Mak 6

1 Osopo ntaêni Jisas kakoe inomokomoyo sohwanji nowentɨfi Jisasɨye ango Nasalet uêmofamentohofofoho. 2 Salolemo aêamu Juta sofe iyoho humayo sɨkuno somo Jisas tajo angomo lutɨhwahonɨngki aêamuso piênɨngo nohumantɨfi upaênontɨfi Jisasɨye huno engo soêno yomo yontɨfi ulɨmentohofi, Olo hwe lohwoe hungkuno ntɨêmtaêangoto. Oso huno engoênji pipi imoênɨngkohoho. Yoêmayo wonyoangkafoênjo aêamu miyoso olo hwe lohwo yɨwoênɨngkiso hweho. 3 Olo hwe lohwo kako ango molɨmojo lohwolaho. Maliyafe hwomufoho. Jemɨs, Jousep, Jutas, Saimoun hofɨkoe hofilaêwehweho. Homnampija olo ango lopo nakwoênji humalofo. Ose ulontɨfi hofɨko sɨmano hintotohino umnɨngkahonɨngki nakwolaho lɨmentohofofoho. 4 Jisas ulɨmento, Aêamumo hwe fihumo Anɨtu hungkuno uyahonɨngki lɨmojo sohwo ango kengo hopiênonohinopo kakoe yofe engo hoênomowoênɨngkohofofoho. I osoêno osohwo kakoe temtitofo kakoe kanɨngkwohwoêyaêu hamnɨngkwohwosa hofɨko kakoe yofe mohoênomasofoho. Ose ulɨmentisofoho. 5 Aêamu hiso hofɨko Anɨtu Jisasɨmo oso syoho hisoêno uhwosopoêmentiso soêno sɨmeho hiêntnnono muyoênjo imentohofo soêno Jisas osopo yoêmayo wonyoangkafoso piênɨngo mimmentisoso aêamu mnokinoênjo angaêno angaênohinomo kako aho kisasyonto wopɨngo umokumentisofoho. 6 Hofɨko Jisasɨmo sɨmeho hiêntnnono muyo soêno yomo imentisofoho. Oso hwaho sopo kako angkuhwafo sohwaêi emayonto, Anɨtuye hungkuno lutɨhwamentisofoho. 7 Jisas kakoe inomokomoyo sɨfe mtaêni hufaêuyo sohwamneêno joho ulahonɨngki hofɨko nuhuêmokahonɨngkofi Jisas kakoe yokumpohnênyo yano uyɨmentisofoho. Oso yokumpohnênyoso aêamufe aêapahoêmjo towahuno wonyo wae yaofoêne umentisofoho. Umentisoso hwe sohwamo hufaêu hufaêu lɨhwatɨmentisofoho. 8 Jisas hofɨkimo ulɨmento sekwo hoêyango ane fɨwanɨmno. Mnoênohini mtamno. Wopayo, hoêyo, hamniyoho, oso nomotakutoho. 9 Manjiêmofo hufaêu nomafɨkutoho. Oêo, manjiêmofo angaênohinoênji sekwoe sɨfɨkwongofosyoênji manjiêmoênɨngkuji fɨwanɨmno. 10 Sekwo ango fipo iêmofahokuji ango angaênohino somo saho fosyawopijo. Oseso sekwo oso ango somo nulɨkoêmafɨkuji nomêne angopono fɨwanɨmno. 11 Nomêne angopo sekwoêne ango mosejapeêmanji i sekwo oso ango hopo sopo nulɨkoêmafɨkuji hopo sopo hwaho semongkiênososo hofɨko nosehontohumentanɨngkuji oso hintalinyo hiso wae feehumno. Oso homo somo uhwonɨngkuji hofɨko hofɨkoe yahino somneêno huno ole wosyafɨhupɨfe. U, nakwo wonyo yɨhwono. Ose syafɨsyɨkuji iyoho unono. 12 Ose ulahonɨngki inomokomoyo sohwa nowentɨfi aêamu somo hungkuno ole ulɨmentohofi, Sekwo sɨmeho fɨwoloêmokumno. 13 Ose ulontɨfi towahuno wonyoso wae yaofontɨfi aêamu mnokinoênjo somo hofɨko hwone mijo mnokinopo usisyontɨfi wopɨngo umokumentohofofoho. 14 Yoêmayo Jisas imentiso soêno aêamu piênɨngo engo lɨmotofoso hwe yofe engoênjo Helout kako upaênɨmentisofoho. Fiso aêamu Jisasɨneêno ole ulɨmentohofi, Olo hwe lohwo Jounɨyoho. Joun Aêamumo Mijo Kiyomaêmojo sohwo poyo peênonto apaêno lɨkaêmaso hwolɨkeno. Osoêno yoêmayo wonyoangkafo aêamu miyɨwoênɨngkiyohofoso kako iwoênɨngkiso soêno yokumpohnênyo iêmofapohoho. 15 Aêamu nomêneso Jisasɨneêno ole ulɨmentohofi, Olo hwe lohwo Ilaija hohonta peênɨmentiso hweho. Nomêne aêamuso ole ulɨmentohofi, Olo hwe lohwo aêamu hohonta Anɨtu hungkuno uyahonɨngki lɨmojo paênɨngo hweho. Ose lɨmentohofofoho. 16 Oseso Helout nupaênonto ulɨmento, Olo Jounɨyoho. Hwe aêamumo mijo kiyomaêmojo hweho. Ngko aêamu kakoe tɨêwango fɨwofitofosyamno ulɨmentoheso nto yɨwafitoêmentohofo sohwo apaêno lɨkaêmaso hwolɨkeno. Ose ulɨmentisofoho. 17 Hwapɨngoso hohonta Helout kako Jounɨmo impoêangomo mɨhumajonto ahwomo nano kilofahumentisofoho. Helout Jounɨmo impoêangomo pehoêne mɨhumatɨêmentisoto. Hwapɨngoso kolaêwehwoe Filipɨye ape Heloutiyasɨmnefoho. Helout olo simo maêmentisofoho. 18 Hohonta Joun Heloutɨmo ulɨmento, Kɨko hnnɨkwaêwehwoe ape mahino loso hopoêmaho. Oêo oso honɨngkano pisakinoênjofoho. Ose ulɨmentisofoho. 19 Impe intofahonɨngkofi Heloutiyas sɨmano lɨkumpo lohofonto Jounɨmo poyo umokumonto ko imentisoso 20 Helout Jounɨye yofe hoênomaêmentisofoho. Joun kakoe honɨngkano itoênohino hwe wonyoangkafo hweho. Osoêno Helout huno uyahinɨngki, Heloutiyas Jounɨmo poyo koimokumneêento Helout kako Jounɨmo impoêangomo itoêno mokosyohumamentisofoho. Helout Jounɨye hungkuno upaênɨwoênɨngkiso soêno yomo ko yonto huno piênɨngo engo syafɨsyonto nomêne hungkuno upaênɨmo lɨmentisofoho. Osoêno Heloutiyas Jounɨmo fonjasyɨhwoloho. 21 Oseso hwangku sohonta Heloutiyas Jounɨmo fonjasiyoêneêento honɨngkano tɨpemaêmentisofoho. Osohonta Helout kakoe sɨkuno konaêwohi aswo maêmentiso somneêno huno syafɨsyonto aêamu syoho ulohofiyo sohwa wopayo iloho yahonɨngkofi hwe engo aêamumo mokosyohumayo sohwanji nɨmentohofofoho. 22 Heloutiyasɨye mu sijosi noswaponto hofɨkoe sɨmeho wopɨngo umoênono lonto sɨmonyo imentisofoho. Aêamu sohwanji Heloutɨênji nuhwonontɨfi sɨmeho wopɨngo umoênɨmentisofoho. 23 Osoêno Helout musopimo ulɨmento, Kɨko yoêmayo pehoêno kumoênososo ou kɨko njo. Ngko wokijapmmo. Yoêmayo piênɨngo engo hiênjo hwoênyoho. Kɨko fehohnjoêno njisoso ou ngko fehohnjoso wokijapmnoho. Nehopi kilohono. 24 Ose ulahonɨngki mu sopi noswonto konaêwohimo ulɨmento, Pehoêno ulɨmnehono. Ose ulahonɨngki Heloutiyas ulɨmento, Ole uso. Joun Aêamumo Mijo Kiyomaêmojo sohwoe mnokinoêno nɨmoênɨngkohoho. Kakoe mnokinoso ikuêyopo hoênasyohoji komoêno ntape. Ose uso. 25 Ose ulahonɨngki mu lopi komoêno asomo noswonto Heloutɨmo ulɨmento, Kɨko Joun Aêamumo Mijo Kiyomaêmojo sohwoe mnokinoso noswonyopo yɨwojosyalokumpehoji olopo ntape. 26 Ose ulahonɨngki Helout kakoe sɨmeho tango mɨkunɨmposo umnɨmentisofoho. I osoêno aêamu hopiênono kakoe hungkuno, Nehopi kilohono, ose nto upaênɨngkohofo soêno kako aêmu simo eno ulɨmentisofoho. 27 Oseso Helout komoêno hwe Jounɨye mnokinoêno uhwojahonɨngki hwe huhwo sohwo impoêangomo nowento osopo Jounɨye tɨêwango iwofitofonto 28 Jounɨye mnokinoso noswanyopo iwojwosyalokumpentɨfi aêmu sijo simo nuyahonɨngkofi nomotawento konaêwohimo uyɨmentisofoho. 29 Jounɨye inomokomoyo sohwa yoêmayo soêno upaênontɨfi hofɨko nopontɨfi kakoe pijafoso nomantɨfi sokimomo hoênahumentohofofoho. 30 Jisasɨye inomokomoyo kako lɨhwatɨmentiso oso hwa asomo uêmantɨfi yoêmayo hofɨko imentohofo soêno hungkuno aêamumo lutɨhwamentohofo soêno Jisasɨmo ulɨmentohofofoho. 31 Osopo aêamu piênɨngo engo nowentɨfi nopontɨfi nohnnawe yahonɨngkofi osoêno Jisasɨye inomokomoyo (apousel) sohwa wopayo manyofoho. Osoêno Jisas ulɨmento, Nakwo aêamu ane sopono nowekehwasi osopo sekwo usijoêno fosyohumamno. 32 Ose ulahonɨngki hofɨkoênohini yofayokinopo aêamu ane sopono wowanontɨfi imentohofo soponeêno. 33 Aêamu piênɨngoso uhwonontɨfi hofɨkimo yofe uhwofontɨfi aêamu ango hopiênonohino mtaêangoso komoêno honɨngkanopo nowentɨfi Jisas kakoe aêamu yofayokinoênjo sohwamo uyakolofontɨfi aêamu ane sopo sɨmoêmo uêmofamentohofofoho. 34 Jisas mitɨmomɨngopo iêmofaponto uhwonɨmentisoso hwe moyaêmi piênɨngo engo somo uhwononto hofɨko yahwohofekwosa ane paênyo hwafoho. Osoêno kako hitoho uloêmentiso soêno hungkuno piênɨngo engo lutɨhwamentisofoho. 35 Mofehiênyo ukwoêmokumonto yahonjo soênji Jisasɨye inomokomoyo sohwa nopontɨfi ulɨmentohofi, Olo hwaho hopo lopo sopo aêamu aneponoho. Weêenepi mofehiênyo ukwoêmokumontonoho. 36 Kɨko oso hwe moyaêmi somo ango somneêno lɨhwajohojoêno hofɨko nukuji wosopayo mpe uyɨfe. 37 Ose ulahonɨngkofi Jisas ulɨmento, Oêo, sekwo huhwasi wosopayo uyɨmno. Ose ulahonɨngki ulɨmentohofi, Nakwo pipilo. Hamniyoho syoho sɨkuno tu hantɨlet (200) memjaofoso aêamumneêno wopayo mpe iyoêneso hopoêmaho. 38 Ose ulahonɨngkofi Jisas ulɨmento, Wopayo alalelo weho. Tɨmo uhwonamno. Ose ulahonɨngki hofɨko nowentɨfi uhwonowentɨfi ulɨmentohofi, Nakwoe wosopayo aho angaêno hopiênonohinofoho. Inanɨku hufaêu weho. 39 Ose upaênonto Jisas kakoe inomokomoyo sohwamo ulɨmento, Sekwo aêamu somo ulɨmno, Hoja lopo fosyohumamno. 40 Ose ulohonɨngki hofɨko nohumantɨfi fipo aêamu wan hantɨlet (100), nomênepo aêamu fifɨti (50), oseêno oseêno lɨhumajɨêmentohofofoho. 41 Jisas kako oso wosopayo aho fehohnjo hopiênonohino soênji inanɨku hufaêu soênji nomanto kako ahwomomo tɨmo uhwontohumanto Anɨtumo isamoyoka ulɨmentisofoho. Isamoyoka nto ulonto kako wopayoênji inanɨkuênji kutɨkujo lohofonto kakoe inomokomoyo sohwamo aêamu somo yano ulofiyoêne huêmmentisofoho. 42 Aêamu hopiênonohinoso wopayo hiso moiêwo nontɨfi sɨmeho uhnnɨmentisofoho. 43 Sɨmeho uhnnɨngkahonɨngki hofɨko wosopayo nɨlɨfonaoêmentohofoso nuhuêmokontɨfi sohwo hoêyo aho hopiênono sɨfe mtaêni hufaêuyo somo mohuêmemeehumentohofofoho. 44 Aêamu oso wosopayo hiso Jisasɨye aho mtaêni nɨmentohofoso hwe weêe humamentohofoêmaho. Hweênohini oso wosopayo nɨmentohofo sohwa faif tausen (5000) humamentohofofoho. 45 Osohonta Jisas kakoe inomokomoyo sohwamo ulɨmento, Sekwo yofayokino nomafɨkuji oso hwaho nongkihntaêni Mpetɨsaitaêno sɨmoêmo mpanɨmno. Ose ulonto aêamu nomêne somo hofɨkoe ango pone lɨhwatɨmentisofoho. 46 Ose ulonto aêamu somo ulɨkoêmanto kako hwofɨkiênyo weêe sopo Anɨtumo jomo ulɨmo lonto sɨmentisofoho. 47 Sɨkunoênji inomokomoyo yofayokinoênjo sohwa mijo ajwopo nohumentanɨngkofi Jisas kakoênohini mitɨmomɨngopo humamentisofoho. 48 Jisas uhwonɨmentisoso yofayokino hono honi wahonɨngki hofɨko yokino wonyopi imentohofofoho. Hwapɨngoso ole, ifofo engo pahonɨngki wonyopi imentohofofoho. Iyoho walongkonɨmonto yahonjo soênji Jisas mijo yokintahopo hano wento inomokomoyo sohwamo uêmaêmentisofoho. Ngko hofɨkimo uyakoloêmo nolonto 49 Jisas mijopo hano sontanɨngki inomokomoyo sohwa hofɨko nuhwonontɨfi yomo yomo yontɨfi huno ole syafɨhuêmentohofi, Mewosofoho. Ose syafɨsyontɨfi youwo lɨmentohofofoho. 50 Inomokomoyo hopiênonohino sohwa Jisasɨmo uhwonontɨfi iyoho engo unɨmentisofoho. Oseso Jisas hofɨkimo komoêno joho ulɨmento, Sekwo yokumpohnênyo hmmoênɨmno. Ngkonoho. Sekwo iyoho ikutoho. 51 Ose ulonto kako yofayokinomo kotasahonɨngki ifofo moiêwo imoênɨmentisofoho. Inomokomoyo sohwa yomo yontɨfi sɨmeho ulɨkofahonɨngki huno piênɨngo syafɨhuêmentohofofoho. 52 Jisasɨye yokumpohnênyo hwapɨngo soêno huno muyofoho. Jisas kako wosopayo aêamu piênɨngo engomo umentiso soêno inomokomoyo sohwa huno itoêno mosyafɨsiyofoho. Osoêno yomo imentohofofoho. 53 Hofɨko mijopo nowakentɨfi Ngkenesalet nongkihntaêni ifohohosyahumentohofofoho. Ifohohosyasyontɨfi osopo yofayokino hoênahumentohofofoho. 54 Hofɨko yofayokino hoênosyahonɨngkofi hwe moyaêmi hopo sopontaêangoso hofɨko yofe komoêno uhwofontɨfi lɨmentohofi, Jisasɨyoho. 55 Hofɨko yofe uhwofontɨfi hopo sopo hano komoêno nowentɨfi Jisas ntopohoho lahonɨngkofi aêamu nupaênontɨfi hofɨko aêamu mnokinoênjo somo Jisasɨyepono itokwapmmentohofofoho. 56 Jisas hoêmo soêmo nowahonɨngki aêmokuso aêamu mnokinoênjo somo intokwapontɨfi wopayo mpe yɨwoênɨngkohofo sopo itofasyontɨfi Jisasɨmo ulɨmentohofi, Hwe Engofo, nakwo jɨje manjiêmofomo aho wakupmêmokano. Ose ulontɨfi hofɨko kakoe manjiêmofomo aho upmêmokumentohofoso hofɨkoe mnokino moiêwo imoênɨmentisofoho.