ኤራንቻ 2

1 ታን ታ ዎዛናን፥ “አነ ታዉ ዎልቃማ ናሸቻ እምያዌ አየንቶ፥ ቃይ ደእያ ደኡዋ ግዶንካ ሎኦባይ አየንቶ በአና” ያጋደ ቆፓድ፤ ሽን ሄዌካ መላ። 2 ኡባ ገደ ሚጭያዌ ኤያተ ግድያዋ፥ ቃይ ዳሮ ናሸቻይካ አይነ ጎኤናባ ግድያዋ አኬካድ። 3 ሄዌ ሄዋ ግድ ኡት ደእሽን፥ አዳ ኤራተ ደማናዉ አሞታደ፥ ታ ዎዛና ዎይንያ ኤሳን ናሸቻደ፥ ሄዋ ሱጋናዉ ኤያተን ቆፋ ቃቻድ። ቃይ አሳይ ሀ ሳኣ ቦላ ባረዉ ደእያ ቃን ዎድያ አያ፥ ኡባፐ አያ ሎኦ ኦጊካ ሀዋ ጋደ ቆፓድ። 4 ቃይ ሀራ እት ዎልቃማባ ኦድ፤ ታዉ ደእያ ኬቱዋ ኬጻድ፤ ዎይንያ ቱራካ ቶካድ። 5 ዱማ ዱማ አታክልትያነ አይፍያ አይፍያ ምቱዋ ቶክያ ሳኣነ አሳይ ሸምፕያ ሳኣ ጋናትያዳን ሎይደ ጊግሳድ። ሄ ሳኣን ዱማ ዱማ አይፍያ አይፍያ ምቱዋካ ቶካደ፥ ድቻድ። 6 ሄ ድጭያ ምቱዋ ኡሻናዉ፥ ሃ ዳጋይያ ሳኣ ዜራደ ጊግሳድ። 7 አቱማነ ማጫ አይለቱዋ ሻማድ፤ ቃይ ታ ሶን የለቴዳ ሀራ አይለቱካ ታዉ ደኢኖ። ታፐ ካሰ የሩሳላመን ደኤዳ ኦዋፐነ ዳርያ መህያ፥ ዴሻነ ዶርሳ ዉድያ ሃራድ። 8 ታን ሞድያ ዱማ ዱማ ቢታቱዋፐ ቦንቼቴዳ ካተ ጎልያ ዱረታ አይሳደ፥ ዳሮ ዎርቃነ ብራ ታዉ ዳጋያድ። ቃይ፥ ታና ሳቢደ የጽያ አቱማነ ማጫ የንቻቱዋ ቃጻራድ፤ ሄዋ ቦላካ፥ አሳዉ ናሸቻ እምያ ሎይ ዳሮ ማጫ አሳካ ሺሻድ። 9 ሄዋ ድራዉ፥ ታን ታፐ ካሰ የሩሳላመን ደኤዳ ኦፐነ አዳ ዎልቃማ አሳ ግዳድ። ታ አዳ ኤራተይካ ታናና ዉርሰይ ጋካናዉ ደኤዳ። 10 ታ አይፊ ጼሌዳባነ ታ ዎዛናይ አሞቴዳባ ኡባ ደማድ፤ ታ አሳተይ ኮይያ ናሸቻ ኡባካ ድጋበይከ። ታን ኦዳ ኦሱዋ ኡባን ናሸታይ፤ ታ ዳቡራዉ ዎካ ሄዋ። 11 ግዶ ሽን፥ ሄዋ ኡባ ኦ ስማደ ታን አኬክያ ዎደ፥ ሎይ ታን አዉ ዳቡሬዳዌ ኡባይካ መላ ግድያዋ በኣድ። ሳሉዋ ጉፋንን ጎእያዌ አያይነ ባዋ፤ ኡባይካ ጫርኩዋ ኦይቃናዉ የደርስያባ ማላ። 12 ሄዋፐ ጉይያን፥ ታን አዳ ኤራተይ፥ ኤያተይነ ጎሻይ አየንቶ ፓጫደ ኤራናዉ ቆፋ ዶማድ። ካትያ ኮታን ካተትያ ሀራ ካቲ ካሰ ኦሰቴዳዋፐ አያ ሀራባ አይ ኦኔ? 13 ታን ሀዋዳን ያጋድ፤ “ቱሙካ ፖኡ ማፐ ኬክያዋዳን፥ አዳ ኤራተይ ኤያተፐ ኬኬ። 14 ጭንጫ አሳቱ ባረንቱ ደንድያ ሳኣነ ቢደ ጋክያ ሳኣ ኤሪኖ፤ ሽን ኤያቱ ሄዋ ኡባ ኤርክኖ” ያጋድ። ግዶፐ አትና፥ ኡንቱንቱ ላኡዋ ዉርሰይካ እቱዋ። 15 ታን ታ ዎዛናን፥ “ኤያ ጋክያ ካጫይ ታናካ ጋኬ፤ ያትና፥ ታን አዳ ኤራንቻ ግድያዌ ታና አያ ማዲ?” ያጋደ ቆፓድ። ቃይ ታን ታ ዎዛናን፥ “ሀዌ ኡባባይካ መላ!” ያጋድ። 16 አያዉ ጎፐ፥ ኤይና አዳ ኤራንቻ ግድና፥ ሀይቁዋፐ ሄፍንን ስሚደ፥ አ ሀሳይያዌ ባዋ፤ ስንፐ ይያ ላይቱዋን ኑን ኡባይካ ዶገት አታና። ኤያይ ሀይቂያዋዳን፥ አዳ ኤራንቻይካ ሀይቄ። 17 መቱዋፐ አትና፥ ጎእያዌ ባይና ድራዉ፥ ሀ ሳኣ ደኡ ታና ኢቴዳ። ሄዌካ መላ፤ ጫርኩዋ ኦይቃናዉ የደርስያባ ማላ። 18 ሳሉዋ ጉፋንን ታን ሎይ ዳቡራደ ደሜዳ ታ ማጹዋ ኡባ ታፐ ጉይያን ይያ ኡራዉ የጋደ ብያ ድራዉ፥ ታን ዳቡሬዳዌ ኡባይ ታና ኢቴዳ። 19 ታፐ ጉይያን ይያ ብታኒ አዳ ኤራንቼንቶ ኤየንቶ ኦን ኤሪ? ሽን እ ኦና ግድናካ፥ ታን ሎይ ዳቡሬዳዋነ ታ ጭንጫተን ታን ደሜዳዋ ኡባ ባረዉ አኪደ፥ ጎዳ ግዳናዋ፤ ያቶፐ፥ ሄዌካ መላ። 20 ሄዋ ድራዉ፥ ሳሉዋ ጉፋንን ሀዋ ኬሻ አያዉ ዳቡራድታሻ ጋደ ታ ዎዛናን ካዮታድ። 21 አስ ባረ ደኤዳ ላይን ባረዉ ደኤዳ አዳ ኤራተን፥ ኤራንነ ሂላን ዳቡሪደ ደሜዳዋ ኡባ አይነ ዳቡርቤናዎ የጊደ ቤ። ሄዌካ ቃይ፥ ሀዳነ ልከ ግደናዋ። 22 ያትና፥ ሳሉዋ ጉፋንን አሳይ ሎይ ዳቡሪደ ኦዳዋፐ ኡባፐ አያ ጎኣ ደሜዴ? 23 እ ባረ ደኡዋ ላይን ዳቡርያ ዳቡራይ ኡባይ ካዮቶፐነ ካዮፐ ሀራባ አይነ አዉ ጉጀና፤ ሀራይ አቶ ቃማካ አ ሁጲ ቆፋፐ ሸምፐና፤ ግዶ ሽን፥ ሄ ኡባይካ መላ። 24 ሄዋ ድራዉ፥ አሳዉ ጎኣ ግድያዌ አዬ ጎፐ፥ አሳይ ባረ ዳቡሬዳባፐ ሚድነ ኡሺደ ናሸትያዋ። ሄ ናሸቻይካ ቃይ ጾሳ ኩሽያፐ እመቴዳዋ ግድያዋ ታን አኬካድ። 25 አያዉ ጎፐ፥ አ ሸነ ግዳናዋ ዮፐ፥ ምን ኡሽናካ አሳዉ ናሸቻይ ሀቃን ቤቲ? 26 ጾሳ ናሸችያ ኡራዉ ጾሳይ ጭንጫተ፥ ኤራተነ ናሸቻ እሜ፤ ናጋራንቻዉ ማታ እ ዳቡሪደ ሺሻናዳን፥ ዳቡራ እሜ፤ ሽን እ ሺሼዳዋ ጾሳይ አኪደ፥ ባረዉ ያይያዎ ሀራዉ እሜ። ሄዋ ድራዉ፥ ሀ ኡባይካ ሀዳነ ጫርኩዋ ኦይቃናዉ የደርስያባ ማላ።