ሮመ 12

1 ስም ታናዳን አማንያዋንቶ፥ ህንተ ህንተ ኦናተ ጾሳ ናሸችያ ደኦነ ጌሻ ያርሹዋ ኦደ፥ ጾሳዉ ሺሻናዳን፥ ታን ህንተንታ ጾሳ ማሮተን ዎሳይ፤ ጾሳዉ ህንተ ጎይናናዉ በስያ ቱሙ ኦጊ ሄዋ። 2 ጾሳይ ህንተ ቆፋ ኡባና ዱማዪደ፥ ህንተንታ ላሞፐ አትን፥ ሀ አላምያ አሳ ማላቶፕተ። ሄ ዎደ ህንተ፥ ጾሳ ሸኒ፥ ሎኦባይ፥ አ ናሸችያባይነ ቃይ ፖሎ ግዴዳባይ አየንቶ ኤራንታ። 3 ጾሳይ ታዉ እሜዳ አ ኬካተን ታን ህንተንቶ ኦዳይ። ህንተንቱ ቆፓናዉ በስያዋፐ አደ፥ ኦቶሩዋን ቆፖፕተ፤ ሄዋ አጊደ፥ ዎዛናማ አሳዳን ቆፕተ፤ ጾሳይ ህንተንቶ ሁጲያን ሁጲያን እሜዳ አማኑዋ ኬናን ህንተ ቦላ ፕርድተ። 4 ኑ እት ቦላ ግዶን፥ ጮራ ቦላ ቆሞቱ ደኢኖ፤ ሄ ቆሞቱዋ ኡባዉካ ዱማ ዱማ ኦሱ ደኤ። 5 ሀዋዳን፥ ኑን ጮራ አሳ ግዶፐካ፥ ክርስቶሳ ባጋና እት አሳ። ቃይ ኑን እት አሳተ ቆሞቱዋዳን፥ እቱ እቱዋና ኦይቀት ኡቴዶ። 6 ጾሳይ ኑዉ እሜዳ አ ኬካተን ዱማ ዱማ እሞታይ ደኤ። ኑ እሞታይ ናበተ ግዶፐ፥ ኑዉ ደእያ አማኑዋ ኬና ኦዳናዉ በሴ። 7 ሀራቱዋ ማዱሳ ግዶፐ፥ ሄ ኦሱዋን ምናናዉ በሴ፤ ታማርሱሳ ግዶፐ፥ ሄ ታማርሱዋን ምናናዉ በሴ። 8 ሀራ አሳቱዋ ምንሱሳ ግዶፐ፥ ሄ ኦሱዋን ምናናዉ በሴ። ባረ ሁጰዉ ደእያባፐ ሀራቶ እምያ ኦንነ ዎዛናፐ እሞ። ማታይ ደእያ ኡራይ ምንስ ኦናዉ በሴ፤ ሀራቶ ኬክያ ኡራይ ናሸቻን ኬካናዉ በሴ። 9 ህንተንቱ ሲቁ አሳ በሳናዉ ሲቀትያዋ ግዳናዉ በሰና። ኢታባ እጽተ፤ ሎኦባ ምንሲደ ኦይቂተ። 10 እቱ እቱዋና እሻቱዋዳን ሲቀትተ፤ እቱ እቱዋ ቦንችያዋን ናሸትተ። 11 ምኒደ ኦተ፤ አዛሎፕተ፤ ህንተ ኩመን ዎዛናፐ ጎዳዉ ኦተ። 12 ጾሳይ ህንተንቶ እማና ጌዳዋን ናሸትተ፤ ዋይያን ገንጭተ። ኡባ ዎደ ጾሳ ዎስተ፤ 13 ጾሳ አሳቱዋ ኮሽያባን ማድተ፤ እማ ሞክተ። 14 ህንተንታ የደርስያዋንታ አንጅተ፤ ኡንቱንታ አንጅተፐ አትን፥ ሸቆፕተ። 15 ናሸትያዋንቱና ናሸትተ፤ ዬክያዋንቱናካ ዬክተ። 16 አሳ ኡባዉ እት ማላ ቆፋ ቆፕተ፤ ኦያባን ኡባን ህንተንታ ቶቺደ ደእተፐ አትን፥ ኦቶረቶፕተ፤ ህንተንታ ህንተረካ አ ኤራንቻ ጊደ ቆፖፕተ። 17 ኦንነ ህንተንቶ ኢታባ ኦፐ፥ ሄ ኡራዉ ኢታባ ኦ ዛሮፕተ፤ አሳ ኡባዉ ሎኦባ ኦናዉ ቆፕተ። 18 አሳ ኡባና ሳሮተን ደአናዉ፥ ህንተ ባጋና፥ ህንተንቶ ዳንዳየቴዳባ ኡባ ኦተ። 19 ታናዳን አማንያዋንቶ፥ ህንተ ህንተ ሁጰዉ አሳዉ ሀሉዋ ከሶፕተ። ጾሳይ ሀሉዋ ከሳናዳን፥ አ ቦላ ኦልተ። አያዉ ጎፐ፥ ጾሳ ማጻፋይ፥ “ጎዳይ፥ ‘ታን ሀሉዋ ከሳና፤ ታን ኩሽያ ጭጋና’ ጌ” ያጌ። 20 ሽን ጾሳ ማጻፋይ፥ “ነ ሞርኪ ኮሻቶፐ፥ ምዛ። ሳመቶፐ፥ ኡሻ። አያዉ ጎፐ፥ ኔን ሄዋ ኦያዋን፥ አ ዳርሳ ዬላያሳ” ያጌ። 21 ኢታባ ሎኦባን ጾናፐ አትን፥ ኢታባይ ኔና ጾኖፖ።