EBERUNƆ 2
SIM1 Abire yãi ò yãpura kũ o mà kũ ↄplapla gíngin, de òsun kɛ̃ zɛ́aro yãi.
2 Zaakũ yã kũ Luda dìtɛ malaikanↄ gãi bi tilasimɛ, akũ ò fĩnaa bò gbɛ̃ kũ ò gì mai ò pã̀nɛnↄnɛ a zɛ́a,
3 tó ódi surabana zↄ̃kↄ̃ↄ pì yã da sↄ̃ro, óni bo yá? Surabana yã pìi bò Dikiri kĩnaamɛ, akũ gbɛ̃ kũ ò mànↄ yãpura kpàawɛrɛ.
4 Luda ɛ̀ra à yãpura kpà yã pìia kũ sèedanↄ kũ yãbonsarɛnↄ kũ daboyã dasi kɛnanↄ kũ a Nini gba kũ à kpàatɛtɛńnɛnↄ a pↄyenyĩnaaa.
5 Adi kɛ malaikanↄn Luda andunia zia kũ ótɛni a yã o nàńnɛ ń ↄĩro.
6 À kú Luda yãn gukea ò pì: Bↄ́n bisãsiri ũ kũ a yã dìgↄ̃ dↄnguu? Bↄ́n a ũ kũ ndì laakari dↄaa?
7 N a kɛ̀ kĩana malaikanↄi féte, n a kà kpatan kũ gakurio kũ bɛ̀ɛrɛɛo,
8 n tò pↄ́ sĩnda pínki mìi nàtɛnɛ. Kũ Luda tò pↄ́ sĩnda pínki mìi nàtɛnɛ, adi a ke tó mìnatɛnanɛɛ sariro. Tera lán dí bà, ódi e kũ pↄ́ sĩnda pínki mìi nàtɛnɛ gĩaro,
9 ama o è kũ Yesun ò tɛ́a. Luda a kĩ̀a malaikanↄi ari gↄrↄ pla, de Luda gbɛ̃kɛ gũn à ga gbɛ̃ sĩnda pínki gɛ̃nɛ ũ, akũ à a kà kpatan kũ gakurio kũ bɛ̀ɛrɛɛo ga wari kũ à kɛ̀ yãi.
10 Lákũ pↄ́ sĩnda pínki bò Luda kĩnaa nà, akũsↄ̃ pↄ́ sĩnda pínki de a pↄ́ ũ, kũ à ye à gɛ̃ kũ gbɛ̃nↄ dasi a gakuri gũn a nɛ́nↄ ũ, à kↄ̃ sì kãao à gbɛ̃ kũ à surabana zɛ́ bóńnɛ papa warikɛnaa gũn.
11 Gbɛ̃ kũ ò gↄ̃̀ Luda gbɛ̃nↄ ũ kũ gbɛ̃ kũ àdi ń kɛ Luda gbɛ̃nↄ ũo, ń pínki de dokↄ̃nↄmɛ. Abire yãi ń sísina a gbɛ̃nↄ ũ dì a wé'i kũro.
12 À pì: Mani n tↄ́ bo ma gbɛ̃nↄ tɛ́, mani n sáabu kpá kↄ̃kakaranaa gũn.
13 À pì dↄ: Mani a náani kɛ. À pì dↄ: Makũmɛ la kũ nɛ́ kũ Luda kpàmanↄ.
14 Zaakũ nɛ́ pìnↄ bi bisãsirinↄmɛ, akãa se à gↄ̃̀ bisãsiri ũ lán ń bà, de à ga à Ibilisi kũ àdi su kũ gao kakatɛ,
15 à gbɛ̃ kũ òtɛn vĩna kɛ ganɛ òtɛn zↄ̀ ble ari ń wɛ̃̀ndi lɛ́nnↄ bo.
16 Yãpura gũn malaikanↄn àtɛn ↄ daḿmaro, Ibrahĩ burinↄmɛ.
17 À kↄ̃ sìo à gↄ̃ lán a dakũnanↄ bà yã sĩnda pínki gũn, de à gↄ̃ Sa'oriki sùrude náanide ũ Luda zĩ gũn, gbɛ̃nↄ durunna kútɛkɛbↄ ũ dↄ.
18 Lákũ à wari kɛ̀ à yↄ̃ogwanaa fↄ̃̀ nà, ani fↄ̃ à gbɛ̃ kũ òtɛni ń yↄ̃ ò ń gwanↄ faaba kɛ.