Yowanis 11

1 Garam bits binganggan Ladzarus igingê rinin. Arangan irut nafun rusan Maria da Mata impa gampan Betani. (Maria igi sagat aru raiyi da arangan imus yatsa madamin gaunt bini ruêa i Nifutsarif fagan da tiasa i gudzu yafanggan.) 3 Ibinigi da Maria da rainggan Mata irim sisingê ifan da Yisu ibiani, “Nifutsarif, u garamam maram aridagin ugu igingê rinin." 4 Gubuê Yisu ringanta i nan igi da ini binaê, “Ladzarus anungê igingê rinin i mampa funub u, imaê! Igingê i garam tsarifa Anutu da Anutu Narunggan uda bingan tsiraê gin." 5 Yisu maran yari nidzun i Maria da rainggan Mata da nafunggan Ladzarus. 6 Ibinigi da gubuê Arangan uda Ladzarus sisingê gan gingêa rinin igi sib da Arangan rungê impa imingê nigi isangê gubuê iruêrun raiyi. 7 Ida ini da riban atsungêa gin ini binaê, “Agi natip afa intap Yudia." 8 Da riban atsungêa gin ini rutin ibiani, “Rabai! Anungê gubuê fain ifa sib u, da garam Yuda inang i tapuda agu funub i tauf, da u ni tipa fadan, a?" 9 Yisu ini ibiani, “Gubuê pis santan gubuê maran gan isangê 12. Da bida manga yungêa da gubuê da arangan wasangê i utuda fagan i nam mangan u, i arangan irarab nam puatsadan arida intap ani. 10 Da bitsintaê bida garam mangan yungan da nam mimindan da bungê autu fagan, i nam puatsadan anungê imingê wasaê i arangan u." 11 Yisu ini nan igi sib da itip ini da ribigi ibiani, “Agi rinunggangê Ladzarus igingê marampruê, da bitsintaê dzi bungê afan da nais arangan marataê." 12 Da gan riban atsungêa gin ini arangan nifunggan mungaê ibiani, “Nifutsarif, bida arangan gingêa marampruê da rinin bungê adaum." 13 Ribarangan ibuni Yisu nida Ladzarus gingêa marampruê angu, da bitsintaê Arangan ini i Ladzarus imamp funub sib. 14 Ibinigi da Yisu ini nan wasi da ribarangan ibiani, “Ladzarus imamp funub sib. 15 Da bitsintaê dzi marangê ifur agam bini gam da dzi nugungê inuf i dzi anungê irut arangan impai da gubuê arigi u, i agam isangê i muarutsa dzi. Da bitsintaê aruani, da agi fadan da tsanganda arangan." 16 Tomas (faringêa Didimas ) ini da rib ruta arangan atsungêa Yisu igi ini ibiani, “Ariê! Agi fadan da ruta mpruêa ruangê mampan." 17 Gubuê Yisu fawaêa uts da gamp Betani da iyu sisingê rima Ladzarus sib mingêa badzab gampan sangêa gubuê iruê da iruê sib. 18 Gamp Betani igi imingê uts pas angu da gamp tsiraê Yerusalem isangê ibi 3 kilomita, 19 da rib Yuda ampi bingan iba da Mata da Maria i yafada iruê igi wangun i nafunggan nanggan mampan igi. 20 Gubuê Mata ringanta i nan Yisu badan da ifa sanabin. Da Maria rumpa ungar. 21 Mata ini da Yisu ini biani, “Nifutsarif, u madani mpadan da dzi nafunggangê wasangê i mampan u. 22 Da bitsintaê dzi tsangan wa, gubuê maran anungê intsup i u rima arangan sib u! U nida udagin i nam idzuwai da Anutu bungê arim da agu." 23 Yisu ini da arangan ibiani, “U nafunggam bungê atip namunti marataê." 24 Da Mata ini, “Hai, dzi sruê gin wa. Waêa gubuê buntun da arangan bungê arut garam sib angu namunti marataê." 25 Yisu ini da arangan ibiani, “Muntida maran taêan da mpada ratar wain dzi. Manga muarutsa dzi da bida mampan, da rubungê ampa maran taêan. 26 Manga mpada marataê da muarutsa dzi da anungê isangê i mampan u; bungê ampa ratar angu. U muaruts nan igi, ma?" 27 Mata ini da Arangan ibiani, “Hai, Nifutsarif! Dzi muaruts Agu Kristus, Anutu Narunggan, aru Anutu ragada i tanginda bada intap ugu aruani." 28 Gubuê arangan ntsupa nan nidan igi sib, da itip ifan da ifanuê rainggan Maria iwaê ba manaê sinungê rib ruta mpadan igi da ini rutin ibiani, “Kidungwaga ibawaê sib da ini tsanganda agu." 29 Gubuê Maria ringanta gin da sungê angu yuriê ifan da Yisu. 30 Da Yisu wawarip yatangê gamp igi u; rungê impa mumai aru Mata fawaêa rutin igi. 31 Gubuê garam Yuda ruta Maria mpada ungar igi i yafada i wangun tsanganda arangan suda rinipuat da tanginda ungar rai da fadan, da ribarangan yatsungê gin, i ibuni arangan fada tauf bampun i rangan. 32 Da gubuê Maria fawaêa mumai aru Yisu mpada gin da tsanganda Arangan, da ifa tuê iruê Arangan fagan da ini, “Nifutsarif, U dampai da dzi nafunggangê wasangê i mampan u." 33 Gubuê Yisu tsanganda Maria rangan da rib Yuda ruta badan igi singisiang muntidan da wangun ibarabin da nugun imais nidzun angu. 34 Da Yisu igutin ini binaê, “Agam irim arangan i nanungê?” Da ribarangan ini, “Nifutsarif, waba da watsangan." 35 Da Yisu irang. 36 Ibinigi da garam Yuda ini da ruan, “Watsangan! Arangan irim wangunggan nidzun angu i garam aga." 37 Da bitsintaê gan fain ini binaê, “Garam igi itip garam maran gampaman idaum, da madarim garam aga sib i mamida i mampan." 38 Yisu nugun imais nidzun angu da iyung ifa tauf bampun rima badzab in igi. Da tauf tsiraê mangan itsungin tauf bampun nifun igi sib. 39 Yisu ini da ribigi ibiani, “Warimpingê tauf tsiraê aga rai i tauf bampun nifun igi.” Da bitsintaê Mata, garam mampan igi nafunggan, ini binaê, “Nifutsarif, U sruê gin sib wa, Ladzarus igingê gubuê iruê da iruê sib da ifufin maisan." 40 Da Yisu ini, “Dzi wanani da agu sib i bida u muarutsan, da agu bungê atsangan Anutu nampanggan?" 41 Ibinigi da ribigi irimpingê i tauf tsiraê iwaê manaê sinungê tauf bampun nifun. Da Yisu idantang iyab da ini, “Ramangê, dzi rim dangki da Agu i wain, U ringant i dzi nanggangê udagin sib wa. 42 Dzi sruê gin sib i gubuê sib angu da U ringant i dzi nanggangê udagin. Da bitsintaê dzi ni nan igi i rib muntida ani ringanta gin da muarutsa bida U tangin dzi iba." 43 Nida nan igi sib da inuê nifun tsiraê bingan ini binaê, “Ladzarus, wawaê ba!" 44 Da garam mampan ugu iwaê ba impruê da bangin da fagan patiêa sib i bruê dzufungêan da bruê buafira arangan maran sib in ugu. Da Yisu ini da ribigi ibiani, “Wapiraê bruê patiêa arangan gin aga rai da watangin arangan nayung." 45 Ibinigi da garam Yuda ampi bingan bada mpruêa da Maria ugu da tsanganda nam Yisu nangan igi imuaruts Arangan. 46 Da bitsintaê fain ifan da rib Farisai ruas da ini nam Yisu nangan ugu wasi da ribarangan. 47 Da garam pumuêa Anutu wain gudzun rusan irut garam Farisai inuê garam Yuda gudzun rusan utupan tipa nan, faringêa Sanhidrin gin, impruê da igut i ruan ini binaê, “Agi nanga nam bida anungê? Garam aga nang nam maran mangan ampi bingan iyus angu. 48 Bida agi tusa marangê i arangan da runanga bida naga da rib ampi bingan angu bungê amuaruts arangan. Da garam Rom bungê aba da nawaya agi Ungarangê Mararam da agi garamangê santan." 49 Da gan mangan mingêa wasaê i ribarangan binganggan Kaiafas impa ibi garam pumuêa Anutu wain gudzunggan tsiraê da gubuê igi, da arangan ini binaê, “Agam wasruê i nam mangan u! 50 Agam madasruê gin i bini iyus i garam bitsintaê angu mampa i uda ampan tsiraê mumai gan; anungê bini i agi garam Yuda santan rima runggangê rai u." 51 Kaiafas runggan wani nan igi i gan uwayantan u, imaê. Arangan impa ibi garam pumuêa Anutu wain gudzungan tsiraê da gubuê arigi, ibinigi da ini nan profet igi wasi i Yisu bungê amamp i rima garam Yuda sib, 52 da anungê ribarangan angu u, imaê. Bungê amamp i uda Anutu narun rusan mpada ruga rugan basuda garam utup bitsintaê. 53 Da mingêa gubuê arigi da fadan da garam Yuda garaman gudzun gudzun igi itip nan i isa Yisu funub. 54 Ibinigi da Yisu watip iyung da ikupis runggan wasi imingê garam Yuda maranggan u. Itangin nigi rai da ifa gamp Ifraim mingêa uts da nam manaê dadauntan da ifa rut riban atsungêa gin impa imingê igi. 55 Garam Yuda gubuê gan mararam tsiraê Angira Atupa Sib isu uts, da garam ampi bingan imingê gamp ruga rugan iyab Yerusalem i nanga runggan suda mararam i Anutu maranggan mungê i gubuê tsiraê igi. 56 Ibinigi da ribigi isau Yisu da imunti Ungar Mararam da igut i ruan ini binaê, “Agam maram ifur nan ibianungê? Arangan bungê aba i gubuê mararam tsiraê ani, ma imaê?" 57 Da garam pumuêa Anutu wain gudzun rusan da garam Farisai ini nan wasi i manga nida tsanganda Yisu mpada anungê da nabani rutin i ribarangan mpunga Yisu.