KÖLFEL 124

¹ Chon Israel repwe apasa, “Are ewe Samol mi Lapalap esap nom rech,

² are ewe Samol mi Lapalap esap nom rech, lupwen aramas ra maun ngenikich,

³ repwe oromanauekichela lon ar song mi watte ngenikich.

⁴ Iwe, ewe lölö epwe pwölükichela, ewe öütöüt epwe purikichela,

⁵ nge nonoon ekewe koluk repwe pwölükichela.

⁶ Sipwe mwareiti ewe Samol mi Lapalap, pun esap mwüt ngeni chon oputakich pwe repwe arosakichela.

⁷ Sa tiwela usun eman machang a tiwela seni ewe sär, ewe chon sär a soni. Ewe sär a mwü, nge kich sa tiwela.

⁸ Alilisich a feito seni ewe Samol mi Lapalap, ewe mi föri läng me fanüfan.