ሮመ 13

1 አሳይ ኡባይ ጋድያ አይስያዋንቶ ኤኖ ጋናዉ በሴ፤ አያዉ ጎፐ፥ ጾሳይ ጌናን ደእሽን፥ ጋድያ አይስያዌ ደአናዉ ዳንዳየና። ሀእ ደእያ አይስያዋንቱካ ጾሳይ ዎዳዋንታ። 2 ሄዋ ድራዉ፥ ሀእ ደእያ አይስያዋንታ እጽያ ኦንነ ጾሳ አዛዙዋ እጼ፤ ባረ ቦላ ፕርዳ አሄ። 3 አያዉ ጎፐ፥ አይስያዋንቱ ኢታባ ኦያዋንታ ያሻናዋፐ አትን፥ ሎኦባ ኦያዋንታ ያሽክኖ። አይስያዎ ያየናን አጋናዉ ኮያይ? ያቶፐ ሎኦባ ኦ፤ እ ኔና ጋላታና። 4 አያዉ ጎፐ፥ እ ነዉ ሎኦባ ኦናዉ፥ ጾሳዉ ቆማ። ሽን ኔን ኢታባ ኦፐ፥ ኢታባ ኦዳዋ እ ሴርያ ድራዉ፥ አዉ ያያ፤ እ ጾሳ ቆማ። ቃይ ኢታባ ኦያዋንቱ ቦላ ጾሳ ሀንቁዋ እ አሄ። 5 ሄዋ ድራዉ፥ ጋድያ አይስያዋንቶ ኤኖ ግያዌ ጾሳ ሙራ ጻላላሳ ግደናን፥ ህንተንቱ ዎዛና ቆፋ ድራዉካ ኤኖ ጋናዉ በሴ። 6 አያዉ ጎፐ፥ ጋድያ አይስያዋንቱ ባረንቱ ኦሱዋ ኦያ ዎደ፥ ጾሳዉ ኦያ ድራዉ፥ ህንተ ቃራጻ ቃንጽያዌ ሄዋሳ። 7 ኡባ አሳዉካ በስያዋ እምተ። ጊራ ጊራናዉ በስያዎ ጊርተ፤ ቃራጻ ቃንጻናዉ በስያዎ ቃንጽተ፤ ያያናዉ በስያዎ ያይተ፤ ቦንቹ በስያዋ ቦንችተ። 8 ህንተንቱ እቱ እቱዋና ሲቀታናፐ አትን፥ ሀራ አጩ ኦ ቦላንነ ደኦፖ። አያዉ ጎፐ፥ ሀራ ሲቅያ ኦንነ ህጊ ግያዋ ፖሌዳ። 9 “ዎሹሞፓ፤ ዎፓ፤ ዉኦፓ፤ አሳባ አሞቶፓ” ግያ አዛዛቱነ ሀራ አዛዛቱ ኡባቱ፥ “ነ ሾሩዋ ነ ሁጲያዳን ሲቃ” ግያ አዛዙዋን ኩሚኖ። 10 ባረ ሾሩዋ ሲቅያ ኦንነ አዉ ኢታባ ኦና፤ ሄዋ ድራዉ፥ ሾሩዋ ሲቅያዌ ህግያ ኡባዉ ኤኖ ግያዋ። 11 ገምእሹዋፐ ህንተ ቤጎትያ ሳቲ ሀእ ጋኬዳ ድራዉ፥ ሀ ዎድያ አኬክተ። አያዉ ጎፐ፥ ኑን ኮይሮ አማኔዳ ዎድያፐ፥ ኑን አትያ ዎዲ ሀእ ኑኮ ማታቴዳ። 12 ቃማይ አናዉ ሀኔ፤ ጋላሳይ ማታቴዳ። ስም ኑን ማ ኦሱዋ አጊደ፥ ፖኡዋን ኦለታናዉ፥ ኦላ ሚሻ ማዮይተ፤ 13 ጋላስ ፖኡዋን ደእያ አሳዳን፥ አነ ማራ ደኦይተ። የንነ ማዋን ግዶፖ፤ ዎሹሙሳንነ ዎሹማናዉ ካጄሉሳና ግዶፖ፤ ፓሉማንነ ቃናትያን ግዶፖ። 14 ሽን ጎዳ የሱስ ክርስቶሳ፥ ኦላ ሚሻ አ ማይተ፤ ህንተ ናጋራንቻ አሳተይ ባረ ዎዛና አሙዋ ፖላናዳን፥ አዉ ቆፖፕተ።