ZABURA 107
SIM1 À Dikiri sáabu kɛ, zaakũ à mana, a gbɛ̃kɛ lakana vĩro.
2 Gbɛ̃ kũ Dikiri ń bónↄ o lɛ, gbɛ̃ kũ à ń bó ń ibɛrɛnↄ ↄĩnↄ.
3 Gbɛ̃ kũ à ń bó bùsu kũ bùsuuo à ń kakara bona ifãboki kpa kũ a lɛ́tɛ kpao kũ gugbãnduru kpao kũ gɛ̀nↄmidↄki kpaonↄ.
4 Ń gbɛ̃kenↄ likara zↄ̃̀ gbárannan, odi wɛ̃tɛ kũ oni gɛ́ vutɛn zɛ́ dↄ̃ro.
5 Nà ń dɛ́, ími ń kũ, ǹ wɛ̃̀ndii gↄ̃̀ lɛɛkɛɛ.
6 Akũ ò wiki lɛ̀ Dikiria ń warikɛnan, akũ à ń bó ń wɛ́tɛ̃ra gũn.
7 À ń dá zɛ́ súsun ari ò kà wɛ̃tɛ kũ oni vutɛn.
8 Ò Dikiri sáabu kɛ a gbɛ̃kɛ yãi kũ yãbonsarɛ kũ àdi kɛ gbɛ̃nↄnɛɛo.
9 Zaakũ àdi ímidɛrinↄ kòto yĩda kũńnɛ, àdi pↄ́ mana kpá nàdɛrinↄa ò kã.
10 Ń gbɛ̃kenↄ kú ga gusiran, òtɛn wari kɛ yĩna kũ mↄ̀kakↄ̃anaao.
11 Zaakũ ò gì Luda yã mai, ò Luda Musude lɛ́damma gya bò.
12 À tò ò ń búsa kũ zĩ gbãnao, ò gɛ̃̀ɛ sì ò lɛ̀tɛ, kpanyĩri kunlo.
13 Akũ ò wiki lɛ̀ Dikiria ń warikɛnan, akũ à ń bó ń wɛ́tɛ̃ra gũn.
14 À ń bó ga gusiran, à ń mↄ̀kakↄ̃ananↄ gà à kɛ̃̀kɛ̃.
15 Ò Dikiri sáabu kɛ a gbɛ̃kɛ yãi kũ yãbonsarɛ kũ àdi kɛ gbɛ̃nↄnɛɛo.
16 Zaakũ àdi bĩnilɛ gbà kũ ò pì kũ mↄ̀gotɛ̃oo gboro, àdi mↄ̀si gbãngo zɛ́tatabↄnↄ ɛ́'ɛ.
17 Ń gbɛ̃kenↄ lìkara ń sãgbãna yãi, ò wɛ́tãmma lè ń taarinↄ yãi.
18 Pↄ́ble ni bò ń pↄn, ò kà gana.
19 Akũ ò wiki lɛ̀ Dikiria ń warikɛnan, akũ à ń bó ń wɛ́tɛ̃ra gũn.
20 À a yã zĩ̀ḿma, akũ ò wèrekↄ̃a, à ń bó ga lɛ́i.
21 Ò Dikiri sáabu kɛ a gbɛ̃kɛ yãi kũ yãbonsarɛ kũ àdi kɛ gbɛ̃nↄnɛɛo.
22 Ò kɛnnakũkↄ̃o sa oa, ò a yãkɛnanↄ baba kũ ayuwiikɛnaao.
23 Ń gbɛ̃kenↄ dì ísira musu gó gũn, òtɛn laga tá í zↄ̃kↄ̃la.
24 Ò Dikiri yãkɛnanↄ è, kũ yãbonsarɛ kũ àdi kɛ í daguranↄo.
25 À yã ò, akũ zàga'ĩa gbãna kàka, ísira sↄ̃ à fùtɛ musumusu.
26 Òtɛn futɛ musu, òtɛn su zĩtɛ, ò kú kari lɛ́i, akũ swɛ̃̀ɛ kɛ̃̀ńgu.
27 Gó yĩ̀gãyĩgã kũńwo, ò tàtantatan kɛ̀ lán wɛ̃dɛrii bà, ítɛ'ↄ̃ndↄ̃ sĩnda pínki làkaḿma.
28 Akũ ò wiki lɛ̀ Dikiria ń warikɛnan, akũ à ń bó ń wɛ́tɛ̃ra gũn.
29 À ĩa gbãna zɛ̀, à gↄ̃̀ ĩa fɛɛɛ ũ, à ísↄ̃ kpàtɛ, akũ í zɛ̀ kítikiti.
30 Kũ gu yĩ̀, ń pↄ kɛ̀ nna, akũ à gɛ̀ɛ kũńwo gódↄki kũ òtɛn wɛtɛ kpa.
31 Ò Dikiri sáabu kɛ a gbɛ̃kɛ yãi kũ yãbonsarɛ kũ àdi kɛ gbɛ̃nↄnɛɛo.
32 Ò a tↄ́ bo dasi kↄ̃kakaranaa gũn, ò a táaki lɛ́ don'arɛdenↄ kakaranan.
33 À swa ídenↄ kɛ̀ gbáranna ũ, à tò ísɛ̃bokinↄ gↄ̃̀ gukori ũ.
34 À zĩtɛ arubarikade lì guwiside ũ gbɛ̃ kũ ò vutɛnↄ yãvãnikɛna yãi.
35 À gbáranna lì sɛ̀bɛ ũ, à tò gukori gↄ̃̀ ísɛ̃bokinↄ ũ.
36 À nàdɛrinↄ kàtɛ gwe, akũ ò wɛ̃tɛ kàtɛ ò vùtɛn.
37 Ò burapↄnↄ tↄ̃̀, ò geepi línↄ bà, akũ à nɛ́ ìńnɛ manamana.
38 À arubarikaa dàńgu, ò kɛ̀ dasi manamana, adi tó ń pↄ́kãdenↄ làgoro.
39 Akũ à ń lago dↄ, ò bùsa gbãnamↄnnɛna kũ kisirao kũ pↄsirao yãi.
40 À wé'i dà kínɛnↄa, à tò ò likara zↄ̃̀ gukori zɛ́saride gũn.
41 Ama à wɛ̃ndadenↄ bò takasikɛn à ń sɛ́ lei, à tò ń ↄndenↄ kɛ̀ dasi lán kpàsapↄnↄ bà.
42 Tó gbɛ̃ mananↄ è, òdi pↄnna kɛ, gbɛ̃ vãninↄ sↄ̃ òdi ń lɛ́ nakↄ̃a.
43 Ɔ̃ndↄ̃de laakari dↄ yã pìnↄa, à Dikiri gbɛ̃kɛ gwa lákũ à de nà.