EBERUNƆ 3
SIM1 Abire yãi ma gbɛ̃nↄ, ákↄ̃nↄ kũ Luda á sísi a su a kĩnaanↄ, à laasun lɛ́ Yesu kũ Luda a zĩ̀ Sa'oriki kũ o zɛo ũa.
2 Náanidemɛ Luda kũ à a dìtɛnɛ lákũ Musa de nà Luda ↄnn.
3 Lákũ ↄnkatɛrii bɛ̀ɛrɛɛ dìgↄ̃ de ↄnla nà, lɛn Yesu gakuri zↄ̃kↄ̃ de Musa pↄ́la lɛ.
4 Ɔn sĩnda pínki a kàtɛri vĩ, akũsↄ̃ pↄ́ sĩnda pínki Kàtɛrin Luda ũ.
5 Luda ↄn zĩkɛri náaniden Musa ũ, yã kũ Luda ni o sèedademɛ.
6 Kirisi sↄ̃ bede pì nɛ́mɛ. Luda a ↄn nànɛ a ↄĩ. Ókↄ̃nↄmɛ ↄn pì ũ, tó ó kpɛ́ ótɛn tãmaa kũ ó vĩ lɛ́ gbɛ̃ kũ kù gbãnao.
7 Abire yãi lákũ Luda Nini ò nà: Tó a Luda kòtoo mà gbãra,
8 àsun sãgbãna kɛ lákũ á dizinↄ kɛ̀ nàro, kũ ò ma lɛ ò ma gwa gↄrↄ kũ ò bò ma kpɛ gbárannan.
9 Bee kũ ò ma yãkɛnanↄ è wɛ̃̀ bupla, ò ma lɛ ò ma gwa gwe, ò ma gbãna lɛ́ gwà.
10 Akũ ma pↄ fɛ̃̀ gbɛ̃ pìnↄi, ma pì gbɛ̃ sãsãnanↄmɛ ń ũ, odi ma zɛ́nↄ dↄ̃ro.
11 Akũ ma la dà ma pↄfɛ̃ gũn ma pì, oni gɛ̃ ma kámmabokinlo fá.
12 Ma gbɛ̃nↄ, à laakari kɛ á gbɛ̃ke súngↄ̃ swɛ̃̀ vãni ludanaanikɛnasari vĩ ari à gɛ́ kɛ̃o Luda Wɛ̃̀ndidearo.
13 Gu kũ àdi dↄ kũ adì pi Gbãra pínki, àgↄ̃ lɛ́ dakↄ̃a, de durunna sún á gbɛ̃ke sãtɛ à sãgbãna kũro yãi.
14 Zaakũ Kirisi gbɛ̃nↄn ó ũ, tó ó náani kũ ó vĩ zaa káaku kũna gbãnagbãna ari a lɛ́a.
15 Lákũ ò ò nà: Tó a a kòtoo mà gbãra, àsun sãgbãna kɛ lákũ á dizinↄ kɛ̀ nà gↄrↄ kũ ò bò ma kpɛro.
16 Dínↄn gbɛ̃ kũ ò Luda kòtoo màa ò bò a kpɛnↄ ũ, tó adi kɛ gbɛ̃ kũ Musa ń bↄ́tɛ Misilanↄ baasiroo?
17 Dínↄn Luda pↄ fɛ̃̀ńyĩ ari wɛ̃̀ bupla, tó adi kɛ gbɛ̃ kũ ò durunna kɛ̀, ń gɛ̀ɛ gↄ̃̀ katɛna gbáranna gũnnↄ baasiroo?
18 Dínↄn à la dàńnɛ kũ oni gɛ̃ a kámmabokinlo, tó adi kɛ gbɛ̃ kũ ò gì a yã mainↄ baasiroo?
19 O è kũ odi le ò gɛ̃̀nlo ń ludanaanikɛnasari yãi.