Toho Wojo Honajo Hungkuno 17
PNG1 Aêamu ahwomo mtaêango aho fehohnjo hopiênono nomêne mtaêni hufaêuyo solɨjwanyo iwontofahumentohofo sohwa angaênohino sohwo ntɨmento, Kɨko oyomo. Olo hwe moyaêmi ango Mpapiloun humawoênɨngkohofo loso ape hwaênyo iwoênɨngkohofo paênyofoho. Oso aêamu fisofe angoso mitɨmomɨngopo molinyofoho. Hofɨkoe yahino wonyo somneêno tohino mayoso wokitɨhwamnoho. 2 Hwe engo hwaho mokosyohumawoênɨngkohofo sohwa oso ape hwaêntesiênji hwaênyo lohoênɨmentohofofoho. I aêamu hwahoponjo hopiênonohinoso oso yahino homo somneêno aêamu mijo yokumpohnênyo nontɨfi nilohofohofo hopa imoênɨmentohofofoho. 3 Ose uhwonɨngkahonɨngko Anɨtuye Towahuno Wopɨngoso hwaho aêamu anepono ipenɨmotamentisofoho. Osopo humanji uhwonɨmentoheso ape fisi kako siki sɨwojo honɨyoênohino sopo kehumamentisofoho. Oso sikisɨwojo huhwo sohwo kakoe mnokinoso aho fehohnjo hopiênono nomêne mtaêni hufaêuyoho. Kakoe sɨhwanoso aho hopiênonohinofoho. Kakoe aêapahopo Anɨtuneêno sɨfajo hungkuno mtɨêmokinyofoho. 4 Apesi kakoe manjiêmofoso honɨyoênohinoênjo miyoênohino soênji wonyoangkafofoho. Kakoe tɨmno hosaso naênohinoso wokoso wonyoangkafoênjofoho. Oso aêmusi kako kakoe aho somo noswanyo mijo nyoêne naênohinoso mokosyohumunniyoho. Oso noswanyo homo somo kakoe hwaênyo yahino soênji kakoe yahino nomêne aêamumo pisakino honɨngkanomo ipemotaweêne soênji woênnyomnoho. 5 Kakoe yomohuênyopo yofe pahnnɨmo hungkuno ole woênnyoponoho. Pone engo Mpapiloun sopo hwaênyo yahino soênji hwahoponjo yahino wonyo soênjiye konaêwohinyoho. 6 Aêamu fihwo kako mijo yokumpohnênyo nilohofɨwoênɨngkiso nomêne mijo womaêmo loso hopaso oso ape hwaêntesi kako aêamu Anɨtumo sɨmeho hiêntnnono uyɨwoênɨngkohofo somo wofonjasyɨwoênɨmo ehuno woênɨyoho. Ngko oso homo somo nuhwononji nje hi ntɨkofahonɨngki ngko yomo yonji pisopisaho lɨmentohefoho. 7 Ose yahonɨngko aêamu ahwomo mtaêango sohwo ntɨmento, Kɨko yomo yomo pehoêno yohino. Ngko olo ape losiênji sikisɨwojo mnokino aho fehohnjo hopiênono nomêne mtaêni hufaêuyoênjo sɨhwano aho hopiênonohinoênjo sohwo hnênɨngkowalokunjo hwapɨngo ne soêno wakilɨmonneêno yohono. 8 Oso sikisɨwojo ngko nto kitɨhwaheso kɨko nto uhwonɨngkino sohwo hohonta humamojo sohwo olohonta mohumuyoho. Hwangku sohonta kako piênɨmo hwapɨngo ane sopo ntaêni noswapɨhwosoêno Anɨtu kako kakimo tɨkanomo tohino engo uyɨmɨwenefoho. Anɨtu hwaho mamtɨêmokummentiso sohonta aêamu hofɨkoe yofe kakoe iyoswo songo neêno humayoêne somo mamtɨêmokummentiso sohwa hwahopo nohumafɨkuji oso sikisɨwojo sohumo uhwonɨfijoso hofɨko huno piênɨngo engo syafɨsyɨkuji pisopisaho lɨfitnnefoho. Hwapɨngoso oso aêamu sikisɨwojo paênyo sohwo kako songo humanto peênɨmentiso sohwo kako apaêno uêmofapmmontonoho. 9 Aêamu huno wopɨngoênjo sohwo kako olo soêno huno syafɨsyɨhwosi kako huno wopɨngo wotɨpemaêmontonoho. Mnokino aho fehohnjo hopiênono nomêne mtaêni hufaêuyo sohwa oso hwofɨkiênyo aho fehohnjo hopiênono nomêne mtaêni hufaêuyoho. Oso aêmu hisi kako pone engo oso hwofɨkiênyo aho fehohnjo hopiênono nomêne mtaêni hufaêuyoênjopo humawoênɨngkisiyoho. 10 Oso mnokino aho fehohnjo hopiênono nomêne mtaêni hufaêuyo sohwa hwapɨngo nomêneso olenoho, aêamu yofe engoênjo hwaho mokosyohumayoso aho fehohnjo hopiênono nomêne mtaêni hufaêuyo hwafoho. Aêamu huhwo sohwa aho fehohnjo hopiênonohino sohwa nopeênɨngkahonɨngkofi angaênohino sohwo humaho. Nomêni sohwo kako tɨfi iêmofaponefoho. Iêmofapɨhwosi kako olopo weêe nehwo wohumamontonoho. 11 Oso aêamu sikisɨwojo paênyo sohwo hohonta humamentiso sohwo olohonta mohumunyo sohwo kako hwe yofe engoênjo hwaho mokosyohumayo hweho. Oso hwe engo aho fehohnjo hopiênonohino sohwa peênɨmentohofo mtaêangoso olo sɨwojo lohweho. Tɨfi kako apaêno iêmofapɨhwosi kako hwe engo aho fehohnjo hopiênono nomêne mtaêni hufaêu sɨhunehwo umoênɨmontonoho. Nohumahwosi tɨkanomo wene hweho. 12 Oso sikisɨwojo sɨhwano aho hopiênonohinoso hwe yofe engoênjo sohwa hwaho hopiênonohinomo mokosyohumayoêne hwafoho. Hofɨkoe yofe engoso tɨfi noêmo mapitnnefoho. Hofɨkoe yofe engo nomafɨkuji oso aêamu sikisɨwojo paênyo sohwoênji hofɨkoênji hofɨkoe aêamu hopiênonohino somo weêe nehwo womokosyohumantɨfeho. 13 Hwe yofe engoênjo sohwa hofɨko sɨmeho afa inɨngkuji hofɨkoe yokumpohnênyo yoêmayoso oso aêamu sikisɨwojo paênyo sohumo uyɨkuji oso siki sɨwojo sohumo enjwaêmo wohumantɨfeho. 14 Tɨfi hofɨkoênji hwe nakwoe wonyoêne poyo peênɨmentiso sohwoênji hofɨko ikujoho fongkiênɨngkuji Jisas kako hofɨkimo nuyakolofonefoho. Hwapɨngoso Jisas kako hwe yofe engoênjo hopiênonohino sohwafe Hwe Engo hweho. Kakoe aêamu ne kakoênji humalofo somo kako nuhwosopento nnɨngkapmno ulahonɨngki hofɨko sɨmeho hiêntnnono uyontɨfi kakimo hofiyo inɨngkowalokwofo. Hwangku kakoênji hofɨkoe mango sohwamo uyakolopitnnefoho. 15 Ose ntonto ole ntɨmento, Oso mitɨmomɨngo sopo apesi kako nohumentanɨngki uhwonɨngkinoso oso mijo hiso olenoho, aêamu hwaho kengo mtaêango soênji hungkuno kengo kengoênjo hopiênonohinofoho. 16 Oso sikisɨwojo sɨhwano aho hopiênonohino paênyoso hwe engo aho hopiênonohino sohwanji aêamu sikisɨwojo paênyo sohwoênji hofɨko oso aêmu pone Mpapiloun siye mangohwa umoênantɨfeho. Oseso hofɨko oso pone engo somjo yoêmayoso hufo mahonɨngkuji pone hiso iêmmoênohino paênyo nohumahonɨngkuhwosi hofɨko oso pone somo toho ifuntofɨkuji nɨhuênahone wae yaopitnnefoho. 17 Oso hisoêno Anɨtu kako hofɨko ifitnneêento kako hofɨkimo huno uyososoêno hofɨko sɨmeho afa inɨngkuji yoêmayoso ifitnnefoho. Oseso hofɨkoe yokumpohnênyo soênji hofɨkoe aêamumo mokosyohumawoênɨngkohofo soênji aêamu sɨwojo paênyo sohumo uyantɨfeho. Oso hopa imɨkuji Anɨtuye hungkunoso ne umoênɨmontonoho. 18 Oso ape wonyo uhwonɨngkinosi kako oso ango pone engiyoho. Kako hwe engo hwaho kengo kengo mtaêango sohwamo mokosyohumawoênɨngkisiyoho. Ose ntɨmentisofoho.