ኤርምያሳ ማፃፋ 13

1 ጎዳይ ታኮ፥ “ባዳ ሊኖ ቃጭናፐ ዳደትዳ ዳንጮ ሻማዳ፥ ነ ፄሳን ዳንጫ፤ ሽን ሃን ቦሽሶፓ” ያግስ። 2 ሄሳ ግሾ፥ ታኒ ጎዳይ ኪትዳይሳዳ ዳንጩዋ ሻማዳ ታ ፄሳን ዳንጫስ። 3 ጎዳይ ናምአን ታኮ ሀይሳዳ ያግስ፦ 4 “ነ ሻማዳ ዳንጭዳ ዳንጩዋ ኤካዳ፥ ኤፍራፂሳ ሻፋ ባዳ ሹቻ ቆጶን ቆሳ” ያግስ። 5 ጎዳይ ታዉ ኦድዳይሳዳ ኤፋዳ፥ ኤፍራፂሳ ሻፋ ላንቀን ቆሳስ። 6 ዳሮ ጋላሳፐ ጉየ ጎዳይ፥ “ኤፍራፂሳ ሻፋ ባዳ፥ ታ ነና፥ ‘ያን ቆሳ’ ግዳ ዳንጩዋ ኤካ” ያግስ። 7 ታኒ ኤፍራፂሳ ሻፋ ባዳ፥ ዳንጩዋ ሞግዳ በሳፈ ኤካስ። ሽን ሄ ዳንጮይ ኢትድ አይኮካ ማዶናባ ግድስ። 8 ሄሳፈ ጉየ፥ ጎዳ ቃላይ ታኮ፥ 9 “ታኒ ይሁዳ ጬቀተነ የሩሳላመ ኦቶሩዋ ሀይሳዳ ኦዳ ይሳና። 10 ታ ቃላ ስኦና እፅድ፥ ባንታ ዎዛና ሙምስድ፥ ሀራ ፆሳታ ጎይናናዉነ ኤንታዉ ኦናዉ ብያ ሀ ኢታ አሳት፥ ሀ ዳንጩዋዳ ማዶናባ ግዳና። 11 ዳንጮይ አሳ ፄስ ባቅድ ኦይከይሳዳ ይሁድነ እስራኤለይ ታራ ኦይከትድ፥ ታ ሱንስ ጋላታነ ቦንቾ ግዳና መላነ ታ አሰ ግዳና መላ ኦስ፤ ሽን ኤንቲ ስኦና እፅዶሶና” ያጌስ ጎዳይ። 12 ጎዳይ ታኮ፥ “ጎዳይ እስራኤለ ፆሳይ፥ ሀይሳዳ ያጌስ ጋዳ ኦዳ ያግስ፦ ‘እስ እስ ፁጋይ ዎይነ ኡሻን ኩማና’ ያጋ። ኤንቲ ኔኮ፥ ‘ኑኒ እስ እስ ፁጋይ ዎይነን ኩማናይሳ ኤሮኮዬ?’ ያግኮ፥ 13 ነ ኤንታኮ፥ ‘ታኒ ሀ ቢታን ደእያ አሳ ኡባ፥ ሀር አቶሽን፥ ዳዊታ አራታን ኡትያ ካዎታ፥ ካህነታ፥ ናበታነ የሩሳላመን ደእያ አሳ ኡባ፥ ኤንቲ ማታና ጋካናዉ ዎይነ ኡሻን ኩንና። 14 ታኒ ኤንታ፥ እሱዋ እሱዋራ፥ አዋ ናኣራ ዶምኤና። ታ ኤንታ ይሳና፤ ታ ኤንታዉ ኬህከ፥ ቃትከ፤ ኤንታ ማርከ’ " ያጌስ ጎዳይ። 15 ሀይሳ ኦደይ ጎዳ ግድያ ግሾ ህንተ ኦቶሩዋ አግድ ስእተ፤ አኬክተ። 16 እ ማ ኤሀናፐ ስን፥ ህንተ ቶሆይ ምያ ደርያን በታናፐ ስን፥ ጎዳ ህንተ ፆሳ ቦንችተ። ህንተ፥ “ፖኦይ ያና” ግድ ናገታ፤ ሽን እ ሳካና ማን ላማና። 17 ሽን ህንተ ስኦና እፅኮ፥ ህንተ ኦቶሩዋ ግሾ ታ ጌማን ዬካይስ። ጎዳ ዉደይ ድኤትድ ብዳ ግሾ፥ ታ ዬካይስ፤ ታ አይፈይ አፉ ጉሴስ። 18 ጎዳይ ታኮ፥ “ካዋስነ ካዋ አየስ፥ ሀይሳዳ ያጋዳ ኦዳ፦ ህንተ ቦንቾ ካላቻይ ህንተ ሁጵያፐ ኩንድዳ ግሾ፥ ህንተ ካዎተ አራታፐ ዱገ ዎተ። 19 ነገበ ቢታን ደእያ ካታማት ኡባይ ጎርደትዶሶና። ኤንታ ዶያናዉ እስ አስካ ያን ባዋ። ይሁዳ አሳይ ኩመ ድኤትድ ብዶሶና” ያግስ። 20 ጎዳይ፥ “አነ ቁ ጋዳ፥ ፑደሀ ባጋፈ የይሳታ ፄላ። ነዉ እመትዳ ዉደይ፥ ነ ጬቀትዳ ዶርሳት አዉን ደኦና? 21 ኔኒ፥ ነዉ ላገ ግዳና መላ ኮይዳይሳት ነና ፆንድ ሃርያ ዎደ ዎይጋይ? የሎስ ከይዳ ማጫሳዳ እቀ ነና ኦይከኔ? 22 የሩሳላመ፥ ኔኒ ነ ዎዛናን፥ ‘ሀ ኡባይ ታና አይስ ጋክዴ?’ ጊኮ፥ ነ ማኦይ ቃረትዳይነ ነ ቦንቀትዳይ ነ ናጋራይ ዳርዳ ግሾሳ። 23 ቶጰይ ባ ማላ ዎይኮ ማሄይ ባ ጋዛተ ላማናዉ ዳንዳኢ? ሄሳዳካ፥ ኢታ ኦሶን ሜዘትዳ ህንተ፥ ሎኦ ኦሶ ኦናዉ ዳንዳኤከታ” ያግስ። 24 “ታ ህንተና ባዞ ጫርኮይ ኤፍያ ሱላዳ ላላና። 25 ህንተ ታና ዶግዳ ግሾነ ዎርዶ ፆሳታን አማነትዳ ግሾ ህንተ ሳማይነ ታ ህንተዉ እምያ ግሾይ ሀይሳ። 26 ህንተ ካሎይ በንታና መላ ታ ህንተ ማኡዋ ቃራ የጋና። 27 ነ ቦርሶ ኦሱዋ፥ ኮርማ ፓራዳ ዚታስ ጫገይሳ፥ ዬል ባይና ላይማተ፥ ዙማ ቦላነ ደንባን ነ ኦያ እፀትዳ ኦሱዋ ታ በአስ። የሩሳላመ፥ ነና አየ! ነ አዉደ ጋካናዉ ጌዮና ዳኔ?” ያጌስ ጎዳይ።