1 Koulin 3

1 Nje aêamu soku, hohonta ngko sekwoênji nohumanji Anɨtuye hungkuno selɨmentoheso ngko aêamu Anɨtuye Towahuno Wopɨngo hiênjo somo ulɨwoênɨngkohe paênyoso sekumo hungkuno maselɨmmentohefoho. Oêo, ngko aêamu hofɨko sɨmeho sohwo yoêmayo wonyoso umo lonte somo inɨngkawowoênɨngkohofo paênyo sokumo Anɨtuye hungkuno selɨmentohefoho. Oso hohosohonta sekwo Kɨlaisɨye yahino somneêno mehomi milongo paênyo humamentohofofoho. 2 Anɨtuye hungkuno neso tongo u wopayo yokumpohnênyo paênyofoho. I sekwo mehomi milongo paênyo soku nohumentanɨngkofi ngko amno mijoênohini sejapmmentohefoho. Anɨtuye hungkuno fehohnjoso tongo paênyoso sekwo manɨmmentohofofoho. I olohonta hohonta sekwo manɨfitnnehofo. 3 Hwapɨngoso sekwo Anɨtuye Towahuno ane paênyo soku neêno humalofo. I nomêne aêamu sekwoênji humalofo somneêno sɨmeho tohinoênji uyontɨfi yoka hnnɨwoênɨngkohofo kuyoho. Oso yahino sekwo iwoênɨngkohofoso sekwoe sɨmeho sohwo kako yoêmayo wonyo umo lonte somnohini inɨngkawowoênɨngkohofo kuyoho. Oso yahino hiso hwahopontaêangofoho. 4 Yahino angaêno yalokwofoso olenoho. Aêamu angaênohino sohwo kako ole lalofoho, Ngko Poulɨye aêamu hwoênyoho. I nomênihwo kako ole lalofoho, Ngko Apoulousɨye aêamu hwoênyoho. Oso yahino hiso Anɨtu kakoe Towahunofe yahinotaho. Oêo, awonoho. Hwahopontaêangoênohinofoho. 5 Osoêno sekwo huno ntoêno fɨsyafɨhupmno. Apoulous sohwo kako peho hwolo. I ngko Poul sohwoêni peho hwoênto. Nekwo sohwoyaêi Anɨtuye syoho ulohofiyo hwoyaêyoho. I osoêno nekwo Anɨtuye hungkuno wopɨngoso selahonɨngkuhwoi sekwo nupaênontɨfi Anɨtumo sɨmeho hiêntnnono uyɨmentohofofoho. Osoêno nakwoe Hwe Engo kako nekumo syoho angaêno angaêno ejopalofoho. 6 Ihwoni. Ngko sekwoe sɨmeho moêmo Anɨtuye hungkuno ipisayo uyo hulohofo hopa hulasehumentohefoho. Apoulous kako oso ipisayo uyo homo somjo hoja wonyo yoêmayo sofokafonte somo wae yaofahonɨngki Anɨtu kako oso ipisayo homo somo hwapɨngo sohwo kako engo imokalofoho. 7 I aêamu kako ipisayo uyo hiso hulɨwoênɨngkiso sohwo kako kakoe yofeso engoêmaho. Yofe weêeênjo hweho. U aêamu kako hoja wonyo yoêmayo sofokafonte somo wae yaofɨwoênɨngkiso sohwo kako kakoe yofe hi weêeênjo hweho. Anɨtu kako oso ipisayo uyo homo somo ne imokalokunjo sohwo kako oso hwoênohini kako yofe engo hiênjo hweho. 8 Oso aêamu kako ipisayo uyo hulalokuso sohwoênji hoja wonyo wae yaofalokuso sohwoênji sikoe syoho neso afafoho. I osoêno siko sikoe syoho sikoepi sikoepi yalokusiyo soêno sikoe syoho homo somneêno hoêyango womanjiyoho. 9 Ou, Apoulousɨênji nekwo Anɨtuye syoho ulohofiyo hwoyaêyoho. Sekwo soku Anɨtuye syoho kuyoho. Osoêno sekwo husilo husilofo pehoêno lohoêmentohofoto. Aêamu Anɨtuye syohoênjo sohwo kako ango molɨhwoênɨngkiso paênyo hweho. Sekwo Anɨtuye ango paênyo soku Anɨtu kako ango hiso molalofoho. 10 Anɨtu kako ngkimo wopɨngo ntohofonto kako kakoe syoho wopɨngo ntapmmentisoso yonji ngko ango ingkuso sɨmoêmjo hwoênyoho. Osoêno ngko Anɨtuye hungkuno selɨmentohe sohonta oso hwosaho yokumpohnênyoso nto ijuêmoêmentohefoho. U aêamu nomêne sohwa hofɨko Anɨtuye hungkuno losetɨhwalokwofo sohwa hofɨko oso hwosaho hopo sopo ango neso molalokwofo. Aêamu huhwo sohwa hofɨko oso ango hiso wonyo imoênonoho lɨkuji hofɨko huno ntoêno wasyofɨhupɨfe. 11 I osoêno sekwo huno seyohoho. Oso hwosaho ngko sɨmoêmjo ijuêmoêmentoheso Jisas Kɨlaisɨyoho. Oso hwosaho homo somo aêamu nomênehwo kako yofafɨhwosi kako nomêne hwosahoso momawonjonehoho. Oêo, awonoho. 12 Aêamu fihwo kako oso hwosaho hopo sopo ango wamolɨmo lɨhwosɨêmanji kako oso hwosaho hopo sopo nano yokumpohnênyoso nomahwosi syasyososo oso nano huhwo sohwo kako ango yokino homo somo yokumpohnênyo wokemokosyohumamontonoho. I yoêmayo holayo yokino, sɨngkume yokino oso nano poênɨfoso kako nomahwosi mtitofasyososo yokumpohnênyo mokemokosyohumanehoho. 13 I nakwo aêamu hopiênonohino hnênwi olo syoho yalokuhwone hiloso hwangku sohonta utɨhwaênyopo uêmofapmmontonoho. Oso sɨkuno Jisas Kɨlais kako nakwoe hungkuno ikwolofoêne somo asomo pososohonta yoêmayo syoho iwoênɨngkuhwone somo toho hopa nonefoho. Oso toho hiso nɨngkahonɨngkuhwosi nakwo yoêmayo syoho iwoênɨngkuhwone somo yamofo nalohofɨhwosoêno nakwo aêamu angaêno angaênohino hnênwiye syoho ne soêno huno wonayono. 14 U hwe fihwo kako ango oso hwosaho hopo sopo hofiyoêno molosoêmanji oso kakoe ango homo somo toho manonehoho. Oêo, awonoho. Oso ango hiso toho manyoênjo ntoêno molohinowentanɨngkuhwosi oso syoho iyo huhwo sohwo kako hoêyango womaêmtonoho. 15 U hwe fihwo kako oso hwosaho hopo sopo kako ango ntoêno mamojoênjo yoso sohwoe angoso toho nɨngkuhwosi kakoe syoho hopiênonohinoso wonyo umoênɨmontonoho. Syoho hiso ne ane umoênɨmontonoho. U oso syoho iyo huhwo sohwo kako hoêyangoso momanehoho. Oso hwe huhwo sohwo kako songo ko humaso sohwo kako toho mtaêni ifɨwoênɨngkohofo paênyo hweho. 16 Olo soêno sekwo inɨngo seyɨhwoloho. Sekwo Anɨtuye aêamu ne soku Anɨtu kakoe ango kuyoho. Anɨtu kakoe Towahunoso sekwoe sɨmeho ajwomoêmo humaho. 17 U hwe fihwo kako sekwo Anɨtuye ango sokumo kako wonyo semokoso sohumo u, osohumo Anɨtu kako kakimo oso wonyo hiso aku uyɨmontonoho. Wayo weeoêmtonoho. I hwapɨngoso sekwoe sɨmehoso Anɨtuye ango wopɨngoênohiniponoho. 18 Aêamu yoêmayo hwahoponjo soêno hunoênjo somo Anɨtu kako uhwononteso hofɨkoe huno neso nɨhuêno ane kuyoho ulɨwoênɨngkisofoho. Hohonta hwe fihwo Joup kako Anɨtuye hungkuno mtɨêmokumentiso sohwo ole mtɨêmokumento, Aêamu olo hwaho loponjo huno somnohini inɨngkawowoênɨngkohofo somo oso huno ne ane huhwo sohwo hofɨkimo nano mokojɨlɨpemawoênɨngkohoho. Joup ose mtɨêmokumentisofoho. Hwe nomêne Anɨtuye hungkuno mtɨêmokumentiso sohwo ole mtɨêmokumento, Anɨtu kako aêamu olo hwaho loponjo yoêmayo yoêmayo soêno hunoênjo sohwafe hunomo uhwononteso hofɨkoe hunoso ne anefoho. Ose lɨwoênɨngkisofoho. Hungkuno ose mtɨêmokumentisofoho. U, hwe fihwo kako hwasyo hungkuno hnnonoho. Aêamu fihwo kako sekwoênjo sopo humaso sohwo kako olo hwaho loponjo yoêmayo somo inɨngkawowoênɨngkiso sohwo ngko yoêmayo soêno hunoênjo hwoênyoho. Ose lɨwoênɨngkiso sohwo kako yoêmayo hwahoponjo wonyo soêno hohujo ikinjaofɨhwosi kako Anɨtuye hungkuno neênjoso womano. Oso huno wopɨngo hiso nomahonɨngkuhwosi aêamu fehohnjoso hofɨko nuhwonɨngkuji ole ulantɨfeho. Kako iloênnyohwo imoênɨngkohoho. Ose ko ulɨfijoso oso hwe huhwo sohumo Anɨtu kako nuhwonɨngkuhwosi hwe sohwo walɨmontono oso hunoênjo nto imoênɨngkohoho walɨmontonoho. 21 Sekwo nakwo aêamu hwahoponjo hnênyumo nenɨngkapɨkuji sekwo husilo husilofo ihwatɨmoênɨngkutoho. U sekwo aêamufe yofe nohoênomafɨkutoho. Yoêmayo Anɨtu mtɨêmokumentisoso sekwoênefoho. 22 I hwapɨngoso sekwo Kɨlaisɨye kuyoho. I Kɨlais kako Anɨtuye hweho. Nakwo aêamu hufaêu sɨhune ngko Poulɨênyo Apoulousɨyo Pitayo oso hwonaêni nakwo sekumo sefoêmayoêne hwonaêni humalohwono. Olo hwaho lopo yoêmayo Anɨtu hoênahumentisoso sekwoênefoho. Anɨtu kako songo humayoêne sejapmmentisoso sekwo wopɨngo humayoêne sejapmmentisofoho. Poyo peênyo sejapmmentisoso sekwo ango songo neêno humayo sopo tɨpɨhwonyoêne sejapmmentisofoho. Yoêmayo hopiênono olohonta wojo soênji tɨfi noêmo imoênone soênji Anɨtu kako sekumo sefoêmayoêne sejopalofoho.