ኤራንቻ 1

1 ሀዌ፥ ዳዊታ ናኣ፥ የሩሳላመን ካተቴዳ ኤራንቻ ቃላ። 2 ሄ ኤራንቻይ፥ “ኡባባይካ መላ፤ ቃይ ኡባባይካ ሀዳፐ አዳ መላ፤ ኡባባይካ ኡባና መላ” ያጌዳ። 3 ባረ ደእያ ሳን ኡባን፥ አሳይ ዳቡሪደ ኦያዋን ኡባን አዉ ዎ አዬ? 4 እት የለታይ አያ ዎደ፥ ሀራ የለታይ ሳኣ ኦይቄ። ሽን ሀ ቢታይ መናዉካ ላመተናን ደኤ። 5 አዋይ ዶሌነ ዉሌ፤ ቃይ ላኤንዋካ ዶላናዉ ያ ዶሊያ ሳኣኮ ኤሌሌ። 6 ጫርኩ እት ገደ ገድሳ እት ገደ ሁጲሳ ጫርኬ፤ ቃይ ዩይ ዩይ አደ፥ ስመረቲደ ዬ። 7 ጎግያ ሃይ ኡባይ አባን ገሌ፤ ሽን አባይ ኩም ኤረና። ሄ ሃይ ቃይካ ስሚደ ጎጋናዉ፥ ጉየ ባረ ፑልትያ ሳኣ ቤ። 8 ኡባባይካ ሳለያባ። እ ዎይሳ ኬናዉ ሳለንቶካ ኦድ ዉርሳናዉ ዳንዳየተና። አይፊ ጼሊደ፥ ካል ኤረና፤ ሀይይካ ስሲደ፥ ታዉ ግዴዳ ግ ኤረና። 9 ካሰ ሀኔዳዌ ስንናዉካ ስሚደ እ ሀናና፤ ቃይ ሀእ ሀኒደ ደእያባይካ ካሰ ሀኔዳዋ። ሄዋ ድራዉ፥ ሳሉዋ ጉፋንን ኦራባ ግያዌ አያይነ ባዋ። 10 ኦንነ፥ “በእተ! ሀዌ ኦራባ” ጎፐ፥ ሄዌ ኦራ ግደና፤ ሄዌ ኑን የለታናፐ ካሰ ባጋን ሀኔዳዋ። 11 ካሰ አዳ ዎደቱዋን ሀኔዳባቱዋ ዛሪደ ሀሳይያዌ ባዋ፤ ጉየፐ ሀናናባቱዋካ ኡንቱንቱፐ ጉይያን ኦንነ ሀሳየና። 12 ታን ኤራንቻይ፥ የሩሳላመን እስራኤልያዉ ካተ ግዳደ ደኣድ። 13 ታን ቢታን ሳኣን ደእያዋ ኡባ ቆራ ቆራደ ኤራናዉነ አዳ ኤራተን ፕልጋ ጼላናዉ ታ ቆፋ ቃቻድ። ያታደ አሳ ኡባዉ ጾሳይ እሜዳ ደኡ ሎይ ዳቡርስያባነ ናሸችያባ ግድያዋ አኬካድ። 14 ሳሉዋፐ ጋርሳ ባጋን ሀኔዳዋ ኡባ ታን በኣድ፤ ሽን ኡባባይካ መላ፤ ጫርኩዋ ኦይቃናዉ የደርስያዋ ማላ። 15 ጌላይ ስታናዉ ዳንዳየና፤ ቃይ ባይናባካ ፓይዳናዉ ዳንዳየተና። 16 ታን ዎን ታ ዎዛናን ሀዋዳን ያጋደ ቆፓድ፤ “ታፐ ካሰ የሩሳላመ ሞዴዳ ኡባቱዋፐ ታን ዎልቃማነ አዳ ኤራንቻ ግዳድ። ጭንጫተነ ኤራ ግያዌ እ አየንቶ ፓጫደ ኤራድ” ያጋድ። 17 ቃይ ታን አዳ ኤራተፐ፥ ጎሻፐነ ኤያተፐ ግዱዋን ደእያ ዱማተይ አየንቶ ኤራናዉ ሎይ ዳቡራድ። ሽን ዉርሰን ሄዌካ ጫርኩዋ ኦይቃናዉ የደርስያባ ማላ መላ ግድያዋ ኤራድ። 18 አዳ ኤራተይ ዳርያ ዎደ ካዮዪያባይ ዳሬ፤ ኤራይ ዳርያ ዎደካ ቃይ መቱ ዳሬ።