Apousel 6

1 Osohonta aêamu Jisasɨmo inɨngkamotofoso weêe piênɨngo imoênɨmentohofoêmaho. Aêamu fehohnjo Ngkɨlik hungkunoênjofoho. Aêamu fehohnjo Hipɨlu hungkunoênjofoho. Aêamu Ngkɨlik hungkunoênjoso aêamu Hipɨlu somo yoka ulɨmentohofi, Sekwo wosopayo, hamniyoho, yoêmayoso aêamu umofonyo iyo somo uyahonɨngkofi nakwoe apɨwojo sofa weêeênohino mawoênɨngkohofofoho. Hipɨlu apɨwojo sofa engo mawoênɨngkohofofoho. Ose ulɨmentohofofoho. 2 Oso hungkunoso hoênɨngkahonɨngki aêamu apousel sɨfe mtaêni hufaêuyo sohwa aêamu hopiênono Jisasɨmo inomokommotofo somneêno joho ulahonɨngkofi nuhuêmokontɨfi ulɨmentohofi, Nakwo syoho hufaêuênjo sohwonaêni wopɨngoêmaho. Nakwo wosopayoênji hamniyohoênji yano mpoênososo Anɨtuye hungkuno pipi losetɨhwanehwono. 3 Oêo, nakwoe aêamu soku, sekwo aêamu aho fehohnjo hopiênono nomêne aho mtaêango hufaêu sohwamo uhwosopopmno. Syoho yano mpoênone soênefoho. Aêamu huhwo sohwa Anɨtuye Towahuno Wopɨngo engo yamoênnyo hwafoho. Aêamu hunoênjo sohwa aêamu hopiênonohino sohwamo hwe wopɨngoênohino hwafoho lɨwoênɨngkohofofoho. Uhwosopopijoso hofɨko wopayo yoêmayoso yano mpe syohoso womokosyohumantɨfeho. 4 Ose yontanɨngkujoso nakwo Anɨtumo isamoyoka ulɨwoênɨngkuhwasi aêamu somo Anɨtuye hungkuno wolutɨhwantanoho. 5 Ose ulahonɨngkofi, E, wopɨngofoho lontɨfi Sɨtifenɨmo uhwosopoêmentohofofoho. Sɨtifen huhwo sohwo Anɨtumo sɨmeho hiêntnnono yokumpohnênyo uyɨwoênɨmojo hweho. Anɨtuye Towahuno Wopɨngo engo yamoênnyo hweho. Nomêne aêamu sohwamo uhwosopoêmentohofoso ole, Filipɨja, Pɨloukoulasɨja, Nikanouja, Timounja, Pamenasɨja, Nikoulasɨjanjoho. Nikoulas huhwo sohwo ango kengo Antiyoukntaêango aêamu Jutafe yahino maêmentiso hweho. 6 Oso aêamu sohwamo uhwosopentɨfi apousel sohwamo utɨhwamentohofofoho. apousel sohwa aêamu huhwo sohwafe mnokinopo aho kisasyontɨfi hofɨkineêno Anɨtumo jomo ulɨmentohofofoho. 7 Oseso Anɨtuye hungkuno Jelusalem ango ayoêmo hoênɨmentisofoho. Aêamu Jelusalem humamentohofo Jisasɨmo inomokommotofoso piênɨngo engo imoênɨmentohofofoho. Aêamu tajo ango syohoênjo fehohnjo sohwa Anɨtuye honɨngkano songo tɨpemantɨfi Jisasɨmo inɨngkamentohofofoho. 8 Anɨtu Sɨtifenɨmo yoêmayo wopɨngoso ulohofahonɨngki Sɨtifen kakoe yokumpohnênyo engo imoênonto yoêmayo wonyoangkafoso imentisoso aêamu uhwonɨmentohofoso ole lɨmentohofi, Anɨtu oloso yalofoho. Ose lɨmentohofofoho. 9 I osoêno aêamu nomênehwa nolɨkafontɨfi Sɨtifenênji Anɨtuye hungkuno soêno yoka hnnɨmentohofofoho. Oso aêamu sohwa hohonta siki syoho hamniyoho momasoênjo imotofo sohwa olohonta siki humalofo. Hofɨko afapo humawoênɨngkohofo sopo ole lɨmentohofi, Ango sikinjohwa humayoênefoho. Oso ango homo somo aêamu Juta Anɨtumneêno isamoyoka angofoho. Oso aêamu sohwa ango Sailiniênji Alekɨsantɨliyaênji oso ango sopontaêango hwafoho. Hofɨkoênji nomêne aêamu Juta Silisiya hwaho Esiyantaêango sohwa Sɨtifenɨmo yoka ulɨmentohofofoho. 10 Anɨtuye Towahuno wopɨngoso Sɨtifenɨmo huno wopɨngo uyahonɨngki aêamu nomêne sohwafe hungkuno somo Sɨtifen kakoe hungkuno uyakoloêmentisofoho. 11 Osoêno aêamu sohwa sɨmano hintotohino umnɨngkahonɨngki aêamu sohwamo hwasyo joêne hamniyoho uyahonɨngkofi ole ulɨmentohofi, Olo hwe Sɨtifen sohwo kako Mousesɨmneêno sitofo lɨmaso hweho. Ou, kako Anɨtu ntnneêno sitofo lɨmasofoho. Hwasyo ose ulɨmentohofofoho. 12 Oso hwasyoso hoênɨngkahonɨngki nehopeho lontɨfi aêamu soênji hwe engo sohwanji hwe honɨngkano hungkuno lutɨhwamotofo sohwanji sɨmeho wonyo umoênɨngkahonɨngki Sɨtifenɨmo uêmantɨfi aho kentɨfi kaunɨsol uhuêmokumotofo sopo ipemotasɨmentohofofoho. 13 Osopo aêamu hwasyo ulɨfitnne sohwa mɨhumatɨêmentohofofoho. Ole ulɨmentohofi, Olo hwe lohwo Anɨtuye ango engo soêno wonyo hungkuno ulɨmasofoho. Mousesɨye honɨngkano hungkunomneêno hwotoho hmmaso hweho. 14 Olo hungkuno Sɨtifen nalɨmasofoho. Jisas Nasaletnntaêango sohwo Anɨtuye ango engo somo wae yonefoho. Oso yahino Mouses mtaêango inɨngkawoênɨngkuhwoneso Jisas wae yafɨhwosi nomêne yahino songo nejaponefoho. Oso hungkunoso Sɨtifen nelahonɨngki upaênɨmalohwonefoho. Hwasyo ose ulɨmentohofofoho. 15 Aêamu kaunɨsol sohwa nohumantɨfi Sɨtifenɨmo uhwonɨmentohofoso kakoe sɨmoêmango aêamu ahwomomjo paênyo imoênɨmentisofoho.