ZABURA 19

SIM

¹ Musu dì Luda gakuri bo gupuraa, sarapurapↄnↄ dì a ↄzĩ mↄńnɛ.

² Àdigↄ̃ yã o'ońnɛ lán gu dìgↄ̃ dↄ nà, àdi dↄ̃na kpáńnɛ gwãani kũ gwãanio.

³ Àdi yã oro, a yã'ona buri ke kunlo, òdi a kĩni maro.

⁴ A kòtoo dì da anduniala pínki, a yã'onaa dì gɛ́ ari zĩtɛ lɛ́a. Luda kpɛ́ bò ifãntɛ̃nɛ gwe,

⁵ àdi bo kpɛ́n à futɛ lán nↄsɛrii bà, àdi futɛ táo kũ pↄnnao lán gↄ̃sa gbãna bà.

⁶ Àdi futɛ ludambɛlɛa la, àdi bikũ à gɛ́ ari a lɛ́a dire, pↄ́ke dìgↄ̃ utɛna a puusuiro.

⁷ Dikiri doka papana, àdi ń kunna kɛkɛ à kɛńnɛ dↄ. Dikiri yã náani vĩ, àdi lɛ́ da ↄ̃ndↄ̃saridenↄa.

⁸ Dikiri dì ↄdↄki dↄńnɛ súsu, àdi ń pↄ kɛ nna. Dikiri yãditɛnanↄn gbãsĩ vĩro, àdi ń ãn wereńnɛ.

⁹ Mìnatɛna Dikirinɛ zɛ́ pì wɛ́bona, onigↄ̃ tɛ́i gↄrↄ sĩnda pínki, Dikiri yãkpatɛkɛna yãpura vĩ, àdigↄ̃ mana swáswa.

¹⁰ A mana de wurala, bee wura mana, a nna de zↄ́'ila, bee zↄ́ búsu.

¹¹ Abire musu ndì lɛ́ da makũ n zↄ̀bleriia, gbɛ̃ kũ à n yã kũnaa àree dìgↄ̃ zↄ̃kↄ̃.

¹² Dí mɛ́ ani fↄ̃ à yã kũ à zã̀anↄ dↄ̃ↄ? Ǹ sùru kɛ kũmao kũ ma taari kũ ò utɛnanↄ.

¹³ Ǹsun tó makũ n zↄ̀bleri taari kɛnnɛ gbĩnigbĩniro, ǹsun tó durunnanↄ kí blemaro, manigↄ̃ kun swáswa taari zↄ̃kↄ̃ sari.

¹⁴ Ǹ tó yã kũ àtɛn bo ma lɛ́n kángu kũ laasun kũ à kú ma swɛ̃̀ɛ gũnwo, Dikiri, ma gbɛ̀si, ma surabarii.