ZABURA 81

¹ À ayuwii kɛ Luda ó gbãnaa, à pↄnna wiki lɛ́ Yakubu burinↄ Ludaa.

² À lɛ̀ dↄ à bata lɛ́ kũ mↄrↄ'ũ nnao kũ gidigboo.

³ À kuru pɛ́ mↄ dufu bonaao, à pɛ́ tó mↄ kɛ̀ papana ó dikpɛgↄrↄ,

⁴ zaakũ à de doka ũ Isarailanↄnɛmɛ, yã kũ Yakubu burinↄ Luda dìtɛn gwe.

⁵ À yã pìi dà Yusufu burinↄnɛ gↄrↄ kũ à vĩ̀ Misila bùsula. Ò kòto kũ ò dↄ̃ro mà à pì:

⁶ Ma aso gò á gã̀aa, ma á ↄ bò ɛ̃bona zĩn.

⁷ A ↄ́ↄ dↄ̀mɛnɛ warikɛgↄrↄa, akũ ma á bó, ma weáwa zaa legũvĩnaa gũn, ma á lɛ́ ma á gwá zaa Mɛriba í kĩnaa.

⁸ À sã kpá ma gbɛ̃nↄ, mani lɛ́ daáwa, ákↄ̃nↄ Isarailanↄ, tó áni ma yã ma dé!

⁹ Àsungↄ̃ buri zĩ̀tↄnↄ tãna vĩ á tɛ́ro, àsun kútɛ dikiri pãndenɛro.

¹⁰ Makũmɛ Dikiri á Luda ũ, ma á bↄ́tɛ Misila. À á lɛ́ wɛ̃, mani tó à kã.

¹¹ Ama Isarailanↄ gì ma yã mai, ma gbɛ̃ pìnↄ dí mì natɛmɛnɛro.

¹² Akũ ma ń tó kũ ń sãgbãnakɛo, ò tɛ́ ń zĩda pↄyeinaai.

¹³ Tó ò pi Isarailanↄ ni ma yã ma, tó ma gbɛ̃nↄn tɛ́ ma yãi,

¹⁴ de mani ń ibɛrɛnↄ sↄ̃pɛtɛ gↄ̃̀nↄgↄ̃nↄ, mani ↄ sↄ̃ ń zãngurinↄi.

¹⁵ Ma zãngurinↄ ni kã natɛ ma arɛ, ń wɛ́tãmmana nigↄ̃ lakana vĩro.

¹⁶ Gbasa mà á gwa kũ pↄ́blewɛ manao, mà ɛra mà gbɛ̀ zↄ́'i kpááwa à mↄ́awa.