ZABURA 145
SIM1 Mani n táaki lɛ́, ma Luda ma Kína, manigↄ̃ n tↄ́ bo gↄrↄ sĩnda pínki.
2 Manigↄ̃ n sáabu kpá lákũ gu dìgↄ̃ dↄ nà, manigↄ̃ n táaki lɛ́ lakanaa sari.
3 Dikiri zↄ̃kↄ̃, à kà ò a táaki lɛ́, a zↄ̃kↄ̃kɛ lɛ́ vĩro.
4 Kpàinↄ ni n yãkɛnanↄ sáabu kpá Wurenↄnɛ, oni n yãzↄ̃kↄ̃kɛnanↄ kpàkpa kɛ.
5 Oni n manakɛ zↄ̃kↄ̃ gakuride yã o, mani n yãbonsarɛkɛnanↄ laasun lɛ́.
6 Oni n yãkɛna naasi gbãna yã o, mani n zↄ̃kↄ̃kɛ gadi kɛńnɛ.
7 Oni n manakɛ zↄ̃kↄ̃ baaru kpá, oni ayuwii kɛ n yãzɛdekɛnanↄ yãi.
8 Dikiri sùru vĩ kũ wɛ̃ndao, àdi pↄ fɛ̃ likaro, à gbɛ̃kɛ vĩ zↄ̃kↄ̃.
9 Dikiri dì yã mana kɛ gbɛ̃ sĩnda pínkinɛ, àdi a pↄ́ kũ à kɛ̀nↄ wɛ̃nda gwa ń pínki.
10 Pↄ́ kũ n kɛ̀nↄ ni n sáabu kpá ń pínki, n yãmarinↄ ni n tↄ́ sɛ́ lei, Dikiri.
11 Oni n kpata gakuri gadi kɛ, oni n iko gbãna yã o,
12 de gbɛ̃ sĩnda pínki n yãzↄ̃kↄ̃kɛnanↄ dↄ̃ kũ n kpata mana gakuride yão.
13 N kpata bi kpata lakanasarimɛ, ĩnigↄ̃ de kína ũ ari ó buria. Dikirin náani vĩ yã kũ à ò musu pínki, à sùru vĩ kũ pↄ́ kũ à kɛ̀nↄ ń pínki.
14 Dikiri dì gbɛ̃ kũ òtɛn lɛ́tɛnↄ kũ, àdi gbɛ̃ kũ wari tↄ̃̀ḿmanↄ futɛ.
15 Pↄ́ sĩnda pínki wɛ́ dↄnyĩ, ndì pↄ́ble kpáḿma a gↄrↄa.
16 Ndì ↄ porońnɛ pↄ́ mↄ́ḿma, ndì pↄ́ sĩnda pínki pↄyeina bↄkↄtɛnɛ.
17 Dikiri yãkɛnanↄn mana pínki, à gbɛ̃kɛ vĩ a yã sĩnda pínki kɛnaa gũn.
18 Dikiri kãni kũ a sìsirinↄ ń pínki, gbɛ̃ kũ òdi a sísi kũ yãpuraonↄ.
19 Àdi a vĩnakɛrinↄ pↄyeina bↄkↄtɛńnɛ, àdi ń wikilɛna ma à ń sura ba.
20 Dikiri dì gbɛ̃ kũ ò yeainↄ dãkpã ń pínki, ama ani yãvãnikɛrinↄ kakatɛ.
21 Dikiri táakilɛna nigↄ̃ da ma lɛ́n, pↄ́ sĩnda pínki gↄ̃ a tↄ́ kũ à kú adona bo gↄrↄ sĩnda pínki.