Taitus 1

1 Dzi Paulus, Anutu mamaê guman da Yisus Kristus aposelan. Itangin dzi ifa i rima Anutu ampanggan runggan piriangêan igi sib i nanga i nanggan muarutsan babampafan da utusa ribarangan i sruêa i nan nidzun da atsungêa Anutu sanaban rururungan. 2 Da ribarangan narim maran i nam mpada ratar ntingan Anutu ragadan da miamun bingan ugu, gubuê Arangan mamida i tanginda nam santan, i Anutu anungê inang da isu umpur u. 3 Da gubuê gan ragadan rururungan, da Anutu, aru rima agi sib, ikupis nanggan igi wasi imingê gum fisa i nan Arangan riman da faida nan i dzi nangan. 4 Dzi yakar nan ani ibiaê da agu Taitus, dzi narunggangê nidzun yaba i agi nanggangê muarutsan. Ramangê Anutu da Yisus Kristus, Garam rima agi sib, maraampi gan da nanggan nufan narut agu. 5 Dzi tangin agu rai i intap Krit i wain ibiani, u tipa gum agi mamida i ntsupan ugu da ragada garam gudzun ruas mingêa gamp igi santan bida dzi nidan da agu ugu. 6 Da u nida ragada garam gudzun bits bits igi, da ampan anungê tsanganda asub mingêan da arangan u: maran nari i fininggan arigi angu, da gan narun rusan namuaruts da natangê warangê i nan da bingan namaê i nam maisan. 7 I wain, garam gudzun igi isu wain i mpada tayangê Anutu guman da garam muarutsan gan, ibinigi da ampan anungê tsanganda asub mangan mingêa da arangan u: anungê garam tsarifa runggan i rib atsungêa gin, ma wangun yaba sung sung, ma numa mpui ngkiangan yusan, ma suda gudzu uris, ma iyuêa nam i uda nam bunump ampi bingan u. 8 Da bitsintaê arangan nasu garam isa yaring i garam, da maran arida i sanab bini, da uwayantan nawaê bini i mpada tayangê runggan i nanggan santan nangan, da atsungêa sanab mararam da rururungan, da mpada tayangê wangunggan da tipa banginggan da faganggan bini. 9 Da arangan namuaruts sisingê bini aru ringanta gin sib ugu babampafan, i nan igi nan nidzun bingan. Da bida nanga bida nigi, da arangan bungê asangê i santingêan da utusa ampan i nan nidzun, da raruda garam rima ub i sisingê bini igi. 10 I garam ampi bingan mamida i atangêa warangê i nan rumpai. Garam igi garam nida nan umpur nidzun maêan da iyuêa nam. Da utup aru nida nan babampafan i garam santan safa rinin igi imais iyus rib santan arigi. 11 Wani da ribarangan nantsup i nan bida nigi, i ribarangan ifis i nan umpur da irintsum utup fain nanggan muarutsan i uda nam bunump in. 12 Mungê ugu da rib Krit garaman mararuru mangan runggan ini biani, “Garam Krit garam iyuêa nam, da garam bida apu buman maisan, da garam gada nam funub angu da guman nangan maêan." 13 Nan igi nan nidzun. Ibinigi da wani nan riniurun da ribigi da wasantingê i nanggan maisan rutin, da ribarangan namuaruts Anutu nan nidzun gan 14 da anungê ringanta i rib Yuda rabu rabun gan mungê ugu nan umpur umpuran fisa gin, ma nan faidagin waêa mingêa garam gar aru rima barun da nan nidzun u. 15 Rib wangun sapan mingêa Anutu maranggan, da nam mangan â bida nam gadan mara maran fain â wasangê i nanga ribarangan bubumpuadan u. Da bitsintaê rib wangun bubumpuadan da mamida i muarutsa Yisu, da nam mangan wasangê i nanga ribarangan sapan u. Imaê, uwayantan ibubumpua da wasruê i sanab bini da maisan u. 16 Ribarangan ini isruê i Anutu, da bitsintaê gan sanaban isantingê ibi irim barun da Arangan. Gan sanaban imais wasi imingê Anutu maranggan, da watangê warangê i nanggan, da wasangê i nanga nam bini mangan u.