Miamun 45

1 Nam rangan iyab Yosef sib imingê garam guman maran, da iwat ribarangan ini binaê, “Agam santan wawaê sinungê dzi maranggangê.” Ibinigi da mangan warut Yosef impai da gubuê arangan santingêa runggan wasi da rain rusan. 2 Da arangan irang nifun tsiraê bingan da garam Idzip iringantin, da king da riban santan mpada king ungaran iringant i nan igi. 3 Da Yosef ini da rain rusan ibiani, “Dzi Yosef! Dzi ramanggangê rungê impai ma imaê?” Da bitsintaê rain ruas wangun isantan ruan sib, da irat i arangan da wasangê i nida nan mangan u. 4 Da Yosef ini da rain rusan ini binaê, “Agam waba uts angu da dzi.” Ribarangan iba uts da rainggan Yosef da arangan ini ibiani, “Dzi Yosef, agam rainggam aru agam uda nam ntsuman gin da tangindan da garam nam bunump uda bada Idzip ugu ani! 5 Da aruani da agam wangum anungê barabindan da tsakiada i runggam tuaê i tanginda dzi bada ani u, imaê. Anutu itangin dzi imungê iba ani i agam i rima santan angu sib. 6 Gubuê fus nam gadan maêan imunti isangê udzuf iruê angu da aruani, da udzuf 5 rumingê da garam mangan wasangê i suda gum da waêa da nidzun u. 7 Anutu itangin dzi imungê iba i agam i rima agam sib i rungê utusa i agam da yangin rusam nanggam mpadan. 8 Da agam anungê itangin dzi iba ani u. Imaê. Anutu angu. Da itangin dzi su king garaman santingêa sanab da mpada tayangê king gampan da intap Idzip santan. 9 Aruani da agam wafa sung angu da ramangê da wani rutin, ‘U narunggam Yosef ini ibiani: Anutu itangin dzi isu garam gudzun tsiraê da dzi mpa tayangê intap Idzip santan. Wauriê da waba sung. 10 U bungê aba mpa namingê intap Gosen uts da dzi i nangan da dzi tsanganda agu ragunâ agu da narum rusam da rumpum rusam da gam dumpa gam, nuning gam, makau gam da nanggam santan u suda wain gin. 11 Waba mpa nigi i dzi rima agu sib. Gubuê tsiraê nam gadan maêa sib ani rubungê amunti nasangê udzuf 5, da dzi bugin i agu da gam utupam da apu gam santan sauda nam gadan.’" 12 Da Yosef ini, “Agam da dzi rainggangê Benyamin watsangan da wasruê gin i dzi Yosef rururungan ani ini nan da agam. 13 Agam wani da dzi ramanggangê i bingan tsiraê dzi udan mingêa Idzip da nam santan agam tsangandan. Da agam wau ramangê naruê ba ani sung." 14 Arangan impung rainggan Benyamin da irang funub angu, da Benyamin impung arangan da irang impruê ibinigi. 15 Rungê irang da itsutsuf rain ruas igi santan ibafan. Intsup sib da rain ruas imus ruta fisa i nan da ruan. 16 Gubuê sisingê waêa da king mingêa gan ungaran tsiraê i Yosef rain rusan bawaêan, da king da gan garam gudzun gudzun gan nugun itsiaê gin. 17 Arangan ini da Yosef ini binaê, “Wani da raim rusam i tipa dongki gan da tipa fada intap Kanan. 18 Wani da ribarangan i uda ramanggam da gan utupan da tipa bada ani. Dzi bungê arim intap ngarubini bingan mangan yusa intap santan mingêa Idzip i ribarangan mpada gin da gada nam bini bini gin. 19 Wani da ribarangan nampruê i uda karis fain mingêa Idzip ani nafan i uda narun rusan da finin rusan da ramanggam naba ani. 20 Maran anungê fura nan ampi bingan i nam bunumpan tanginda rai mingêa intap Kanan igi u, wain ibiani, dzi bungê arim nam bini bini ampi bingan mingêa intap Idzip ani da ribarangan." 21 Ibinigi da Israil narun rusan inang ibi king nidan. Yosef irim karis fain da ribarangan yatsungê king nifunggan nidan. Da irim nam gadan da ribarangan i gan sanaban tipa fadan. 22 Da irim ngarukui faê faê isangê ribarangan santan. Da bitsintaê Yosef irim ngarukui 5 impruê da 300 silva, barabin gan isangê 3.5 kilogram, da Benyamin. 23 Da arangan iyu nam bini bini ampi bingan mingêa Idzip da itangin iyab dongki arapuê 10 ifan da ramanggan, da itangin nam gadan rima i ramanggan sib i sanab tipa badan iyab i dongki rinan 10. 24 Yosef itangin rain rusan ifan da ifai nan i ribarangan ibiani, “Agam anungê suda ufuai da rungam mingêa sanab fadan u." 25 Ibinigi da ribarangan itangin gamp Idzip rai da itip ifan da ifawaê da ramanggan Yakop imingê intap Kanan. 26 Waêa sib da ramanggan da ini rutin ibiani, “Ramangê, Yosef wamamp u; rumpa marataê! Arangan isu garam gudzun tsiraê impa tayangê intap Idzip santan.” Yakop iringantin da wangun isantan ruan sib, da wamuaruts nan igi u. 27 Da bitsintaê gubuê ribarangan fisa i nan santan Yosef nidan da tsanganda karis Yosef tanginda badan i uda arangan tipa fadan igi, da arangan itangin wangun iruê. 28 Da Israil ini ibiani, “Nan nidzun bingan! Dzi narunggangê Yosef rungê impa marataê. Dzi nafan da natsanga arangan sib raiyi, ida dzi namus mampan."