ሆሰ ማፃፋ 11

1 “እስራኤለይ ናአ ደእያ ዎደ እያ ዶስዳይ ታና፤ ታ ናኣ ግብፀፈ ፄጋስ። 2 ታኒ ኤንታ ዳርሳዳ ፄግን፥ ኤንቲ ታፐ ዳሮ ሃክድ ብዶሶና። ባኣለ ኤቃታስ ያርሾ ያርሽዶሶና፤ ኤቃ ምስለታስ እፃነ ጩይስዶሶና። 3 ኤፍሬማ አሳ ኩሽያ ኦይካዳ ሄመ ታማርስዳይ ታና፥ ሽን ኤንታ ፓዳይ ታና ግደይሳ ኤሮኮና። 4 ታኒ ኤንታ ቃንነ ሲቆ ዎዶሮን ጎቻስ፤ ኤንታ ሞርገፈ ቃምባራ ደንዳ ሆካዳ ኤንታ ሙዛስ። 5 ኤንቲ ታኮ ስሞና እፅድ ግብፀ ቢታ ስማና፤ አሶረ ቢታ ካዎይ ኤንታ ቦላ ካዎታና። 6 ኤንታ ካታማን ማሽ ደንዳና፤ ኤንታ ካታማታ ፐንገታ መንረና፤ ኤንታ ዞረታይ ላለታና። 7 ታ አሳይ ታፐ ሃካናዉ ኮይስ። ኤንቲ ፆሳኮ ዋስኮካ፥ እ ኤንታና ቦንቸና። 8 ኤፍሬም፥ ታኒ ነና ዋታዳ አጎ? እስራኤለ፥ ታኒ ነና ዋታዳ አ እሞ? ታኒ ነና ዋታዳ አዳማ ካታማዳ ኦ? ታኒ ነና ዋታዳ ፃቦይማ ካታማዳ ኦ? ታኒ ነና ዳሮ ዶስያ ግሾ ታ ዎዛናይ ሄሳ ኤሮ ጌና። 9 ታኒ ህንተ ግዶን ደእያ ጌሻ ፆሳፈ አትሽን፥ አሰ ግድከ። ሄሳ ግሾ፥ ታኒ ታ ሱልያ ሀንቁዋ ህንተ ቦላ ኤህከ፤ ናምአን ኤፍሬማ ይስከ፤ ታ ሀንቁዋራ ህንተኮ ዪከ። 10 ኤንቲ ጎዳ ካላና፤ እካ ጋሞዳ ጉዳና። እ ጉድያ ዎደ እያ ናይት ዉሎሀ ባጋፈ ኮኮርሸ ያና። 11 ግብፀፈ ካፎዳ፥ አሶረፐ ሆለዳ ፓልሸ ያና። ታኒ ኤንታ፥ ኤንታ ኬን ኬን ዎና። ታኒ ጎዳይ ሄሳ ኦዳስ” ያግስ። 12 ኤፍሬማ አሳይ ዎርዶን፥ እስራኤለ አሳይ ጭሞን ታና ተቅዶሶና። ይሁዳ አሳይ አማንያ ጌሻ ፆሳ ቦላ ፃልታምስ።