ZABURA 106
SIM1 Aleluya! À Dikiri sáabu kɛ, zaakũ à mana, a gbɛ̃kɛ lakana vĩro.
2 Dí mɛ́ ani fↄ̃ à Dikiri yãzↄ̃kↄ̃kɛnanↄ oo? Dí mɛ́ ani fↄ̃ à a táaki lɛ́ pínkii?
3 Arubarikadenↄn gbɛ̃ kũ òdi yã kɛ a zɛ́anↄ ũ, kũ òdi yã mana kɛ gↄrↄ sĩnda pínki.
4 Tó ntɛni a nna kɛ n gbɛ̃nↄnɛ, ǹ tó ma yã gↄ̃ dↄngu, Dikiri, tó ntɛni ń sura ba, ǹ ma wɛ́ gwa,
5 de ma baka le àgↄ̃ kú n gbɛ̃nↄ nnamanan, mà pↄnna kɛ kũ buri kũ n ń sɛ́nↄo, de mani n táaki lɛ́ n gbɛ̃ pìnↄ tɛ́.
6 O durunna kɛ̀ lán ó dizinↄ bà, o taari kɛ̀ o yã vãni kɛ̀.
7 Kũ ó dizinↄ kú Misila, odi Dikiri daboyãkɛnanↄ yã daro, gbɛ̃kɛyã dasi kũ à kɛ̀ńnɛnↄ sã̀ńgu, akũ ò sãgbãna kɛ̀ Isira Tɛ̃ra sarɛ.
8 Bee kũ abireo à ń sura bà a tↄ́ yãi, de à a gbãna zↄ̃kↄ̃ mↄńnɛ.
9 À kpã̀kɛ̃ Isira Tɛ̃rai, akũ gukori bò, à gɛ̃̀ kũńwo a wɛ̀ɛn, ò bikũ̀ lán ò pi gbárannan bà.
10 À ń bó ń ibɛrɛnↄ ↄĩ, à ń sí ń zãngurinↄ gbãnaa.
11 Í dà ń wɛtɛrinↄla, bee ń gbɛ̃ mɛ̀n do adi boro.
12 Akũ ò a yã kũ à òo sì, ò a táaki lɛ̀.
13 Ama a yãkɛnanↄ sã̀ńgu gↄ̃̀nↄ, akũ odi zɛ de à lɛ́ daḿmaro.
14 Ò pↄ́ble pãnde ni dɛ̀ gbárannan, akũ ò Dikiri lɛ̀ ò gwà sɛ̃̀ntɛ gwe.
15 À pↄ́ kũ ò wɛ́ kɛ̀awa kpàḿma, akũ à mɛ̀'ibabagyã zĩ̀ḿma.
16 Ò gↄ̃ba kpà kũ Musao bùran kũ Haruna kũ à kú adona Dikirinɛɛo.
17 Zĩtɛ pàra à Datani mↄ̀, à nàkↄ̃a Abiramua kũ a gbɛ̃nↄo.
18 Tɛ́ fùtɛ ń ìbanↄ tɛ́, tɛ́vuraa kùtɛ gbɛ̃ vãninↄa à ń blé.
19 Ò mↄ̀ↄ pì zaa Orɛbu lán zùsanɛ bↄ̀rↄↄ bà, ò donyĩ kɛ̀ ń tãna kũ ò pìinɛ.
20 Ò Luda gakuride lilin kɛ̀ kũ zù sɛ̃̀sorii takao.
21 Ò sã̀sã Luda ń surabari yãn, kũ à yã zↄ̃kↄ̃nↄ kɛ̀ńnɛ zaa Misila,
22 kũ à daboyãnↄ kɛ̀ Hamu burinↄ bùsun, kũ à naasiyãnↄ kɛ̀ Isira Tɛ̃ra lɛ́a.
23 Abire yãin à pì áni a gbɛ̃nↄ kakatɛ, akũ Musa kũ à a sɛ̀ɛ kpànɛ, à tò a pↄ kpàtɛ, adi ń kakatɛro.
24 Ò bùsu nide kũ̀ gya bò, ò gì Dikiri yã náani kɛi.
25 Ò yãvunu kà ń bizakutanↄ gũn, odi do Dikiri yãiro.
26 Akũ à ↄ pã̀tɛ à la dàńnɛ à pì, áni tó ò gaga gbárannan,
27 áni tó ń burinↄ gaga burinↄ tɛ́ áni ń fãkↄ̃a bùsunↄ gũn.
28 Ò dò Peo tãnai, ò pↄ́ kũ ò sa òo pↄ́gɛnↄaa blè.
29 Ń yãkɛnanↄ Dikiri pↄ fɛ̃̀, akũ gagagyã gɛ̃̀ńgu.
30 Finɛasi fùtɛ à yã pì tɛ́ dɛ̀, akũ gyã pìi zɛ̀.
31 Akũ Dikiri tò yã bò kãao nna, a bàka kú kãao ari a buria.
32 Ò Dikiri pↄ fɛ̃̀ Mɛriba í kĩnaa, akũ yã bò kũ Musao vãni ń yãi.
33 Zaakũ ò a nɛ̀sɛɛ yàka, akũ à yã ò laasunn sari.
34 Odi bùsupidenↄ kakatɛ lákũ Dikiri dìtɛńnɛ nàro.
35 Ò kɛ̀ kↄ̃ gbɛ̃nↄ ũ kũ buri pìnↄ, ò ń futɛokara ágba sɛ̀.
36 Ò dò ń tãnanↄi, akũ yã pì gↄ̃̀ńnɛ tankutɛ ũ.
37 Ò ń nɛ́gↄ̃gbɛ̃nↄ kɛ̀ sa'opↄ ũ, ò sa ò tãnanↄa kũ ń nɛ́nↄgbɛ̃nↄo.
38 Ò taarisaridenↄ kùtu kpàkpa, ń nɛ́gↄ̃gbɛ̃nↄ kũ ń nɛ́nↄgbɛ̃ pìnↄ. Ò sa ò kũńwo Kanaanↄ bùsu tãnanↄa, akũ ń bùsuu pìi gbã̀a lɛ̀.
39 Ò gbã̀a lɛ̀ ń yãkɛnanↄ yãi, ò gↄ̃̀ náanisaridenↄ ũ ń yãkɛnanↄa.
40 Akũ Dikiri pↄfɛ̃ kìpaḿma, à ye gbɛ̃ kũ à ń sɛ́nↄ kãi doro.
41 À ń kpá burinↄa, akũ ń zãngurinↄ kí blè ń musu.
42 Ń ibɛrɛnↄ gbãna mↄ̀ńnɛ, ò ↄ tↄ̃̀ḿma.
43 Àdigↄ̃ ń bo gɛ̃̀n baaakↄ̃, ama ò zɛ̀ kũ ń sãgbãnakɛnaao, akũ ò vlɛ̃̀ ń durunna gũn.
44 Bee kũ abireo tó à ń wiki mà, àdi ń warikɛna yã da.
45 Ń yãi àdi dↄ a bàka kunna kũńwo yãn, àdi a nɛ̀sɛ litɛ a gbɛ̃kɛ zↄ̃kↄ̃ yãi.
46 À tò gbɛ̃ kũ ò ń kũkũ zĩ̀zↄ ũnↄ ń wɛ̃nda gwà.
47 Dikiri ó Luda, ǹ ó sura ba, ǹ ó bↄtɛ burinↄ tɛ́ ǹ ó kakara, de ò n tↄ́ kũ à kú adona bo ò ĩa dã kũ n táakilɛnaao.
48 Arubarikade Dikiri, Isarailanↄ Luda zaa káaku ari gↄrↄ sĩnda pínki! Gbɛ̃ sĩnda pínki pi aami! Aleluya!