ZABURA 49
SIM1 Buri sĩnda pínki, à yã díkĩna ma, andunia pínki, à sã kpá,
2 kínanↄ kũ talakanↄ, aruzɛkɛdenↄ kũ takasidenↄ á pínki.
3 Ɔ̃ndↄ̃yã kú ma lɛ́n, dↄ̃na kú ma swɛ̃̀n.
4 Mani sã dↄ yáasi yãi mà a bↄkↄtɛ kɛ kũ mↄrↄlɛnaao.
5 Mani vĩna kɛ yã pãsĩ gↄrↄnɛro, bee tó ma zãngurinↄ likanamai.
6 Ò ń aruzɛkɛ náani vĩ, òdi ń ↄgↄda ĩa dã.
7 Gbɛ̃ke ni fↄ̃ à gí a gbɛ̃dakenɛ ga kũ ani gairo, ani le à pↄ́ke kpá Ludaa à a wɛ̃̀ndi booro.
8 Zaakũ gbɛ̃ wɛ̃̀ndi bona zĩ'ũ, aruzɛkɛ ni fↄ̃ à bo zikiro.
9 Ani fↄ̃ à tó àgↄ̃ kun gↄrↄ sĩnda pínkiro, ani fↄ̃ à gínɛ àsun wɛ́ kɛ pla kũ gyãwãnworo.
10 Zaakũ ò dↄ̃ kũ bee ↄ̃ndↄ̃rinↄ dì ga, mìsaridenↄ kũ yↄ̃nkↄnↄ dì mì dɛ lɛ se, òdi ń aruzɛkɛ tó gbɛ̃ pãndenↄnɛ.
11 Bee kũ ò ń tↄ́nↄ kpà bùsunↄnɛ yã, ń mira nigↄ̃ de ń bɛ ũmɛ gↄrↄ sĩnda pínki, anigↄ̃ ń kúki ũ ari ń buria.
12 Bisãsiri kũ a bɛ̀ɛrɛkɛo dìgↄ̃ kun gↄrↄ sĩnda pínkiro, ani kakatɛ lán nↄ̀bↄnↄ bàmɛ.
13 Mìsaridenↄ lakanaan gwe, lɛmɛ à de lɛ dↄ kũ gbɛ̃ kũ ò tɛ́ ń ágbainↄ.
14 Oni si gyãwãnn lán sãnↄ bà, ga mɛ́ anigↄ̃ de ń dã̀ri ũ, gbɛ̃ mananↄ ni kí bleḿma gudↄo. Ń mɛ̀nↄ ni yagi kũ miran, gyãwãn mɛ́ anigↄ̃ de ń bɛ ũ.
15 Ama Luda ni ma wɛ̃̀ndi sí gyãwãnnwa à gbãnakɛ kpámai.
16 Tó gbɛ̃ tɛn gↄ̃ aruzɛkɛde ũ akũsↄ̃ a bɛ tↄ́ tɛn bo nna, ǹsun tó à kɛnnɛ yãke ũro,
17 zaakũ ani le à pↄ́ke sɛ́ à táo a gagↄrↄro, a aruzɛkɛnↄ ni bo tɛ́iro.
18 Bee tó à a zĩda dↄ̃̀ arubarikade ũ a wɛ̃̀ndi gↄrↄ akũsↄ̃ ò a sáabu kpà a nnamana yãi,
19 ani ká a dizinↄlamɛ, ani wɛ́ kɛ pla kũ gupurao ziki doro.
20 Bisãsiri kũ a bɛ̀ɛrɛkɛo, tó a wɛ́ dí kɛ̃ro, ani gɛ̃tɛ lán nↄ̀bↄnↄ bàmɛ.