ZABURA 144
SIM1 Arubarikademɛ Dikiri ma gbɛ̀si ũ, àdi zĩ̀kana dadamɛnɛ, àdi ma ↄ tùtu kɛ zĩ̀kana yãi.
2 Àkũmɛ ma utɛki ũ, àdi gbɛ̃kɛ kɛmɛnɛ, à de ma zɛki gbãna ũ, àdi ma sura ba. À de ma sɛ̃ngbako ũ kũ madì nai, àdi tó burinↄ mì natɛmɛnɛ.
3 Dikiri, bↄ́n bisãsiri ũ kũ a yã dìgↄ̃ dↄnguu? Bↄ́n a ũ kũ ndì laakari dↄaa?
4 Bisãsiri de lán kàsa plí bàmɛ, a wɛ̃̀ndii dì gɛ̃tɛ lán uraa bà.
5 Dikiri, ǹ musu natɛ ǹ kipa, ǹ ↄ na kpinↄa de ò túsukpɛ bo.
6 Ǹ tó legũ pí ǹ gbɛ̃nↄ fãkↄ̃a, ǹ kà fã ń tɛ́ ò lɛkↄ̃a.
7 Ǹ ↄ bo zaa musu ǹ ma kũ, ǹ ma bo í zↄ̃kↄ̃ↄ gũn, ǹ ma sí buri zĩ̀tↄnↄa.
8 Ɛ́kɛtona ń lɛ́ pà, òdi ↄ pãtɛ kũ lɛ́pãgbɛ̃naao.
9 Luda, mani lɛ̀ dufu sínnɛ, mani n táaki lɛ́ kũ mↄrↄ bà mɛ̀n kurideo,
10 mↄkↄ̃n kũ ndì tó kínanↄ zĩ̀ ble, ndì n zↄ̀bleri Dauda bo fɛ̃nɛda pãsĩ lɛ́i.
11 Ǹ ma sí ǹ ma bo buri zĩ̀tↄnↄ ↄĩ, ɛ́kɛtona ń lɛ́ pà, òdi ↄ pãtɛ kũ lɛ́pãgbɛ̃naao.
12 Ó nɛ́gↄ̃gbɛ̃nↄ ni futɛ ń kɛfɛnnakɛgↄrↄa lán lí kũ à nna màa bà, ó nɛ́nↄgbɛ̃nↄ gↄ̃ de lán kínabɛ gbɛ̀gba kũ ò zã blèaa bà.
13 Ó dↄ̃̀nↄ ni pa kũ pↄ́ buri sĩnda pínkio. Ó sãnↄ ni kↄ̃ lɛu wàa do, oni ká ũgbangba ó kpàsan.
14 Ó zùnↄ nigↄ̃ de nɛ́randenↄ ũ, nↄ̀bↄtɛna nigↄ̃ kunlo, lagona nigↄ̃ kunlo, wɛ̃nda'ↄ́ↄdↄna nigↄ̃ kú gãnulɛaro.
15 Arubarikadenↄmɛ gbɛ̃ kũ ń kunna de lɛnↄ ũ, arubarikadenↄmɛ gbɛ̃ kũ Dikiri de ń Luda ũnↄ ũ.