Lukas 10

1 Raiyi da Nifutsarif iraga rib fain atsungêa gin isangê 72 da itangin ribigi iruê iruê gin imungê ifa gamp tsiraê da isiê santan Arangan maran fura i fada gin. 2 Arangan ini da ribarangan, “Nam gum atiê iyus, da bitsintaê garam gum iruê angu. Ibinigi da wagut i gum Ramanggan i rima mamaê gum i ufuma nam nidzun mpruêan. 3 Wafan! Dzi tangin agam iwaê ifan ibi dumpa mingêa wasaê i iyam buman. 4 Anungê uda nam farangêa moni gin, ma tayap tsiraê, ma faga gakang. Da anungê nida nan faga guntiê da rib fain mingêa sanab. 5 “Gubuê agam atangêa ungar mangan da wani, ‘Anutu nan nufan gan narut agam.’ 6 Da bida garam ungar igi garam nan mantsingan da nan nufan bungê arut arangan. Da bida maêan da Anutu nanggan nufan wasangê i ruta arangan; bungê atip aba da agam. 7 Wampa ungar arigi, da wagan da wanum nam idzuwai ribarangan riman da agam, i nigi iwaê ibi garam gum nam ntsuman gan. Da anungê mpada yunga ungar ungar u. 8 “Da bida gamp idzuwai agam fada gin da isa yaring i agam da waga nam idzuwai ribarangan riman, 9 da watip rib rinin gingêan nigi da wani da rib gamp igi, ‘Anutu nanggan mpada tayangê gan garaman iba su uts da agam sib.’ 10 Da bida gamp idzuwai agam fada gin da mamida isa yaring i agam da wawaê wafa sanab da wani, 11 ‘Agam ngaruntsuafam mingêa aga fagangê ani aga tsafuts rai i santingêa Anutu nugun tsakia gan ibiaê da agam, da bitsintaê wasruê i nan ani: Anutu nanggan mpada tayangê gan garaman iba su uts sib.’ 12 Dzi nani da agam, gubuê raruda garam santan, da garam gamp igi bungê awaê da barabin tsiraê bingan nayus garam Sodom. 13 “Agam garam Koradzin watsauê i runggam! Agam garam Betsaida watsauê i runggam nabinigi! Anutu nampanggan dzi santingêan da agam ugu dawaê damingê Taia da Saidon, da ribigi madayiê i pap da madaatsuf umpuaf i santingêa bida ribigi iparim i ruan. 14 Da bitsintaê, waêa gubuê raruda garam santan, da agam bungê awaê da barabin tsiraê bingan nayus garam Taia da Saidon. 15 Agam garam Kepenaum, agam maram ifur i Anutu uda agam yaba gunungun, a? Imaê! Arangan bungê atapu agam naruê mumai garam mampan uda tsakia gin mingêa ratar." 16 Da ini da riban atsungêa gin, “Manga bida ringanta i agam da iringant i dzi, da manga buginda agam da ibugin dzi, da bitsintaê rib idzuwai buginda dzi igi da ibugin garam tanginda dzi badan." 17 Raiyi da rib 72 igi itip ibawaê da nam nugun tsiaêan da ini, “Nifutsarif, aga ni u binganggam da marapayam maisan iringant i nan da iwaê manaê." 18 Da Arangan ini, “Dzi tsangan Sadang iruaê imingê gunungun ibi tsuarip prikan. 19 Waringantin, dzi rim nampang ibiaê da agam i yaba ragun i mur da nifumafai da agam nampanggam iyus garam ipiap Sadang gan, da nam mangan wasangê wayada agam u. 20 Da bitsintaê nugum anungê tsiaêan i marapayam maisan iringant i agam, imaê, nugum watsiaê i yakar agam binganggam i gunungun sib wa." 21 Gubuê arigi da Marapayam Mararam isisungê Yisu i nam nugun tsiaêan, da Arangan ini, “Dzi tsarif Agu, Ramangê Nifutsarif gunungun da intap, i U dzigin nam ani i garam mararuru da uwayant tsiraê da U santingê wasi da garam uwayantan waêa bida mamaê naru narun. Hai, Ramangê, nigi U tsanga iwaê bini imingê U maranggam." 22 Da Yisu itip ini, “Dzi Ramanggangê irim nam santan da dzi. Da manga wasruê i Narun u, imaê, Raman angu. Da manga wasruê i Raman u, imaê, Narun angu da rib Narun piriangêan angu i santingêa Raman wasi rutin." 23 Ida Arangan itam i ruan da ini da riban atsungêa gin angu ibiani, “Agam nugum watsiaê i nam santan agam tsangandan. 24 I dzi nani da agam, profet da king ruas ampi bingan maran yari i tsanganda nam agam tsangandan, da bitsintaê anungê itsangan, da ringanta i nan agam ringanta gin ani, da anungê iringantin." 25 Da garam gudzupuê i nan faidagin imunti da yintsaê Yisu i nan guta gin ibiani, “Kidungwaga tsiraê, dzi bunanga bida anungê i waêa da nam mpada ratar ntingan?" 26 Da Yisu ini arangan nanggan mungaê, “Da u faris nan faidagin Moses akaran ugu ibianungê?" 27 Da garam igi ini, “U maram wari i Nifutsarifam Anutu namingê u wangunggam santan da ganunggam santan da riniurun gam santan da uwayantam santan. Da maram wari i u rinum rusam nabi u maram arida i runggam." 28 Da Yisu ini rutin, “U ni nan rururungan. Wanang wabinigi da u bungê awaê da nam mpada maran taêan." 29 Da bitsintaê garam gudzupuê igi inang i rima runggan sib, ibinigi da igut i Yisu, “Mangan igi isu dzi rinungê rusangê?" 30 Da Yisu ini ibiani, “Gubuê mangan da garam mangan imingê sanab Yerusalem iruê Dzeriko, da garam wapa nam impung arangan. Da ribarangan itsiar i gan ngarukui gan da yis arangan fafarab angu, imamp asub da itangin arangan da rungê igingê. 31 Da garam pumuêa Anutu mangan imingê sanab arigi da gubuê arangan fa tsanganda garam igi da isariê sanab ringan gin ya ifa gan arun. 32 Da garam rima gum sib mingêa Ungar Mararam mangan ibinigi gubuê aranga bawaêa mumai aru nigi da tsanganda garam igi da arangan isariê sanab ringan ibinigi. 33 Da bitsintaê garam Samaria mangan ifan da ifawaê garam igi gan gingêa gin, da gubuê arangan tsanganda garam igi da maran intuê gin. 34 Arangan ifa rutin da iyats wain da madamin i rini maisan da ipatiê sib. Ida itangin garam igi iyab dongki gan da iyu arangan ifa ungar ampi gingêa gin da impa tayangê gin. 35 Gubuê pisa maiê da garam igi iyu moni silva iruê da irim da garam mpada tayangê ungar igi i mpada tayangê garam igi. Da ini, ‘Watsanga arangan sib, da bida u rima aranga sib yusa nam ntsuman dzi riman da agu, da gubuê dzi tipa badan, da dzi bungê arim u nam ntsuman gam mungaê.’" 36 Da Yisu ini, “U maram ifur garam iruê da bits gan idzuwai aru nigi isu rinunggan i garam waêa da barabin i garam maisan banginggan igi?" 37 Da garam gudzupuê i nan faidagin ini, “Garam aru maran gaiba garam igi.” Da Yisu ini, “Wafan da wanang wabinigi." 38 Gubuê Yisu da riban atsungêa gin yunga fadan da iwaê gamp mangan. Da sagat mangan binganggan Mata itus muantsi i gan ungaran da iyu Arangan iyab. 39 Da aranga rainggan binganggan Maria, arangan impa uts da Yisu da irim ringan i nan Yisu nidan. 40 Da bitsintaê Mata ifa iba iyus angu i tipa nam gadan. Da arangan iba da igut i Yisu, “Nifutsarif, anungê bini i dzi rainggangê ruta agu mpadan da dzi nanga gum santan angu gin. Isangê u nidan da arangan i barima dzi sib, ma?" 41 Da Nifutsarif ini da arangan, “Mata, Mata, u wangum ibarabin da u maram ifur nam ampi bingan, 42 da bitsintaê maram wafur nam bitsintaê angu. Maria iyu nam bini sib, da mangan wasangê i siata rai sinungê arangan u."