ኢዮቤ ማጻፋ 28

1 «ቱማፔ ቢታ ጋርሳን ዲዛ ማኢዲኔቲ ቦኬቲዲ ቢራ ኬኢዛሶይኔ ዎርቃይ ሴሪ ኦሴቲዛሶይ ዴስ። 2 ቢራታይ ቢታፌ ቤቴስ፤ ጻርቂማላይ ማኢዲኔ ሹቻፌ ሴሪዲ ኬኤስ። 3 ኣሳይ ማ ካንዲ፥ ዱጌ ቢታ ጊዶ ቦኪ ጌሊዲ ሃኪ ዲዛሶዛ ዱጌ ዎዲ ጊርዲ ጊዳ ማ ጊዶን ማኢዲኔ ሹቻ ኮዬቴስ። 4 ኣሲ ዲዛሶፔ ሃኪዲ፥ ኣሳ ቶሆይ ዬ ኤሮንታሶ ጋኬቴስ። ሄንካ ጪማ ኦላ ቦኬቴስ፤ ዎዶሮ ቦላራ ኩሎቲ ኩሎቲ ዎዲ ኣሳፔ ሻኬቲ ባርካ ኦቴስ። 5 ቢታይ ሜቴቲዛ ካ ኢሜስ። ኢዛስ ጊዶይ ታማን ሴሪዲ ሺሬቲ ሺሬቲ ዎስ። 6 ሴምፔሬ ጌቴቲዛ ኣልኦ ሹቻይ ቢታን ዲዛ ሹቻታ ጊዶን ቤቴስ፤ ሄ ቢታ ጊዶንካ ዎርቃይ ቤቴስ። 7 ጌዴ ማኢዲኔዛኮ ኤፊዛ ኦጌ ጺሎይካ ኤሬና፤ ኣንኮታ ኣይፌይካ ቤዪቤና። 8 ኢታ ዶኣቲ ሄ ሶሆዛ ዬቤቴና፤ ጋሞይካ ኢዛ ባጋራ ኣቤና። 9 ኣሲ ጋዴ ጎዪሼ ሚኖ ሹቻታ ባ ኩሼን ዴንስ፤ ዙማታካ ጻጶፔ ሺሪ ዬጌስ። 10 ዛላካ ጳልቂዲ ኢዛ ጊዶራ ኣናስ ኦጌ ኬሴስ፤ ኣልኦ ጊዲዳ ማኢዲኔ ሹቻታካ ዴሜስ። 11 ሻፋታ ፑልቶታ ቴቄስ፤ ቢታ ጊዶን ቆታን ዲዛ ሚሻታ ቆንጬ ኬሴስ። 12 ሂስቲን ኣ ኤራቴ ኣዋፔ ቤቲዜ? ኣኬካሲካ ዲዛሶይ ኣዋ? 13 ኣ ኤራቴ ሼምፖራ ፓጻ ዲዛ ሜታቲ ዲዛ ቢታን ቤቱኩ፤ ኢዚስ ቱማ ዋጋካ ኤሪዛ ኣሲ ዴና። 14 ‹ዎጋ ጊታ ኣባይካ ታ ጊዶን ዱኩ፤ ኣባይካ ታናራ ዱኩ› ጌስ። 15 ኤራቴ ጌሻ ዎርቃን ሻሜቱኩ፤ ኢዚ ዋጋይካ ቢራን ሄሬጌቴና። 16 ኣ ኤራቴ ኦፊሬ ጌቴቲዛ ዎርቃፌ፥ ማርጊዴኔ ሴምፔሬ ጌቴቲዛ ኣልኦ ሹቻታፔ ኣ ቦንቼቲዳሮ። 17 ዎርቃይኔ ጌሻ ሄሬጋይ ኢዚራ ጊናቴቴና፤ ጺንታ ዎርቃፌ ኦሴቲዳ ጌጼይካ ኢዞ ላማና። 18 ቦንቼቲዳ ሄሌሎይኔ ኣልማዜ ጌቴቲዛይቲ ኣ ኤራቴራ ጊናቴቴና፤ ኣ ኤራቴ ጋቴይ ሉሌ ጌቴቲዛይሳፌካ ቦላ። 19 ቶጳዚዮኔ ጌቴቲዛ ቶጵያ ቢታ ኢንቁይካ ኢዚራ ጊኔና፤ ኬሂ ጌዪዳ ዎርቃፌካ ኣዉስ። 20 «ሂስቲኮ ኤራቴ ኣዋፔ ያዜ? ኣኬካይካ ኣዋፔ ቤታዜ? 21 ሼምፖራ ፓጻ ዲዛ ሜታታፔ ጌሚዳሮ፤ ሳሎራ ፒራዛ ካፎቲካ ኮዪዲ ኢዞ ዴሜቴና። 22 ዮይኔ ሃይቆይ፥ ‹ኑ ኢዚ ጊሻስ ኤሪዛይ ዎሬን ጻላ› ጌቴስ። 23 ኣ ኤራቴኮ ኤፊዛ ኦጌዛኔ ኢዛ ዲዛሶዛ ኤሪዛይ ጾሳ ጻላ። 24 ኢዚካ ሳኣ ጋጻ ኩሜ ዴሜስ፤ ሳሎፔ ጋርሳን ዲዛይሳ ኡባ ቤዬስ። 25 ኢዚ ጫርኮ ዎልቃ ኦዳ ዎዴ ዎጋ ጊታ ኣባ ኢዚ ማኪዳ ዎዴ፥ 26 ኢራሲኔ ዎልቃንራ ዲዛ ዳዳስ ዎጋ ዎዳ ዎዴ፥ 27 ጾሲ ኤራቴ ቤዪዴስ፤ ፓጪ ጼሊዲ ኢዞ ቦንቺዴስ፤ ፒልጊ ቤኢዲ ሚን ዎዴስ። 28 ሄ ዎዴ ኣሳስ፥ ‹ሄኮ ኤራቴ ጉሲ ጾሳስ ያሻቴ፤ ኣኬካ ጉሲ ኢታፔ ሃኮ› ጊዴስ።»