Miamun 50

1 Yosef impai iruê da igingê ragun i raman da irang da itsutsuf arangan. 2 Da irang sib da ini da garam tipa garam mampan riniuriatsan i mingêa gubuê guntiê i tipa arangan ramanggan riniuriatsan. 3 Sanab tipa Yakop riniuriatsan igi iyu gubuê 40, yatsungê gum igi gubuê gan rururungan. Garam Idzip irang i arangan isangê gubuê 70. 4 Gubuê ranga i Yakop ntsupa sib da Yosef igaib runggan da King Farau garam gudzun gan ibiani, “Isangê agam uda dzi nifunggangê fadan da king da nidan da arangan bida ani, 5 ‘Gubuê dzi ramanggangê nanga i mampan, da arangan ini da dzi taga ruangê da arangan, i dzi tipa uda arangan riniuriatsan fada intap Kanan, da rima mingêa tauf bampun arangan runggan rafan. Da isangê u tusa maram i dzi da dzi farima ramanggangê sib, da dzi musa tipa badan?’" 6 Da king iringant i Yosef nanggan da ini ibiani, “Wayab da warim ramanggam nasangê u nanggam tagada ruam rutin." 7 Ibinigi da Yosef iyu ramanggan iyab i riman. King garam gudzun gan ampi bingan irut Yosef impruê ruan fadan â garam mpada tayangê king ungaran da garam suda wain i gamp fain mingêa Idzip, 8 impruê da Yosef utupan da rain rusan santan da ramanggan utupan santan. Da narun rusan mpruêan da apu gan angu rungê impa imingê intap Gosen. 9 Garam mpada karis da garam mpada hos irut arangan impruê ruan yaban. Da rib fadan igi utup tsiraê bingan. 10 Gubuê ribarangan bawaêa mingêa mumai tura wit i uda nidzun gin mingêa Atad, uts da mpui Yordan, da singisiang tsiraê bingan imunti i Yakop. Da Yosef itip impa i ramanggan i nigi isangê gubuê 7. 11 Garam Kanan mpada gamp igi itsanga nam pumuêa badzab mingêa mumai tura wit gin mingêa Atad da ini, “Garam Idzip aga isantingê nam maran gaiban tsiraê bingan.” Ibinigi da ifaringê mumai igi Abel Mitsraim, wainggan ‘garam Idzip maran gaiban gan’. 12 Ibinigi da Yakop narun rusan yatsungê nan ibi arangan nidan da ribarangan: 13 Ribarangan iyu ramanggan ifa Kanan da irim i tauf bampun mingêa intap Makpela, uts da Mamri, intap Abraham rima nam ntsuman gin da Efron, garam Hit ugu, isu mumai rima badzabin. 14 Gubuê Yosef rima ramanggan sib da irut rain rusan da rib ruta fadan ugu impruê ruan itip iba Idzip. 15 Gubuê Yosef rain rusan tsanganda bida ramanggan mampa sib da ini ibiani, “Bida Yosef maran rufura asub agi nanga rutin ugu da bubida anungê i agi?" 16 Ibinigi da ribarangan irim nan ifan da Yosef da ini ibiani, “U ramanggam irim nan bida ani mungê da agai da imus mampan: 17 ‘Agam wani wabiani da Yosef: Dzi gut i agu i u siata raim rusam nanggan maisan nanga yaba i agu.’ Ibinigi da maram wantuê ramanggam Anutu gan garam guman agai da wasiat aga nanggangê maisan rai.” Gubuê ribarangan nanggan fawaêa da Yosef, da arangan irang. 18 Da arangan rain rusan impruê ruan iba da yidzaê fagan da itauf maran iruê arangan maran da ini, “Aga rim runggangê da agu isu u garam gumam utaê angu." 19 Da bitsintaê Yosef ini, “Agam anungê ratan u. Dzi wasangê i uda Anutu mumai gan da rima nam mungaê da agam u. Imaê. 20 Agam ini wayada dzi da bitsintaê Anutu yitam i agam nanggam maisan igi isu nam ngarubini, i rima garam ampi bingan nanggan mpadan sib. Da iwaê ibinigi. 21 Ibinigi da agam anungê ratan u. Dzi bungê arim agam da narum rusam sib.” Da Yosef iyafa rain rusan wangun i nan mantsingan bida nigi. 22 Yosef da rain rusan da gan utupan impa Idzip. Arangan impa isangê udzuf 110, 23 da itsangan narunggan Ifraim rumpun rusan. Da arangan iyu Manase narunggan Makir narun rusan isu i gan ibinigi. 24 Da Yosef ini da rain rusan ibiani, “Dzi su uts i mampan. Da Anutu bungê ampa tayangê agam da nau agam sinungê intap aruani nafa intap arangan ragada mungê da Abraham, Isak da Yakop ugu." 25 Da Yosef ini da Israil narun rusan i tsafa ruan nidzun angu da ini, “Gubuê Anutu uda agam waêa sinungê intap ani da agam wau dzi riniuriatsangê nampruê." 26 Ibinigi da Yosef udzufan waêa 110 sib da imamp da itip riniuriatsan i mingêa gubuê guntiê da irim i bugis da igingê Idzip.