Luk 22

1 Oso Anɨtu Aêamu Isɨlael somo Uyakoloêmentiso somneêne Syafɨsiyo sɨkuno iyoho humayo engoso umoênɨmonteêno yohoho. Oso sɨkuno homo somo aêamu Jutaso hofɨko wopayo iloho iyoso engo kaofoêne soênji miyoênjo yontɨfeso wopayo feejoênohini nɨmotofofoho. 2 Oso hwe tajo ango syohoênjo yofe engoênjo sohwanji aêamu honɨngkano hungkuno lutɨhwamotofo sohwanji hofɨko Jisasɨmo fonjasiyoêne honɨngkanoso ko tɨpeentɨfi hofɨko hwe hwoyaêmi ikujoho nafongkupitnnoho syafɨsyontɨfi iyoho unɨngkahonɨngki ole hnnɨmentohofi, Nakwo Jisasɨmo pipi fonjosyanehwono. 3 Oso sɨkuno somo Seten kako Jutas Isɨkaliyoutɨye sɨmeho moêmo paswonto huno uyɨmentisofoho. Jutas huhwo sohwo kako Jisasɨye inomokomoyo aho hufaêu hopiênono sɨfe mtaêni hufaêuyo sohwa mtaêango hweho. 4 Jutas kako nowento oso aêamu yofe engoênjo tajo ango syoho imotofo sohwanji aêamu hwapɨfe tɨfoênjo Anɨtuye tajo ango engo somo uhwontohumamotofo yofe engoênjo sohwanjimo uêmanto Jisasɨmneêno tokoyoêofo imentisofoho. 5 Oso aêamu huhwo sohwa Jutasɨye hungkuno upaênontɨfi sɨmonyo yontɨfi hofɨko hamniyoho uyoêneêentɨfi hungkuno mtitoêmentohofofoho. 6 Jutas kako eno ulonto kako Jisasɨmo hofɨkoe ahomo kumangkiyoêne aêamu piênɨngo mohumunyo sohonta honɨngkano tɨpeehumentisofoho. 7 Oso hohosohonta oso sɨkuno engo iyoho humayoêne aêamu Juta hofɨko wosopayo iloho inyoso engo mokamoênnyo feejoênohini nɨmotofo sɨkunoso iêmofapmmentisofoho. Oso sɨkuno homo somo hofɨko yahu sipsip honɨyo hokuêyopo ulohofoêne fonjohumotofo sɨkunofoho. 8 Oseso Jisas kako Pitaênji Jounênjimo lɨhwajonto ulɨmento, Siko nowehosɨsi sɨkuno engo iyoho humayoêne somjo wosopayoso itoêno yasyohosi soêno nakwo wonano. 9 Ose ulahonɨngki siko ulɨmentisiyo, Nekwo ntɨêmo wesyohumantayoêno kumoênɨngkohoho. 10 Ose ulahonɨngki ulɨmento, Upaêninyo. Ango engo sopono nowehosɨsi hwe fihwo kako mitɨhwontohoênjo sohumo uswoênɨngkohosɨsi siko kakimo inɨngkasohosɨsi ango kako swoso somo finɨngkasyɨnnyo. 11 Siko noswohosɨsi ango kakwoêyohwo sohumo ole ulinyo. Nekwoe Lonetɨhwayo sohwo kako kikineêno hungkuno ole lehwajohoho. Ngkoêne ango nje inomokomoyo sohwanji sɨkuno engo somjo wosopayo ntɨpo wonantaneto. Ose lehwajohoho. 12 Ose ulohosɨsoêno kako ango tokilonjwaêmo molinyo yokintahoponjo somo wosetɨhwamontonoho. Oso homo somo nakwoe wosopayo itoêno feesinyo. Ango homo somo epohumayo ijempoho yoêmayoso hiênjomnoho. 13 Jisas ose ulahonɨngki siko nowenji yoêmayo Jisas ulɨmentiso hopaso tɨpemaêmentisiyefoho. Notɨpemanji siko wosopayo itoêno yahumentisiyefoho. 14 Oso wosopayo nyoêne sɨkunoso nto iêmofopahonɨngki Jisas kako wosopayo nyoêne ijempoho soponjo epohumayo sopo kakoe inomokomoyo apousel sohwanji humamentohofofoho. 15 Jisas nohumanto ulɨmento, Ngko oleêno nɨmoênɨmojofoho. Ngko sekwoênji olo Anɨtu Aêamu Isɨlael somo Uyakoloêmentiso somneêne Syafɨsiyo Sɨkuno Engo wosopayo wonantaneêno yohono. Wosopayo nonɨngkuhwasi tɨfi tohino engo womaêmonnoho. 16 Sekwo nje hungkuno upaênɨmno. Olo sɨkuno engo lomjo wosopayo nɨwoênɨngkuhwone loso nɨngkuhwasi ngko olo hwaho lopo apaêno manɨmnehono. Oêo, ngko poyo imoênɨêmeêno olo sɨkuno engo lomjo wosopayo nɨngkuhwoneso ne uêmofapmmontonoho. Tɨfi noêmo Anɨtuye aêamu kakimo enjwaêmo humafijo sohonta ngko olo sɨkuno lomjo wosopayo nɨngkuhwone hopa apaêno nonontɨêmnefoho. 17 Ose ulonto kako mijo nyoêne noswanyo ipisayo mijoênjoso nomanto Anɨtumo isamoyoka ulonto ulɨmento, Sekwo olo mijolo nomafɨkuji yano filofanɨmno. Ose ulonto ulɨmento, 18 Sekwo nje hungkuno upaênɨmno. Olo mijo loso ngko manɨmnehono. Ngko neêno manyoênjo humantɨême sohwoêni hwangku Anɨtuye aêamu kakimo enjwaêmo humafijo sohonta ngko apaêno nonontɨêmne hwoênyoho. 19 Jisas ose ulonto kako wopayo nomanto Anɨtumo isamoyoka ulonto kutɨkujo lohofonto kakoe inomokomoyo sohwamo huêmuyonto ulɨmento, Olo wosopayo loso nje aêapahofoho. [Sekumo sefoêmayoêne mtɨhupenji sejapohono. Tɨfi noêmo sekwo ole mjanɨmɨkuji ngkineêno fisyanɨfɨsyɨkuno. 20 Wosopayo moiêwo nɨngkahonɨngkofi kako wosopayo uyɨmentiso hopaso kako mijo homo oseênohini uyɨmentisofoho. Kako mijo uyonto ulɨmento, Olo ipisayo mijo noswanyo loêmjo loso nje honɨyofoho. Sekwo Anɨtuênji mokotɨkuênyoêne yahino songo lomneêno sekwoe wonyomneêno mpe iyoêne usɨhumahefoho.] 21 I uhwonɨmni. Olo aêamu nje mango sohwamo ngkineêno tokoyoêofo yone lohwoênji olo ijempoho lopo humalohwono. 22 I Anɨtu kako hohonta hungkuno mtɨtoêmentiso hopaso ngko poyo umoênɨmonneêno yohono. I osoêno oso hwe ngkineêno nje mango sohwamo tokoyoêofo ntohofone sohuneêno hitoho ntokwoho. 23 Ose ulahonɨngki hofɨko angaêno angaênohino sohwa humahnnɨngkofi, Oso yahino wonyo hiso tɨhwo ulohoêmonteto. Ose humahnnɨngkohofofoho. 24 Jisasɨye inomokomoyo sohwa hofɨko oso hungkunoso hnnontɨfi hofɨkoe hungkunoso toho paênyo imoênɨngkahonɨngki ole soêno yoka hungkuno hnnɨmentohofi, Nakwo yofe engoênjo nomɨhwamo yakoloênnyoso tɨhwolo. 25 Ose hnnɨngkahonɨngkofi Jisas ulɨmento, Hwe yofe engoênjo olo hwaho lopo aêamumo mokosyohumayo sohwa hofɨko hofɨkoe aêamu somo syoho engo ko uyahonɨngkofi aêamu huhwo sohwa hofɨko nakumo nefoêmayoênefoho lɨwoênɨngkohofofoho. 26 I osoêno sekwo oso hopa ikutoho. Oêo, aêamu ngko yofe engo womaêmo loso sohwo kako nomêne aêamumo enjwaêmnohini wohumano. I kako nomêne hwamo womokosyohumamo loso sohwo kako oso huhwo sohwafe syoho ulohofiyo hopaso umoênono. 27 Hwe engo sɨmoêmjoso tɨhwolo. Aêamu ijempohopo wosopayo nɨwoênɨngkiso sohwolaho. Aêamu wosopayo iloho yonto uyɨwoênɨngkiso sohwolaho. I aêamu ijempohopo humanto wosopayo nɨwoênɨngkiso oso hweho. I osoêno ngko yofe engoênjo huhwoêni oso hopa miyalokuyohono. Oêo, ngko sekwoe syoho selohofiyo paênyo hwoêni humaleno. 28 Sekwo ngkoênji nohumentanɨngkofi yoêmayo tangoso ngkimo yamofo ntohofoêneso nuêmahonɨngki sekwo ngkimo manɨhwatɨêmofefoho. 29 I osoêno nje Mpohwo kako ngkimo yoêmayo hopiênonohino enjwaêmo hoênanɨhumentiso soêno ngko huhwoêni yoêmayoso sekumo enjwaêmo hoênosesyalokweno. 30 Oseso ngko yoêmayo somo mokosyohumentahonɨême sohonta sekwo nje epohumayo sopo nohumafɨkuji nje wosopayoênji mijoênji nɨfitnnefoho. Sekwo ngkoênji nohumafɨkuji oso aêamu Isɨlael hofɨkoe temtitofo aho hufaêu hopiênono sɨfe mtaêni hufaêuyo sofe hwe engo umoênantɨfeho. Ose imoênɨngkuhwosoêno sekwo hofɨkimo mokosyohumantokutnnefoho. 31 Jisas Pitamo ulɨmento, Saimoun, Saimoun, kɨko upaênyo. Seten kako sekumo wonyo wasemokumonto yalofoho. Kako sekwoe huno wopɨngo somo kehilo ehilofo waselohoêmonte-eêno joho losetɨmalofoho. 32 Seten ose ko yontanɨngki ngko jɨje sɨmeho hiêntnnono ntopantokunoso poyo mapeênyoênjo yoneêenji Mpohumo kikineêno jomo nto ulɨmaleno. Oseso kɨko apaêno ngkimo nnɨngkapohoji kɨko jɨje nɨngkwahwosamo nɨfoêmahoji yokumpohnênyo usosofitofo. 33 Ose ulahonɨngki Pita ulɨmento, Hwe Engofo, hofɨko kikimo impoêangomo intofakohufijoêmanji ngko huhwoênnonji untofaehufe. I hofɨko kikimo poyo kumokufijoêmanji ngko huhwoênnonji wemokufe. 34 Ose ulahonɨngki Jisas ulɨmento, Pita, ngko olo hungkuno wakilɨmonneêno yohono. Olo sɨkwoêmiyo lomo tosɨka yoka mohoênyo kuntoliyopo kɨko ngkineêno mango hufaêu sɨhune ole ulɨmonnoho. Ngko Jisasɨmneêno huno maniyohoyohoho. 35 Hohonta sekwo nje hungkuno lutɨhwayoêne losehwatɨmentohe sohonta sekwo hamniyoho kiêyoênji ifɨkiêyoênji sɨfɨkwongofosyohwanji momotayoênjo imentohofofoho. Oso hohosohonta sekwo yoêmayo soêno umofonyo imentohofotaho. Ose ulahonɨngki hofɨko ulɨmentohofi, Awonoho. Umofonyo mimmentɨhwonefoho. 36 Ose ulahonɨngkofi Jisas ulɨmento, I olohonta kɨko hamniyoho hoêyo hiênjo hwosɨêmanji maho. I aêamu ifɨkiêyo hiênjo hwoêmanji osenohini womano. I aêamu hwakuhwajo ane hwoêmanji kako kakoe manjiêmofo yajɨhwosi nomêne aêamu mpe ikujoêno kako hwakuhwajo mpe uyono. 37 Hwapɨngoso aêamu Anɨtuye hungkuno mtɨêmokumentohofo sohwa hofɨko ngkineêno hungkuno ole mtɨêmokumentohofi, Hofɨko kakimo utɨmafɨkuji aêamu wonyo hwanji mɨhumatɨpitnne hweho. Oso hungkuno ngkineêno mtɨêmokumentohofoso ne umoênɨmontonoho. Yoêmayo ngkineêno Anɨtuye hungkuno mtɨêmokumentohofoso olohonta ne umoênɨmontonoho. 38 Ose ulahonɨngki hofɨko ulɨmentohofi, Hwe Engofo, kɨko uhwonyo. Nakwo hwakuhwajo hufaêu mokosyohumalohwono. Ose ulahonɨngkofi Jisas ulɨmento, Hoponoho, ose ulɨmentisofoho. 39 Jisas noswaponto kako oso hwofɨkiênyo Oulif sɨmojo sopo sahonɨngki kakoe inomokomoyo sohwa inɨngkamentohofofoho. 40 Jisas kako oso hopo sopo iêmofawento kakoe inomokomoyo sohwamo ole ulɨmento, Yamofo seêmaso sohonta wonyo pɨwesyanoho lɨkuji Anɨtumo jomo yokumpohnênyo ulɨmno. 41 Ose ulonto Jisas hofɨkimo weêenepi nonje ulɨkoêmotamentisofoho. Sawemopoêmaho. Oêo, aêamu sojo fonjontɨfi pɨwasyɨwoênɨngkiso hopa sopole humawento Anɨtumneêno hwomtame ulohofonto ole ulɨmento, 42 Mpohwo, kɨko huno ole kiyosoêmanji olo tango uêmasoso ngko wae umoêmo. Huno ose kiyosoêmanji olo tango nɨêmasoso wae feenɨmofo. I, huno ose makiyoêmanji wae yanɨmofohotoho. Jɨje hunomnohini finɨngkayo. Nje hunomo inɨngkahutoho. 43 Ose ulahonɨngki aêamu ahwomo mtaêango sohwo uêmanto Jisasɨmo yokumpohnênyo usosofitoêmentisofoho. 44 Jisas kako tango mɨkunɨmposo engo uyahonɨngki kako Mpohumo jomo yokumpohnênyo neênohini ulontanɨngki kakoe aêapaho mtaêni wokino honɨyo paênɨngo hwahopo loênɨmentisofoho. 45 Jisas kako Mpohumneêno jomo moiêwo ulosojwamofonto nolɨkafonto kakoe inomokomoyo sohwafepono umentisofoho. Kako nuêmanto uhwonɨmentisoso kakoe inomokomoyo sohwa saho fosyowentanɨngkofi uhwonɨmentisofoho. Hofɨkoe sɨmeho tango ifisyɨmofahonɨngki poênɨfo imoênontɨfi saho fosyawoêmentohofofoho. 46 Ose uhwononto ulɨmento, Sekwo saho pehoêno fosyawotofo. Filɨkapmno. Sekwo yamofo neêmasoso yahino wonyoso nopɨwesyanoho lɨkuji Mpohumo jomo ulɨmno. 47 Jisas ose ulontanɨngki hwe piênɨngo engo sohwa Jisasɨmo uêmaêmentohofofoho. Oso hwe Jutas Jisasɨye inomokomoyo aho hufaêu hopiênono sɨfe mtaêni hufaêuyo somtaêango sohwo kako aêamu piênɨngo engo huhwo sohwamo ipemotaponto Jisasɨye huyoêmo nuêmanto hinjoho uhuênɨmentisofoho. 48 Ose uhuênɨngkahonɨngki Jisas ulɨmento, Jutas, kɨko Aêamufe Hwomu sohwoênɨmo hinjoho nɨhuênɨngkinoso nje mango hwamo ujo wehontojwanɨhumneêno lantohofohino. 49 Ose ulahonɨngki Jisasɨye inomokomoyo kakoênji humunyo sohwa yoêmayo imoênone soêno nuhwonontɨfi hofɨko ulɨmentohofi, Hwe Engofo, kɨko huno ole lakiyohoho. Nakwo olo aêamu lohwamo hwakuhwajoênji wofonjosyano. Huno ose lakiyohoho. 50 Ose ulontanɨngkofi inomokomoyo fihwo kako oso hwe tajo ango syohoênjo sohwafe hwe yofe engoênjo sohwo kakoe syoho ulohofiyo sohwoe aho anga sohohnjo haloho somo hwakuhwajoênji lokuêmentisofoho. Lojwahonɨngki halohoso pɨwahuêmentisofoho. 51 Jisas ose uhwononto ulɨmento, Oso yahino wonyoso olohonta fohoênamopmno. Ose ulonto oso hwe huhwo sohwoe halohopo aho upmêmokahonɨngki halohoso wopɨngo umoênɨmentisofoho. 52 Jisas wopɨngo ose umokonto kako aêamu tajo ango syohoênjo sohwanji aêamu Anɨtuye tajo ango engo somo uhwontohumayo fefo tokusoênjo sohwafe hwe engo sohwanji aêamu Jutafe hwe engo sohwanji hofɨko kakimo aho ke-eêne pmmentohofo sohwamo ole ulɨmento, Sekwo aêamu hufo iwoênɨngkiso sohuneêno aho wokano lontɨfi hwakuhwajoênji itokusoênji lomotopalokwofo. 53 Sɨkuno piênɨngo engo somo Anɨtuye tajo ango engo somo ngko sekwoênji nohumentanɨngko sekwo ngkimo aho manɨkoêmmentohofofoho. I osoêno olohonta Setenɨye yokumpohnênyo engo imoênɨngkohoho. Osoêno sekwoe sɨkunofoho. Ose ulɨmentisofoho. 54 Jisas ose ulahonɨngki hofɨko Jisasɨmo aho kentɨfi ipemotawomentohofofoho. Ipemotawentɨfi hofɨko oso aêamu tajo ango syohoênjo sohwafe hwe engo sohwoe angomo motahumentohofofoho. Pita hofɨkimo ko inɨngkawomentisoso hofɨkimo mufantohiênyofoho. Oêo, kako poêmtopoêmtisyo humulohoêmɨwesyofoho. 55 Oso ango hopo soponjo aêamuso tojo ajwo somo toho intofontɨfi humohumantohofofoho. Osopo Pita hofɨkoênji humamentisofoho. 56 Pita kako tɨpomponaho sopo nohumentanɨngki aêmu syoho ulohofiyo fisi kako Pitamo uhwononto ulɨmento, Olo hwe lohwo huhwo Jisasɨênji humawoênɨngkiso hweho. 57 Ose ulahonɨngki Pita ulɨmento, Olo aêmu losijo awonoho. Ngko kakineêno huno maniyofoho. Ose ulɨmentisofoho. 58 Hwangku weêenepi nohumantɨfi hwe fihwo kako Pitamo uhwononto ulɨmento, Kɨko huhwosi kakoe aêamu hwosoho. Ose ulahonɨngki Pita ulɨmento, Olo hwe lohwo ngko kakoe aêamu hwonɨêmaho. 59 Pita ose ulonto oso hopo sopo neêno nohumentanɨngki mofehiênyo sɨmoême angaênohino uyakolofo somo hwe fihwo Pitamneêno hungkuno yokumpohnênyo ole ulɨmento, Hungkuno nehopiênohini walɨmonneêno yohono. Olo hwe lohwo huhwo kako Jisasɨênji humawoênɨngkiso lohwolɨkeno. Kako Ngkalilintaêango hweho. 60 Ose ko ulahonɨngki Pita ulɨmento, Olo hwe lohwo kɨko hungkuno lohinoso ngko huno manyoênjo yohoho. Ose ulontanɨngki tosɨka yoka kuntoêno hoênɨmentisofoho. 61 Ose hoênɨngkahonɨngki Jisas kako Pitamneêno ikinjamo lohofonto Pitamo uhwonɨmentisofoho. Pita kako Jisasɨye sɨmanomo uhwononto oso hungkuno Jisas Pitamo ulɨmentiso soêno huno ikwesyafɨhuêmentisoso olenoho. Olo sɨkwoêmiyo lomo yɨhufo tosɨka yoka malontanɨngkuhwoso sohonta kɨko Pita ngkineêno mango hufaêu sɨhune ole walɨmonnoho. Ngko Jisasɨmneêno huno maniyofoho. 62 Pita kako huno ose syafɨsyonto kako mempo swonto kakoe yahino wonyo soêno sɨmeho tango mɨkunɨmposo uyahonɨngki humotaho engo lɨmentisofoho. 63 Aêamu Jisasɨmo aho koêmentohofo sohwa hofɨko Jisasɨmneêno sitofo ulontɨfi ikujoho fongkuêmentohofofoho. 64 Hofɨko Jisasɨye tɨmomo hwapɨfe kotɨjɨswontɨfi ikujoho fonjontɨfi ulɨmentohofi, Kɨko huno hwapɨngoênjo sohwosi tɨhwo kufonjohoho. Kɨko huno kisyoêmanji oso hweho fonaso. 65 Ose ulontɨfi hofɨko sitofo mjalomumentohofofoho. 66 Imɨngo ne mofehiênyo sɨêmofape soênji aêamu kaunɨsol sohwa uhuêmokumentohofofoho. Oso aêamu huhwo sohwa fehohnjoso hofɨko tajo ango syohoênjo sohwafe hwe engo hwafoho. Fehohnjoso honɨngkano hungkuno lutɨhwawoênɨngkohofɨhwafoho. Aêamu sohwa hofɨko hofɨkoe kaunɨsol sohwafe pono Jisasɨmo ipemotasontɨfi ole ulɨmentohofi, 67 Kɨko yoloho fonaso. Kɨko Kɨlais Anɨtu lokuhwatɨmentiso sohwosilaho. Ose ulahonɨngkofi Jisas ulɨmento, Ngko selɨmeso sekwo ngkimo sɨmeho hiêntnnono montapɨfitnnehofo. 68 U, ngko sekumo nomêne hungkuno selohonɨmeso sekwo nje hungkunomo aku mantɨfitnnehofo. 69 I osoêno olohontaênji sɨkuno engolopohamo memjaofɨhwoso sohonta Aêamufe Hwomu sohwoêni Anɨtu yoêmayo hopiênonohino somne yokumpohnênyo hwapɨngoênjo sohwoe aho anga sohohntaêni wohumamonnoho. 70 Ose ulahonɨngki ulɨmentohofi, Kɨko sohwosi, kɨko Anɨtuye Hwomu Nehwosilaho. Ose ulahonɨngkofi Jisas ulɨmento, Sekwo ose lohofoso ngko olo huhwoênyoho. 71 Ose ulahonɨngki hofɨko hnnɨmentohofi, Kakoe mango mtaêni nto upaênɨngkuhwono. Nomêne hungkuno pehofo upoênanehwono. Awonoho. Ntaênoho. Ose hnnɨmentohofofoho.