Yontu 114

1 Wɑɑtʋ wei Ɩsɛɣɛlɩ nyə́mɑ lɩɩwɑ Icipiti tɛtʋ tɑɑ tɔ, wɑɑtʋ wei Yɑkɔpʋ lʋlʋɣʋ nyə́mɑ lɩɩ piitim lɛmpɩ tɔm yɔɣɔtəlɑɑ mpɛ pɑ tɛ tɔ. 2 Ḿpʋɣʋ Yutɑ pəsɑ Tɑcɑɑ kɔtɑɣɑ təlɑtɛ nɑ Ɩsɛɣɛlɩ nɑ́ɑ́ pəsɩ Tɑcɑɑ tɛtʋ. 3 Teŋku nɑ́-wɛ́ nɑ ɩ́lɛ́ ɩ se. Yɑɑtɑnɩ pɔɣɔ nɑ́ məlɑ wɑɑlɩ wɑɑlɩ. 4 Ɩlɛnɑ pɔɔŋ ŋmɑɑ ɩsɩɩ ɩwɑɑŋ, nɑ pulɑsɩ nɑ́ɑ́ ŋmɑɑ ɩsɩɩ ɩwɛɛsɩ. 5 Teŋku, n seeki suwe? Yɑɑtɑnɩ, nɑ́ mələɣɩ wɑɑlɩ wɑɑlɩ suwe? 6 Pɔɔŋ, mə ŋmɑɑkɩ ɩsɩɩ ɩwɑɑŋ suwe? Pulɑsɩ, mə ŋmɑɑkɩ ɩsɩɩ ɩwɛɛsɩ suwe? 7 Tɛtʋ nyɑ́ɑ́ sele Tɑcɑɑ ɩsɛntɑɑ. Sele Yɑkɔpʋ Ɩsɔ ɩsɛntɑɑ. 8 Ɩnɩ ɩ pəsəɣənɑ kʋkpɑmʋɣʋ kɛ lɩɩlɛ, nɑ pɩɩʋ kɛ lʋm sɛɛlʋ.