ZABURA 80
SIM1 Ǹ sã kpá, Isarailanↄ Don'arɛde, mↄkↄ̃n kũ ndì Yusufu burinↄ dã lán sã bà. Ǹ bo ǹ mↄ́, mↄkↄ̃n kũ ń vutɛna kɛrubunↄ dagura,
2 ǹ do Ɛflaimu burinↄnɛ arɛ kũ Biliaminu burinↄ kũ Manase burinↄ. Ǹ futɛ kũ n gbãnao, ǹ mↄ́ ǹ ó sura ba!
3 Luda, ǹ tó ò ɛra ò su ó gwena zĩn, ǹ ãn werewá, ń ó sura ba.
4 Dikiri Luda Zĩ̀karide, ĩni fɛ̃ ǹ gí n gbɛ̃nↄ aduakɛna síi ari bↄrɛmɛɛ?
5 N wɛ́'i dↄ̀ńnɛ ń pↄ́mina ũ, n ń wɛ́'i yↄ̃̀ńnɛ a pↄ́ pà, ò mì.
6 N tò o gↄ̃ fobona pↄ́ ũ ó sarɛdenↄnɛ, ó ibɛrɛɛnↄ tɛni ó lalandi kɛ.
7 Luda Zĩ̀karide, ǹ tó ò su ó gwena zĩn, ǹ ãn werewá ń ò sura ba.
8 N geepi lí wò Misila, n pɛ burinↄa, akũ n lí pìi pɛ̀ ń gbɛ̀n.
9 N gu kɛ̀kɛnɛ à zĩni pɛ̀tɛ, akũ à ↄ tà à gu sì.
10 A uraa dà kpinↄla, a gã̀nↄ de sida lí zↄ̃kↄ̃nↄla.
11 À ↄ tà à gɛ̀ɛ ari ísira lɛ́a, a ↄnɛnↄ kà ari Yuflati.
12 Bↄ́yãin n a karaa gbòro de gbɛ̃ kũ òtɛn gɛ̃tɛnↄ gↄ̃ ↄ mátɛ a nɛ́ii?
13 Sàkpanↄ dì lɛ́ kái ò bi, nↄ̀bↄsɛ̃ntɛnↄ dì su ò a lá ble.
14 N yã nna! Luda Zĩ̀karide, ǹ ɛra ǹ arɛ dↄwá! Zaa musu ǹ wɛ́ kpátɛ ǹ gwa! Ǹ laakari dↄ geepi lí día,
15 pↄ́ kũ n pɛ̀ kũ n ↄplao, nɛ́ kũ n tùtuu kɛ̀ n zĩdanɛɛ.
16 Ò n geepi lí pìi zↄ̃̀ ò tɛ́ sↄ̃̀a, ǹ wɛ́ tɛ̃ra pitiḿma de ò kakatɛ.
17 Ǹ ↄ kú gbɛ̃ kũ à kú n ↄplaiia, bisãsiri nɛ́ kũ n sɛ̀ n pↄ́ ũ pìi,
18 óni kɛ̃mma doro. Ǹ ó kunna kɛkɛ ǹ kɛwɛrɛ, óni n sísi.
19 Dikiri Luda Zĩ̀karide, ǹ tó ò su ó gwena zĩn, ǹ ãn werewá ń ó sura ba.