ኢዮቤ ማጻፋ 29

1 ኢዮቢካ ባ ሃሳያ ሲን ጉጂዲ ሂዝጊዴስ፤ 2 «ታስ ሃኢ ዴኦዚ ካሴ ጾሲ ታና ናጊዛ ዎዴዛ ማላ ጊዲዳኮ ታና ኣይ ማላ ኡፋይሳንዴሻ! 3 ሄ ዎዴ ማ ጊዶራ ታ ቢሺን ጾሲ ታስ ፖኢሲሺን ታኒ ፖኦን ሄሜታይሲኮሺን። 4 ጾሳ ማዶይ ታ ኬ ካሴ ናቴቴ ዎዴ ናጊዛይሳ ሃኢካ ናጊዳኮ ኣዜ ዲዛይ? 5 ኡባ ዳንዳይዛ ጾሳይ ታናራ ዲዛ ጊሻስ ታ ናይቲ ኡባይ ታ ዩሾን ዴቴስኮሺን። 6 ታኒ ቶሆ ማን ሜጬታናሼ ጋካናስ ዳሮ ማ ዴማይስኮሺን፤ ዎጋራ ሚቲ ሜላ ቢታንካ ቶኬቲዲ ዲኦ ማላ ጎጊዛ ዳሮ ዛይቴ ታስ ኢሜቴስኮሺን። 7 ካታማ ፔንጌ ኣቻን ዲዛ ዱቡሻ ባዳ ዱላታን ታ ኡቲዛ ዎዴ፥ 8 ናቴ ናይቲ ታና ቤኢዲ፥ ቦንቾስ ታ ሲንፌ ኢሲ ባጋ ጌቴሲሺን፤ ጪማቲካ ታ ቦንቾ ጊሻስ ባ ኡቲዳሶሆፔ ዴንዲ ኤቄቴሲሺን። 9 ሃሳይሼ ዲዛ ዴሬ ካሌዛይቲ ታና ቤኢዲ ባንታ ኩሼታን ባ ዶና ዶና ኦይኪዲ ጮኡ ጌቴስኮሺን። 10 ዴሬ ዳናቲካ ታኒ ዲዛሶን ጮኡ ጌቴሲሺን፤ ኢስታስ ኢንጻርሲ ኦይኬቲን ሃሳያይካ ኢስታ ጾኔስኮሺን። 11 ታና ሲዪዳ ኡባይ ናሺዴስ፤ ታና ቤኢዳ ኡባይ ጋላቲዴስ። 12 ሃይሲካ ሃኒዳይ ታኒ ማንቆታ ዎሳ ሲያዳ ኢስታ ኣሺዛይሳኔ ዪኦ ናይታ ታ ማዲዛ ጊሻሳ። 13 ሃይቃና ማቲዳ ኣሳታ ታ ማዲዛ ጊሻስ ታና ኢስቲ ኣንጂዳ፤ ኣምኤ ማጫሳታ ታ ማዲዛ ጊሻስ ኡፋይሳን ዬጺዳ። 14 ጺሎቴ ማይኦ ማላ ማይኣዲስ፤ ሱሬ ፒርዳካ ካባ ማላ ጎጳ ማይኣዲስ፤ ቆቤ ማላካ ሁኤን ዎዲስ። 15 ቆቄታስ ኣይፌ፥ ዎቤታስካ ቶሆ ጊዳዲስኮሺን። 16 ማንቆታስ ኣዋ፥ ታ ኤሮንታ ኣሳታስካ ኣፓካቶኮሺን። 17 ጌኔ ኣሳ ባንቂላ ሜንዲስ፥ ኢዚ ቦንቂ ኤኪዳይሳካ ኢዛ ዶናፔ ዬጊሳዲስ። 18 «ታኒ፥ ‹ታ ላይይ ኣንጮ ማላ ዳሪን ታኒ ታሶን ዲዛ ማላ ቦንቾን ሃይቃና› ጋዲስኮሺን። 19 ጻጶቲ ኡባ ዎዴ ሃ ዴሚዛ ማላኔ ሃጋቲካ ጻዛን ጪሊሊዛ ሚ ማላኮሺን። 20 ኡባ ዎዴ ታ ቦንቼቲዳ ማላ ዳይስኮሺን፤ ታ ዎልቃይካ ኡባ ዎዴ ኦራጼስኮሺን። 21 ኣሳይ ታ ዞሬዛ ላሞታን ጮኡ ጊዲ ኤዝጌስ። 22 ታ ሃሳያይ ኢስታ ኣሊዛ ጊሻስ ታፔ ጉዬራ ሃሳይዛ ኣሲ ዴና። 23 ጎሻንቻይ ባሳ ኢራ ዴማናዉ ኣሞቲዛይሳ ማላ ኢስቲካ ታ ሃሳያ ሲያናዉ ባንታ ዶና ዶይዲ ናጌቴስኮሺን። 24 ታ ሚጫ ቤሲሺን ኢስቲ ኡፋዬቴቴስ፤ ታ ሲንይ ፖኢሺን ጺርጶቲዳ ኢስታ ሲንይ ቢርሼቴስ። 25 ካሴ ታ ኢስቲ ኮዪዳ ማላ ኣይሳይስኮሺን፤ ባ ኦላ ኣሳ ካሌዛ ካዎ ማላ ታ ኢስታ ካሌዲስኮሺን፤ ኢስቲ ሙዞቲሺን ታኒ ኢስታ ሚንይሲኮሺን።