ZABURA 90

¹ Dikiri, ó utɛkimɛ n ũ wɛ̃̀ kũ wɛ̃̀ɛo.

² De ń kpɛ́ ǹ kpinↄ kɛ, de ń kpɛ́ ǹ zĩtɛ kũ anduniao kátɛ, Ludamɛ n ũ zaa káaku ari gↄrↄ sĩnda pínki.

³ N dìtɛ kũ bisãsiri ɛra zĩtɛ, ndì pińnɛ ò ɛra bùsun.

⁴ Wɛ̃̀ wàa sↄↄro dennɛ lán gↄrↄ do bà, à dennɛ lán gĩa ke gwãani zaka bà.

⁵ Ndì bisãsiri sɛ́ kũ ga'io, ò de lán sɛ̃̀ yĩda bà kↄnkↄ.

⁶ Àdi butɛ kↄnkↄ à gbã, àdi yitoro kũ ↄkↄsi à kori kɛ.

⁷ N pↄfɛ̃ dì ó kakatɛ, n patammanaa dì swɛ̃̀ kɛ̃ógu.

⁸ Ó yã vãninↄn katɛna n arɛ, ó asiriyãnↄ bò gupuran n kùru.

⁹ Ó gↄrↄ dì gɛ̃tɛ n pɛ̃tɛ̃ yãi, ó wɛ̃̀ndii dì láka kũ ndanaao.

¹⁰ Ó wɛ̃̀ɛ dì ká baaakↄ̃ akuri, tó ó gbãna sↄ̃, basiikↄ̃. Wari kũ pↄsiraoon wɛ̃̀ɛ pìnↄ dì suowɛrɛ, òdi gɛ̃tɛ likalika, akũ odì kpágui.

¹¹ Dí mɛ́ à n pↄfɛ̃ gbãna lɛ́ dↄ̃ↄ? n pɛ̃tɛ̃ zↄ̃kↄ̃ↄ kà vĩna kũ à de ò kɛnnɛ ũ.

¹² Ǹ dadawɛrɛ ògↄ̃ ó wɛ̃̀ndi kutukɛ lɛ́ dↄ̃, de ò ↄ̃ndↄ̃ le ó swɛ̃̀ɛ gũn.

¹³ Dikiri, bↄrɛn ĩni n pↄfɛ̃ kpátɛɛ? Ǹ n zↄ̀blerinↄ wɛ̃nda gwa.

¹⁴ Ǹ tó n gbɛ̃kɛ suwá lákũ gu dìgↄ̃ dↄ nà, de ògↄ̃ pↄnna kɛ kũ ayuwiikɛnaao ari ó gↄrↄ lɛ́n.

¹⁵ Ǹ ó pↄ kɛ nna ↄ kũ n tↄ̃̀wá gↄrↄ lɛ́n, wari kũ o kɛ̀ wɛ̃̀ lɛ́n.

¹⁶ Ǹ n yãkɛnanↄ mↄ ókↄ̃nↄ n zↄ̀blerinↄnɛ, ǹ tó ó nɛ́nↄ n gbãna gakuri dↄ̃.

¹⁷ Dikiri ó Luda, ǹ tó ò n pↄnna le, ǹ tó ó zĩ àre le, ee, ǹ tó ó zĩ àre le.