ሆሰ ማፃፋ 10

1 እስራኤለ አሳይ ዳሮ አይፈ አይፍያ ዳይዳ ዎይነ መላ፤ ኤንታ አይፈይ ዳርዳ መላ ኤቃ ያርሾ በሳታ ዳርስ ኬፅዶሶና። ኤንታ ቢታይ ዱረትዳ ኬና ጎይንያ ኤቃ ቱሳታ አሌቅስድ መዶሶና። 2 ኤንታ ዎዛናይ ጫከትስ፤ ሀእ ኤንቲ ባንታ ናጋራ ቶካና። ጎዳይ ኤንታ ያርሾ በሳታ ላላና፤ ኤንታ ኤቃ ቱሳታ ይሳና። 3 ሄ ዎደ አሳይ፥ “ኑኒ ጎዳስ ያይቦና ግሾ፥ ኑስ ካዎይ ባዋ። ሽን ካዎይ ደእያኮካ ኑስ አይ ኦኔ?” ያጋና። 4 ኤንቲ ሀኖና ኡፋይሳ ቃላ ገሎሶና፤ ዎርዶን ጫቆሶና፤ ሄሳ ግሾ፥ ዎያ ሀርመይ ጋደን ዶለይሳዳ ኤንታ ቦላ ፕርድ ዶላና። 5 ሳማረ ካታማን ደእያ አሳይ ቤት-አዌናን ደእያ ማራ ምስልያስ ያሻን ኮኮሮሶና። እያ ቦንቾይ እያፐ ቃረትዳ ግሾ እያዉ ዬካና፤ ሄ ኤቃ ምስልያ ካህነት ዋሳና። 6 ሄ ኤቃ ምስለይ አሶረ ቶከትድ፥ ብድ፥ ግታ ካዋስ እሞታ ግድድ እመታና። ኤፍሬም ዬላታና፤ እስራኤለይ ኤቃ ምስልያ ግሾ ካዉያና። 7 ሳማረ ካዎይ ሃ ጎፖንቶ ግድድ ያና። 8 እስራኤለ አሳይ አዌና ካታማን ኤቃስ ጎይንሸ፥ ናጋራ ኦያ ቃ በሳት ላለታና። ኤንታ ያርሾ በሳን አጉንነ ጎምኦረይ ዶላና። ሄ ዎደ ኤንቲ ደረታኮ፥ “ኑና ቆስተ!” ዙማታኮ፥ “ኑና ገንተ” ያጋና። 9 ጎዳይ፥ “እስራኤለ አሳዉ፥ ግብአን ህንተ ናጋራ ኦሶ ዶምዳ ዎድያፐ፥ ሀች ጋካናዉ ናጋራ ኦሶ አግበከታ። ሄሳ ግሾ፥ ኢታ ኦይሳታ ግብአን ኦል ዉርስቤኔ? 10 ታኒ ዶስዳ ዎደ ሄ ጌላታ ሴራና። ኤንቲ ኦዳ ዳሮ ናጋራ ግሾ ታኒ ኤንታ ሴርያ ዎደ ካዎተት ኤንታ ቦላ ደንዳና። 11 ኤፍሬም ካ የናዉ ዶስያ ዋ ከስዳ ዎፋኖ መላ። ሽን ታኒ እያ ሎእያ ሞርግያን ቃምባራ ዎዳ ዋፃና። ይሁዳ አሳይ ዎርፃፋና፤ ያይቆባ አሳይ ሽረቻና። 12 ጎዳይ ይድ ፅሎተ ህንተ ቦላ ቡክሳና ጋካናዉ እያ ኮይተ። ህንተ ፅሎተ ዘርያባ ግድኮ መርና ሲቆ ጫካና። ሄሳ ግሾ፥ ኦ ቢታ ዎርፃፍተ። 13 ሽን ህንተ፥ ህንተ ኦግያንነ ህንተ ዳሮ ኦላንቾታን አማነትዳ ግሾ፥ ኢታተ ዘርድ ናጋራ ጫክደታ፤ ህንተ ዎርዱዋ አይፍያ ምደታ። 14 ህንተ ቦላ ዎልቃማ ኦል ደንዳና፤ በን ካዎይ ሳልማን ቤት-አርበላ ካታማ ኦልድ ላልዳይሳዳነ አየታነ ናይታ ይስዳይሳዳ ቃስ ህንተ ሚፃታ ይሳና። 15 ቤተለ ካታማን ደኤይሳቶ፥ ህንተ ናጋራይ ዳሮ ግድያ ግሾ ሄሳ መላባይ ህንተና ጋካና። ሄ ጋላስ ሳእ ዎንትያ ዎደ እስራኤለ ካዎይ ሀይቃና።