ZABURA 91

SIM

¹ Gbɛ̃ kũ à utɛna Luda Musude ↄĩ nigↄ̃ kú Gbãnasĩndapinkide uraai.

² Ani pi Dikirimɛ a zɛki gbãna ũ, a Ludamɛ a utɛki ũ, á a náani vĩ.

³ Àkũ mɛ́ ani n sí kariia, ani n sura ba kũ gagagyão.

⁴ Ani n sↄtↄ a pↄtɛn, ĩnigↄ̃ utɛna a orun, a náanikɛna mɛ́ ani n dãkpã lán sɛ̃gbako bà.

⁵ Gwãani karinↄ kũ fãnantɛ̃ kà vĩnlanↄ ń ke vĩna ni n kũro,

⁶ ke gagagyã kũ àdigↄ̃ tɛ́ gusiran ke gyãgɛ̃wɛ̃tɛ kũ àdi ń le fãnantɛ̃ gbãna.

⁷ Bee tó gbɛ̃nↄn wàa sↄↄro tɛn lɛ́tɛ n sarɛ, ke gbɛ̃nↄn dúbu kuri tɛn ga n ↄplai, pↄ́ke ni n lero.

⁸ Ĩni wɛ́ sɛ́ ǹ gwa, ĩni e lákũ òdi wɛ́ tã yãvãnikɛrinↄa nà.

⁹ Tó n Luda Musude kɛ̀ n utɛki ũ, tó n Dikiri kɛ̀ n kúki ũ,

¹⁰ yã vãni ke ni n lero, kisira ni gɛ̃ n ↄnnlo.

¹¹ Zaakũ ani n yã o a malaikanↄnɛ, de ò n dãkpã gu kũ ntɛn gɛ́n pínki.

¹² Oni n sɛ́ ń ↄĩ de ǹsun gɛ̃̀ sí gbɛ̀ɛaro yãi.

¹³ Ĩni gɛ̀sɛ zɛ músuua kũ káreo, ĩni gɛ̀sɛ pɛ́tɛpɛtɛ sàbooa kũ pitikoo.

¹⁴ Dikiri pì: Zaakũ à nàmai, mani a bo, zaakũ à ma dↄ̃, mani ↄ kúa.

¹⁵ Ani ma sísi, mani wea, tó yã nàkaraa, manigↄ̃ kú kãao, mani a sura ba mà a kpe ta.

¹⁶ Mani a pↄ kɛ nna kũ wɛ̃̀ndi gbã̀nao, mani tó à e lákũ madì gbɛ̃ sura ba nà.