ZABURA 25
SIM1 Dikiri, ma a swɛ̃̀ɛ kpàmma,
2 Ma Luda, matɛni n náani kɛ, ǹsun tó wé'i ma kũro, ǹsun tó ma ibɛrɛnↄ ma nɛro.
3 Wé'i ni gbɛ̃ kũ ò wɛ́ dↄnyĩnↄ kũ zikiro, sé gbɛ̃ kũ ò bò n kpɛ sèeda ke sarinↄ.
4 Dikiri, ǹ n zɛ́ mↄmɛnɛ, ǹ n yã dadamɛnɛ.
5 Ǹ ma da n yãpura zɛ́n, ǹ a yã dadamɛnɛ, zaakũ Luda ma surabariimɛ n ũ, ma wɛ́ dìgↄ̃ dↄnyĩmɛ gↄrↄ sĩnda pínki.
6 N wɛ̃nda kũ n yenyĩo gↄ̃ dↄngu, zaakũ abirekũnↄ kú kũnwo zaa zĩ, Dikiri.
7 Ǹsun taari kũ ma kɛ̀nↄ yã daro ke durunna kũ ma kɛ̀ ma kɛfɛnnakɛgↄrↄanↄ. Ǹ tó ma yã gↄ̃ dↄngu yenyĩ gũn, kũ ń mana yãi, Dikiri.
8 Dikiri mana, àdi yã kɛ a zɛ́a, abire yãi àdi a yã dada durunnakɛrinↄnɛ.
9 Àdi zĩdabusarinↄ da a zɛ́a, àdi yã mana dadańnɛ.
10 Dikiri dìgↄ̃ yenyĩ kũ náanio vĩ kũ gbɛ̃ kũ ò a bàka kunna kũńwo yã kũnanↄ.
11 Bee kũ ma durunna zↄ̃kↄ̃ Dikiri, ǹ kɛ̃ma n tↄ́bona yãi.
12 Dí mɛ́ à Dikiri vĩna vĩi? Dikiri dì ade da zɛ́ kũ à de à sɛ́a.
13 Ade nigↄ̃ kú nnamanaa gũn, a burinↄ mɛ́ onigↄ̃ ń bùsu vĩ.
14 Dikiri nna kũ a vĩnakɛrinↄ, àdi tó ògↄ̃ a bàka kunna kũńwo yã dↄ̃.
15 Ma wɛ́ dìgↄ̃ dↄ Dikiria baala'i, àkũ mɛ́ àdi ma gbá bo bàn.
16 Ǹ arɛ dↄma, ń ma wɛ̃nda gwa, zaakũ má kú mado wɛ́tãmma gũn.
17 Ma yã'ũmmananↄ kàra ma nɛ̀sɛɛ gũn, ǹ ma bo ma wari pìn.
18 Ǹ ma wɛ́tãmma kũ ma pↄsirao gwa, ǹ ma durunnanↄ kɛ̃ma pínki.
19 Ǹ gwa lákũ ma ibɛrɛnↄ dàgula nà, ò zã̀magu pãsĩpãsĩ.
20 Ǹ ma wɛ̃̀ndi dãkpã, ń ma sura ba, ǹsun tó wé'i ma kũro, zaakũ ma nanyĩ.
21 Ǹ tó yãpura kũ kunna manao gↄ̃ ma dãkpã, zaakũ ma wɛ́ dìgↄ̃ dↄnyĩ.
22 Luda, ǹ Isarailanↄ bo ń warikɛnanↄn pínki.