኦሱዋ ኦሶና፤ ሽን አይ ኦያኮ ኤሮኮና” ያጋስ። 19 አቤት ጎዳዉ፥ ነ ይሁዳ አጋዲ? ፅዮነ አሳ እፃዲ? ኑ ፓፆናዳ ኦዳ አይስ ደቻዲ? ኑ “ሳሮ ግዳና” ግድ ናግዳ፤ ሽን አይብካ ሎኦባይ በንትቤና። ኑ “ፓፃና ዎደይ ያና” ግድ ናግዳ፤ ሽን ዳጋማ ፃላል ጋክስ። 20 አቤት ጎዳዉ፥ ኑ ኢታተ ኤርዳ፤ ኑ አዋታ ባላ አኬክዳ፤ ኑኒ ናጋራ ኦዳ። 21 ነ ሱን ግሾ ጋዳ ኑና ካፓ፤ ነ ቦንቾ አራታ ካዉሾፋ። ነ ኑራ ጫቅዳ ጫቁዋ ሀሳያ፤ ነ ጫቁዋ መንፋ። 22 ካዎተታ ኤቃታፐ እሶይ እራ ቡክሳናዉ ዳንዳኢ? ሳሎይ ባ ሸነን ፑሳናዉ ዳንዳኢ? ዳንዳኤና! አቤት ጎዳዉ፥ ኑ ፆሳዉ፥ ሄሳ ዳንዳኤይ ነና! ሀይሳ ኡባ ኦይ ነና ግድያ ግሾ ነናን ኡፋይስ ኦስ።