Diyona 2

1 Diyona mate hama laêilaêi bogana yai na ya lauêuêula lau ena Yaubada lisina. Iyen, 2 Egu Guyau, egu kamkamna te ganahewana yai E anêeta laowa lisim; na egu anêeta wa atahiyen. Aba peêi nuêuna yai E anêetaim. 3 Um em nuwatuhu yai, be sa lofe lidiyegu gabogabo ipuêipuna wananahana yai. Be gabogabo ya fuigu yo bagodu sa laoma hewagu yai sa lau. 4 Nuwagu yai yawa, Nuwana haêa u êwaiyoêoêegu, be ibege ya lobahim. Be nuwagu mate ya mode wananaha; paêana em Dubu Tabuna Yelusalem yai, ibege ya ita fuyoi. 5 Gabogabo ya eli buluhi wananahaigu. Gabogabo hawahawadi kulugu sa fakou buluhi. 6 Gabogabo ganahewana yai, tuêa edi aba susu fatubu. Amainiya sa gudu buluhigu. In moho, um Yaubada egu Guyau aba peêi yai wa fafuyoguma. 7 Yaubada, amnagu E atahi mate haba E peêi, yo fede E anêeta laowa lebem, na em aba miya yai egu lauêuêula wa atahiyen. 8 Be yaubada bwalabwala lisidi yai, tau laulauêuêula lau dodogadi mate, loholoho lisim yai sa êwaiyoêoêen. 9 In moho, yau haba E fadebasaem; nuwam aba faloholohona haba E felem; be E angwala mate, somo wa fatalahagu haba E ginauli, Mwahuli Edaêedana esega um! 10 Debana yai, Yaubada ya liba be hama ya lau Diyona ya fula afulen fote yai.