ZABURA 99

SIM

¹ Dikiri tɛn kí ble, burinↄ luka, à vutɛna kɛrubunↄ dagura, andunia yĩgã

² Dikirin zↄ̃kↄ̃ Zaiↄ̃, à de buri sĩnda pínkila.

³ Ò a tↄ́ zↄ̃kↄ̃ à naaside bo, à kú adona.

⁴ Kína pì gbãna vĩ, à ye yãzɛdei, àkũ mɛ́ à yãkpatɛkɛna a zɛ́aa dà, à yã gↄ̃̀gↄ̃ Yakubu burinↄnɛ a zɛ́a.

⁵ À Dikiri ó Luda tↄ́ sɛ́ lei, à kútɛ a tìntin arɛ, à kú adona.

⁶ Musa kũ Harunao kú a gbàgbarinↄ tɛ́, Samuɛlimɛ a sìsirinↄ doke ũ, ò a sìsi, akũ à wèḿma.

⁷ Zaa tɛ́luku gũnn à yã òńnɛ, ò a doka kũ a yãdannɛnanↄ kũna.

⁸ Dikiri ó Luda, n weḿma, mↄkↄ̃mmɛ Luda kũ àdi ń taari kɛ̃ḿma ũ, bee kũ abireo n ń yã vãninↄ wì ń musu.

⁹ À Dikiri ó Luda tↄ́ sɛ́ lei, à donyĩ kɛnɛ a kpi kũ à kú adona musu, zaakũ Dikiri ó Luda kú adona.