ከሳ 32

1 አሳይ ሙሴ ደርያፐ ዎናን ሎይ ጋምኤዳዋ በኤዳ ዎደ፥ አሮና ዩሹዋን ሺቂደ፥ “ሃያ፤ ኔን ኑና ካለያ ጾሳቱዋ ኑዉ መ። ግብጼ ጋድያፐ ኑና ከሴዳ ሙሳ ግዶፐ፥ እ ዋኔደንቶነ ኑን ኤሮኮ!” ያጌድኖ። 2 አሮነ ኡንቱንታ፥ “ህንተንቱ ማቻቱዋ ሀይንነ ህንተንቱ አቱማ ናናነ ማጫ ናናቱዋ ሀይን ደእያ ዎርቃ ከሲደ፥ ታዉ አኪደ አህተ” ያጌዳ። 3 ሄዋፐ ጉይያን አሳይ ኡባይ ባረ ሀይ ዎርቃ ከሲደ፥ አሮናዉ አሄድኖ። 4 እ ሄዋ ኡንቱንቱ ኩሽያፐ አኪደ፥ ሲልሴዳዋፐ ጉይያን ቆጽያባን ቆጺደ፥ ማራ ማላትያ ኤቃ ኦደ መዳ። አሳይ፥ “እስራኤላቶ፥ ህንተንታ ግብጼ ጋድያፐ ከሴዳ ህንተንቱ ጾሳቱ ሀዋንታ” ያጌዳ። 5 አሮነ ሀዋ በኤዳ ዎደ፥ ሄ ማራ ስንን ያርሽያ ሳኣ ግምቢደ፥ “ዎንታ መና ጎዳ ባላ ጋላሳ ግዳናዋ” ያጊደ ኤርሴዳ። 6 ሄዋ ድራዉ፥ ዎንተ ጋላስ አሳይ ጉራን ደንዲደ፥ ጹግያ ያርሹዋ ሺሼዳ፤ እትፐተ ያርሹዋካ ያርሼዳ። ያቲደ አሳይ ማናዉነ ኡሻናዉ ኡቴዳ። ም ኡሽ ስሚደ፥ ቃይ ዱራናዉ ደንዴዳ። 7 ያንና መና ጎዳይ ሙሳ፥ “ኔን ኤለካ ዱገ ዎ፤ አያዉ ጎፐ፥ ነ አሳይ፥ ኔን ግብጼፐ ከሳደ አሄዳዌ ናጋራ ኦደ፥ ባረንቱ ሁጲያ ቱንሴድኖ። 8 ታን ኡንቱንታ አዛዜዳ ኦግያፐ ኡንቱንቱ ኤለካ ሸርእ ጌድኖ። ዎርቃ ሲልሴዳ ማራ ማላትሲደ፥ ባረንቶ ኤቃ መደ አዉ ጎይኔድኖ፤ አዉ ያርሼድኖ። ኡንቱንቱ፥ ‘እስራኤላቶ፥ ህንተንታ ግብጼ ጋድያፐ ከሴዳ ህንተንቱ ጾሳቱ ሀዋንታ’ ያጌድኖ” ያጌዳ። 9 መና ጎዳይ ሙሳ፥ “ታን ሀ አሳ በኣድ፤ ኡንቱንቱ ሞርጊ ሌፋቴዳ አሳ። 10 ሀእ ታ ሀንቁ ኡንቱንቱ ቦላ ኤጽ ከስና፥ ታን ኡንቱንታ ባይዛናዋ ኔን ታና ድጎፓ። ያታደ ታን ኔና ዎልቃማ ካዉተ ኦና” ያጌዳ። 11 ሽን ሙሴ መና ጎዳ ባረ ጾሳ ሀዋዳን ያጊደ ዎሴዳ፤ “አቤት መና ጎዳዉ ኔን ነ ዎልቃማ ዎልቃንነ ነ ምኖ ኩሽያን ግብጼፐ ከሳደ አሄዳ ነ አሳ ቦላ ነ ሀንቁ አያዉ ኤጽ ከስ? 12 ግብጼቱ፥ ‘ጾሳይ ኡንቱንታ ደረቱዋ ቦላን ዎናዉነ ጋድያፐ ፕት ይሳናዉ፥ ኢታ ሀልቹዋን ከሴዳ’ አያዉ ግኖ? ነ ያሽያ ሀንቁዋፐ ስማ፤ ነ አሳ ይሳናዉ ቆፖዋ አጋ ባሻ። 13 ነ አይለቱዋ አብራሃማ፥ ይሳቃነ ያቆባ ሀሳያ፤ ኔን ኡንቱንቶ፥ ‘ታን ህንተንቱ ዛርያ ሳሉዋ ጾልንተቱዋዳን ዳርሳና፤ ሀ ታን ህንተንቶ እማና ጌዳ ጋድያ ኡባካ ህንተንቱ ዛርያዉ እማና፤ ኡንቱንቱ ሄ ጋድያ መናዉ ላታና’ ጋደ ነ ሁጲያን ኔን ጫቄዳ ቃላ ሀሳያ” ያጌዳ። 14 ሄዋ ድራዉ፥ መና ጎዳይ ባረ አሳ ቦላ ኢታባ አሀናዉ ኦዴዳዋ አጊደ፥ ኡንቱንታ ማሬዳ። 15 ሄዋፐ ጉይያን ሙሴ ታሙ አዛዛቱ ኡንቱንቱን ጻፈት ኡቴዳ ላኡ ማርካተ ሹቻቱዋ ባረ ኩሽያን ኦይቂደ፥ ደርያፐ ዱገ ዎዳ። ሄ ሹቻቱ ላኡ ባጋናካ ጻፈቴድኖ። 16 ሄ ማሰቴዳ ሹቻቱዋ ጊግሴዳዌ ጾሳ፤ ሹቻ ቦላ ዎጪደ ጻፌዳዌካ ጾሳ። 17 ኢያሱ አሳ ጫቡዋ ስሴዳ ዎደ፥ ሙሳ ሀዋዳን ያጌዳ፤ “ዱንካኔዳ ሳኣን ኦላ ዋሱ ስሰቴ” ያጌዳ። 18 ሙሴ ዛሪደ፥ “ታን ስስያዌ ሀዌ የፐ አትና፥ ጾኔዳዋንቱ ኮሻ ዎይ ጾነቴዳዋንቱ ኮሻ ግደና” ያጌዳ። 19 ሙሴ ዱንካኔዳ ሳኣ ማቴዳ ዎደ፥ ማራነ ዱሩዋ በኢደ ሎይ ሀንቀቲደ ባረ ኩሽያን ኦይቆ ማርካተ ሹቻቱዋ ደርያ ጻጱዋን ኦሊደ መንሬዳ። 20 ኡንቱንቱ መዳ ማራካ አኪደ፥ ታማን ጹጌዳ፤ ሄዋፐ ጉይያን ሊቃና ጋካናዉ ጋጪደ ሃ ቦላ ላሊደ፥ እስራኤልያ አሳይ ኡሻናዳን ኦዳ። 21 ሄዋፐ ጉይያን፥ ሙሴ አሮና፥ “ሀ አሳይ ኔና ዋትኔ ኔን ኡንቱንታ ሀዋ ማላ ዎልቃማ ናጋራዉ ካለዳዌ?” ያጌዳ። 22 አሮንካ ዛሪደ፥ “ታ ጎዳዉ፥ ሀንቀቶፓ፤ ሀ አሳይ ኢታ ኦናዉ አይ ኬሻ ኮይንቶ ኔን ኤራሳ። 23 ኡንቱንቱ ታና፥ ‘ኑና ካለያ ጾሳቱዋ ኑዉ መ። አያዉ ጎፐ፥ ሀ ኑና ግብጼፐ አሄዳ ሙሴ እ ዋኔደንቶነ ኑን ኤሮኮ!’ ያጌድኖ። 24 ታን ኡንቱንታ፥ ‘ህንተ ቦላ ደእያ ዎርቃ ከሲደ፥ ሀምተ’ ያጋድ። ሄዋፐ ጉይያን ኡንቱንቱ ታዉ እሜዳ ዎርቃ ታን ታማን የግና፥ ሀ ማራይ ከሴዳ” ያጌዳ። 25 አሮነ አሳ ገደ ጮ የድ አግና፥ አሳይ ባረ ሞርከቱዋ ስንን ካዉሺደ ካቴዳዋ ሙሴ በኤዳ። 26 ሄዋ ድራዉ፥ ሙሴ ዱንካኔዳ ሳኣ ገልያ ፐንግያን ኤቂደ ሀዋዳን ያጌዳ፤ “መና ጎዳ ባጋ ግዴዳ አሳይ ኦንነ ታኮ ዮ!” ያጌዳ። ሌዋቱ ኡባይ አኮ ሺቄድኖ። 27 ሄዋፐ ጉይያን እ ኡንቱንታ፥ “መና ጎዳይ እስራኤልያ ጾሳይ ሀዋዳን ያጌ፤ ‘አሳይ ኡባይ ማሻ ባረ ጼሳን ጼሳን ዳንጮ፤ ዱንካኔዳ ሳኣን ጋጻፐ ጋጻ ጋካናዉ፥ ጉየዉነ ስንዉነ ስመረቶ፤ እቱ እቱ ባረ እሻ፥ ባረ ላግያነ ባረ ሾሩዋ ዎ ያጌ’ " ያጌዳ። 28 ሌዋቱ ሙሴ አዛዜዳዋዳን ኦድኖ፤ ሄ ጋላስ አሳፐ ሄዙ ሻኣ ኬሻይ ሀይቄዳ። 29 ሄዋፐ ጉይያን ሙሴ ሌዋቱዋ፥ “ሀቼ ህንተንቱ ጾሳዉ ዱማቴድታ፤ አያዉ ጎፐ፥ ህንተንቱ ህንተንቱ ናናነ ህንተንቱ እሻቱዋ ዎናዉካ አዛዘቴድታ፤ ሀቼ መና ጎዳይ ህንተንታ አንጃና” ያጌዳ። 30 ዎንትሳ ጋላስ ሙሴ አሳ፥ “ህንተንቱ ዎልቃማ ናጋራ ኦድታ፤ ሽን ሀእ ታን መና ጎዳኮ ፑደ ደርያ ከሳና፤ ህንተንቱ ናጋራ ታን አቶ ጊሳንታንቶነ” ያጌዳ። 31 ያትና ሙሴ መና ጎዳኮ ስም ቢደ ሀዋዳን ያጌዳ፤ “ሀ አሳይ ዎልቃማ ናጋራ ኦዳ፤ ኡንቱንቱ ባረንቶ ዎርቃፐ ጾሳቱዋ መድኖ። 32 ሽን ሀያና፥ ሀእ ኡንቱንቱ ናጋራ አቶ ያጋ፤ ሄዌ ዮፐ፥ ኔን ጻፌዳ ማዝጎብያፐ ታና ቁጫ” ያጌዳ። 33 መና ጎዳይ ዛሪደ ሙሳ፥ “ታን ታ ማዝጋባፐ ቁጫናዌ ታ ቦላ ናጋራ ኦዳ አሳቱዋ ሱን። 34 ሀእ ባደ፥ ሀ አሳ ታን ነዉ ኦዴዳ ሳኣ ካለ፤ ታ ኪታንቻይካ ኔና ካለና፤ ሽን ታን ሙራናዉ ዎዲ ጋክና፥ ኡንቱንታ ኡንቱንቱ ናጋራ ድራዉ ሙራና” ያጌዳ። 35 አሮነ ዎርቃፐ ማራ ምስልያ መናዳን አሳይ ኦዳ ድራዉ፥ መና ጎዳይ አሳ ቦላ ዎልቃማ ቦሻ የዴዳ።