Paisowa 17

1 Paulo yo Sailasi sa lau Amfipoli yo Apoloniya duhu laêidi yai, be sa lau Tesalonika. Amainiya mate Diusi edi aba oiêoigogo lumana hesa. 2 Paulo in haêa ena kamani, ya lau Diusi edi aba oiêoigogo lumana. Sabati Lahaidi faihona dodoga ma afa haidadi Buka Tabuna libadi amainiya sa liba faneganegadi, 3 yo ya fawananaha bukana yai ni, mate Keliso bena ya ankamkamna yo ya mwahuli fuyo. Ya falibadi, iyen, Yesu wasana E guguyaêen lisimiu yai te, mate In Keliso yo In Fasinabo Dogana. 4 Diusi hahaisa, yo wawahin fafahesadi yo Giliki dodogadi safalumadi Yaubada sa fafadebasae nuwadi ya abidi, be in yo Sailasi ma afa haidadi sa laoma esega. 5 In moho, Diusi dodogadi haisa sa nuwa elaêela, yo fede, dodoga inono heyaheyayadi maketi yai sa abi gogoidima, be maêedi adi sana na taon dodogadi sa eli fasifasinadi, be doga hesa hesana Deisen ena luma sa tulufi. Paulo yo Sailasi sa yoêoidi, bena sa aule fakalamahanodima dodoga lisidi. 6 Sa yoêo asahaidi, yo fede Deisen yo tau kawawananaha haisa sa solu kwakikwakidi be sa lawedi taon babaêisadi lisidi na sa sagasagali tiyen, Dodogadi ni, pilipili sa laulau ginauli nuêu mahudoêina yai! Na aho ite, sa laoma amaiteêi, laulauna hinaga doha. 7 Deisen ya famiyadi ena luma yai na mahudoêidi mate Loma Nuêuna edi Kin, Sisa, ena laugagayo sa moêa peiyen, yo sa libaliba tiyen, Kin hesa, mate hesana Yesu. 8 Liba te sa atahi mate dodoga boludi yo taon babadadi sa fanuwa halahaladi. 9 Babada wa sa liba be Deisen ma afa haidana sa sadidi, habahim sa biya afuledi. 10 Ya iêipa lau yo fede tau kawawananaha Paulo yo Sailasi sa duidi sa lau Beleya. Sa mahano lau, mate sa lau Diusi edi aba oiêoigogo lumana yai. 11 Beleya dodogadi nuwadi sa tasoêe, hige doha Tesalonika dodogadi, paêana fuyanna yai ni liba sa atahi mate sa fanuha wananaha. Fuya ouêouli Uliêuli Tabudi sa laulau fadosinidi, be haba sa siba mate, wananaha. 12 Diusi boludi, Giliki wawahindi fafahesadi yo Giliki tataudi boludi, somo Paulo ya lauguguyaêen, sa kawawananahaêen. 13 In moho, Diusi dodogadi Tesalonika yai sa miyamiya, sa atahi mate Beleya nuêuna yai, Paulo Yaubada ena liba ya lauguguyaêen, be sa lau amainiya hinaga, be dodoga pwaludi sa eli fasifasinadi. 14 Tau kawawananaha, Paulo sa dui lawen gelegele, na Sailasi yo Timoti sa miya Beleya yai. 15 Amainiya, salumadi Paulo sa fatau saguwen, be sa lau Atensi. Habahim, Paulo ya fafalibadi, iyen, Ami fuyo mate, Sailasi yo Timoti au falibadi, be feula ti laoma lisigu! 16 Paulo, Atensi nuêuna yai Sailasi yo Timoti ya bagibagiyedi. Taonna ya ita mate oitau sa mohafu, be nuwana hige i loholoho. 17 Yo fede, Paulo ma afa haidana Diusi dodogadi yo Giliki dodogadi salumadi Yaubada tau êwasaêwasabuwenna ena liba sa fafadosidi, ai aba oiêoigogo lumana yo fuya haisadi saluma ya lobahidi ai maketi mate hinaga maidana sa libaliba. 18 Dodoga haisa, edi pele hesadi: Epikule yo Sitowiko, mate sibasiba tau lau faêataenna maêedi Paulo sa faibayaho. Haisa sa fafatiêo fuyoêidi, tiyen, Doga ni, somo bena ya libaen? Ena liba mate, kufana! Haisa tiyen, Nuwana, taêowawa edi yaubada hahaisa i libalibaedi. Sa liba doha paêana Paulo mate, Yesu yo ena obiyo fuyo wasana loholohona ya lauguguyaêen. 19 Paulo sa foya lawen, Alepagusi Piuna yai be amainiya edi oigogo ganahewana yai, sa faliba, tiyen, Lau faêata fwaufwauna wa lau faêataen te, somo? êE fanuha bena êe siba. 20 Ginauli haisa wa libaedi mate êe fakaudi be êe fanuha bena aniyodi êe sibaidi. 21 (Atensi yo taêowawa dodogadi amainiya sa gogogogo mate, ginauli fwaufwaudi moho, sa atahiyedi yo sa libalibaedi. Ginaulidi te, lebedi yai edi fuya sa pei na hige somo hesa lisina yai.) 22 Habahim, Paulo ya obiyo be Alepagusi Konisela nuwanuwadi yai, iyen, Umi Atensi dodogamiu! E itamiu mate ma nuwa ofifahimiu emi yaubada ami fadebasaedi, laulau hudohudoêi yai. 23 Emi nuêu E fafataêiêili, na emi aba fafadebasae nuêudi E mainene komakomanidi, na aba antalasam hudoêi E ita, sa uli tiyen, “Yaubada Hesa Hige ta Sibai, Enehena.” Logena, somo ami fafadebasae, na hige au sibai mate, haba E falibamiu: 24 Yaubada, tanohi tau ginaulina yo ginauli mahudoêina ganahewana yai ya ginaulidi, mate In Galewa yo Tanoêubu Guyauna. In moho, dubu dodoga nimadi yai sa ginaulidi mate, hige lisidi yai i gogogo. 25 Dodoga hige gonowana somo Yaubada enehena ti ginauli e ti felen paêana ibege i kuêu. In iyabona mwahuli, yawasi yo ginauli mahudoêina, dodoga mahudoêidi ya feledi. 26 Doga esega debana yai, doga nene hesa - hesa ya ginaulidi, be tanoêubu mahudoêina sa miyai. Edi lahai ya nonohai yo edi tanohi sigasigadi ya toledi. (Aba Fatubu 2) 27 Yaubada ya ginauli doha ite, be haba dodoga sa yoêoi yo sa anpate adidili be gonowana haba ti lobahi. Paêana Yaubada hige edaêeda lofalofa yai, ita esega - esega sadaida yai. 28 Doha uliêuli hesa ya libaen iyen, “In lisina yai te mwahumwahuli, te mwahiu yo te famala tau wananaha.” Doha hinaga lili tau laulau uli haisa sa uli tiyen, “Ita hinaga laulauwewena." 29 Logena, ibe ita Yaubada laulauwewena. Tabu Yaubada ta nuwatuhui bena In doha oitau dodoga edi sonoga yai sa ginauli: gole, siluba e umeêehu yai. 30 Fuyanna dodoga Yaubada sa fakafakau mate, hige i fagiludi, Na aho te, iyebom, “Dodoga mahudoêimiu nuêu ouêouli yai te, bena ami nuwabui!” (Paisowa 14:16; Loma 2:14-16) 31 Yaubada lahai haêa ya nonohai ai lisina haba ena Fasinabo Dogana tanoêubu mahudoêina ya fakasa ma dudulaina. Yesu peêi yai ya faêobiyo fuyoi mate, in ena fawananaha, dodoga mahudoêidi lebedi yai. 32 Fuyana mwahuli fuyo libana sa atahi mate, haisa sa liuliuhwaêen. Na haisa tiyen, Ai êe fanuha bena em liba ni êe atahi fuyoi. 33 Yo fede pwaludi yai Paulo ya lau afuledi. 34 Tatau fisa sa famala Paulo tau famuli watanina yo Yesu sa kawawananahaêen. Ganahewadi yai mate: Daiyonisi, in mate Alepagusi dogana hesa laêilaêina, yo hinaga waihin hesa hesana Damalisi, yo dodoga haisa.