ከሳ 31

1 መና ጎዳይ ሙሳ ሀዋዳን ያጌዳ፤ 2 “በአ፤ ታን ይሁዳ ዛረ ግዴዳ ሁራ ናኣ ናኣ፥ ኡራ ናኣ፥ ባጻልኤላ ዶራድ። 3 አ ታን ጾሳ አያናን፥ ሂላን፥ አኬካንነ ኦሱዋ ኡባ ኦያ ኤራን ኩንድ፤ 4 ሄዌካ ሂላን ኪታ ሀልቹዋ ከሲደ፥ ዎርቃፐ፥ ብራፐነ ናሃስያፐ ዱማ ዱማባ እ ኦናሳ። 5 ሄዋዳንካ፥ ሹቻ ማሲደ ጊግሳናዳንነ፥ ም ማሳናዉ ሀራ ኦሱዋ ኡባ እ ኦናሳ። 6 “ሄዋ ቦላካ ቃይ አ ማዳና ማላ፥ ዳና ዛረ ግዴዳ አህሳማካ ናኣ ኦሆልኣባ ሱንድ። ታን ኔና አዛዜዳዋ ኡባ ኡንቱንቱ ኦና ማላ፥ ኩሽያ ሂላ ኤርያዋንቶ ኡባቶ ኤራ እማድ። 7 ኡንቱንቱ ኦናዉ: ጾሳ ዱንካንያ፥ ቃላ ጫቁዋ ታቦታ፥ አ ቦላ ዎያ አቶ ግያ ሳኣ ቁምእያ፥ ጾሳ ዱንካንያ ግዶን ጎኤትያ ሚሻ ኡባ፥ 8 ጻርጴዛነ አ ሚሻቱዋ፥ ጾምፕያ ዎያ ባላ ዋላካይ ባይና ዎርቃፐ ኦሰቴዳዋነ አ ሚሻ ኡባና፥ እጻና ጩውስያ ሚሻ፥ 9 ጹግያ ያርሹዋ ያርሽያ ሳኣነ አ ሚሻ ኡባና፥ ሜጨትያ ከርያነ አ ዎያዋና፥ 10 ዳደቴዳ ማዩዋ፥ ቄሳቱዋ ኡባቱዋ ካፑ አሮነ ማያና ጌሻ ቄሳተ ማዮቱዋነ አ አቱማ ናናይ ቄሳተ ኦደ ማያና ማዩዋ፥ 11 ቃይ ኦከትያ ዛይትያነ ጌሻ ሳአዉ ሳዉዋ ቶሽኩ ግያ እጻና። ኡንቱንቱ ሀዋ ኡባ ታን ኔና አዛዜዳዋዳን ኦኖ” ያጌዳ። 12 ሄዋፐ ጉይያን መና ጎዳይ ሙሳ ሀዋዳን ያጊደ አዛዜዳ፤ 13 “እስራኤልያ አሳ ኔን፥ ‘ታ ሳምባታ ቦንችተ። ሄዌ ታን መና ጎዳይ ህንተንታ ታዉ ጌሻ ኦደ ዶሬዳዋ በስያዋ ግዲደ፥ ያና የለታ ኡባዉ ታፐነ ህንተፐ ግዱዋን ማላታ ግዳናዋ። 14 ህንተንቶ እ ጌሻ ግድያ ድራዉ፥ ሳምባታ ቦንችተ። አ ቱንስያዌነ ሄ ጋላሳን ኦያ አሳይ ኡባይ አሳ ግዶፐ ሀይቁዋን ቦሄቶ። 15 ኡሱፑን ጋላሳቱዋን ኔን ኦሱዋ ኦ፤ ሽን ላፑን ጋላሳይ መና ጎዳዉ ዱማቴዳ ሸምፖ ሳምባታ፤ ሳምባታ ጋላሳን አይ ኦሶነ ኦያ ኦንነ ሀይቆ። 16 እስራኤላቱ ሀ ሳምባታ ጋላሳ የለታፐ የለታዉ መና ቃላ ጫቁዋ ኦደ ቦንችኖ። 17 መና ጎዳይ ኡሱፑን ጋላሳቱዋን ሳሉዋነ ሳኣ መዳ ድራዉነ ቃይ ላፑን ጋላሳን ታን ኪታ አጋደ ሸምፔዳ ድራዉ፥ ታ ግዱዋንነ እስራኤላቱ ግዱዋን ሀዌ መናዉ ማላታ ግዳና’ ያጋ” ያጌዳ። 18 መና ጎዳይ ሙሴዉ ሲና ደርያ ቦላን ሃሳይያዋ ዉርሴዳ ዎደ፥ ጾሳይ ባረ ብራያን ጻፌዳ ታሙ አዛዙዋ ኦይቂደ ላኡ ማሰቴዳ ቃላ ጫቁዋ ሹቻቱዋ ሙሴዉ እሜዳ።