Miamun 41

PNG

‹ Chapter 40 Miamun — All Chapters Chapter 42 ›

1 Gubu� udzuf iru�run fada sib da King Farau ipuafub da itsangan arangan muntida mpui Nail ringan, 2 da itsangan makau dudubadan bini 7 wa�a mpui Nail yaba ba da gada sai mpui ringan. 3 Da itip itsangan makau 7 gangkidan muntida urun uta� wa�a mpui Nail atsung�a yaba ba da bamuntida sarimpa makau dudubadan 7 ugu ming�a mpui ringan. 4 Da itsangan makau gangkidan gada makau dudubadan 7 igi sib. Da Farau maran ita�. 5 Arangan itip iging� marampru� da itip itsangan nam puafuban mangan, da itsangan dzangkum wain bitsinta� kapa nidzun 7 da iwa� maran bini angu. 6 Rai da dzangkum wain mangan gubu� garadan da kapa nidzun 7 maisan angu da fing�a i ruan iyab impru�. 7 Da dzangkum nidzun fing�a i ruan sib intap i dzangkum nidzun bini 7 ugu sib. Farau maran ita� da isru� gin ibi arangan ipuafub angu. 8 Pisan da arangan iyu uwayant ampi bingan i nanggan puafuban igi, da itangin nan i garam mararuru da garam kupisa nam maradzigin santan ming�a Idzip iwa� impru�. Da Farau ifis i nanggan puafuban tsangandan igi da ribarangan. Da bitsinta� ribarangan imami ruan i dziwara arangan nanggan puafuban igi wainggan. 9 Da garam suda wain i king wain gurun gan ini da king ibiani, “Aruani da dzi marang� ifur asubang� tsafa ruang� gin i nangan, i dzi marang� isamu ruang� sib. 10 Gubu� mangan da agu King nugum irua� i garam guman agai, dzi da gam garaman mpada tayang� u ungaram bret, da u rim agai i karabus iming� u garamam singaari garam gudzunggan ungaran nanga gumin. 11 Da idziang mangan aga iru� igi iwa� da nam puafuban, da aga nanggang� puafuban igi wainggan da ruga rugan. 12 Gubu� arigi da garam rinifa� Hibru mangan, garam singaari gudzunggan garam guman, irut agai impai karabus. Aga fis i nanggang� puafuban rutin da arangan idziwar i aga nanggang� igi wainggan da agai. 13 Da nam santan arangan ragidan da agai igi iwa� isu nidzun. Dzi tip iyu gumang� da u rugu garam mangan ugu." 14 Ibinigi da King Farau iwat garam gum ifan da iyu Yosef sung angu sinung� ungar karabus da irut iba. Yosef inab mun da yatsuf nanggan fa� sib da iba munti King Farau maran. 15 Da King Farau ini da Yosef ibiani, “Dzi wa� da nam puafuban mangan da manga wadziwar i dzi nanggang� puafuban igi wainggan wasi da dzi u. Da bitsinta� garam mangan ini da dzi i agu sang� i dziwara i nam puafuban wainggan wasi." 16 Da Yosef ini King Farau nanggan munga� ibiani, “Dzi runggang� wasang� u, da bitsinta� Anutu bung� aragi wain wasi da agu Farau da bung� anang u nugum nanuf." 17 Da king ini da Yosef, “Ming�a dzi nanggang� puafuban da dzi tsangan dzi muntida mpui Nail ringan, 18 da dzi tsanga makau dudubadan bini 7 wa�a mpui Nail yaba ba da gada sai mpui ringan. 19 Rai da dzi tip itsanga makau 7 gangkidan muntida urun uta� tipa wa�a mpui. Dzi watsangan makau maran manga bida nigi iming� intap Idzip santan u. 20 Da makau gangkidan muntida urun uta� igi iga makau dudubadan bini 7 wa�a mung� ugu sib. 21 Iga sib da bitsinta� dzi tsanga ibi makau gangkidan igi wawa� bini ibi gada makau bini igi u. Ima�. Rugangki angu ibi miamun ugu. Da dzi marang� ita�. 22 Da dzi tipa ging�an da dzi tsangan dzangkum wain bitsinta� kapa nidzun 7 da iwa� maran bini angu. 23 Raiyi da itip ikap nidzun 7 maisan angu fing�a i ruan. 24 Da dzangkum nidzun fing�a i ruan intap i dzangkum nidzun bini 7 ugu sib. Dzi fis i nanggang� puafuban igi da garam mararuru da garam kupisa nam maradzigin da manga wadziwar i nam puafuban igi wainggan wasi da dzi u. Ima�." 25 Da Yosef ini da King Farau ibiani, “U nanggam puafuban iru� igi wainggan isang� ruan angu. Anutu ini nan wasi da agu mung� i nam arangan nida nangan. 26 Makau dudubadan bini 7 iram i udzuf 7. Da dzangkum nidzun 7 iram i udzuf 7 ibinigi. Nam puafuban i makau 7 da dzangkum nidzun 7 igi iram iyab i nam wain bitsinta� angu. 27 Da makau gangkidan 7 wa�a atsung�a ba igi da dzangkum nidzun 7 gubu� garadan iram iyab i udzuf mangits 7. 28 O king, ibi nan dzi nida sib ugu, Anutu isanting� agu i nam arangan nida nangan. 29 Udzuf 7 da nam gadan bung� anti nasang� intap Idzip santan. 30 Da nigi ntsupan, da gubu� mangits tsira� bung� amunti nasang� udzuf 7. Garam Idzip maran bung� asamu gubu� bini nam gadan ntidan. Da gubu� tsira� nam gadan ma�an bung� awaya intap da garam gar santan. 31 Garam gar santan maran bung� asamu udzuf bini nam gadan ntidan ugu i gubu� fus tsira� nam maring�a sib igi bung� amais nidzun angu. 32 Wain Anutu rima nam puafuban iru�run da agu igi ibi arangan itip nam igi sib i wa�an, da Anutu bung� anang nawa� sung angu. 33 Da aruani da wapiriang� garam mararuru tipa rabuba i nan bini i suda gudzun da mpada tayang� gum santan ming�a Idzip. 34 Da wapiriang� garam fain nasu gudzun i gamp nasang� intap Idzip santan da nabrang nam gadan ntidan igi nasang� 5, da nayu 5 igi gan bits nasang� udzuf 7. 35 Da u runggam wani nifum i ribarangan ufuma nam gadan udan da udzuf 7 igi i ungar ufuma nam gadan gin ming�a gamp gamp santan, da watangin garam singaari i mpada tayang� gin. 36 Da gubu� tsira� muntidan da nam gadan ma�an sang�a udzuf 7 wa�a intap Idzip, da nam gadan garam gudzun ufuman ming�a ungar tsira� igi bung� arim ampan santan sib i anung� mampa i mangits u." 37 King Farau da gan garam gudzunggan iringant i Yosef nanggan santing�an igi da maran yari gin. 38 Ibinigi da Farau igut i gan garam gudzun gan ini bina�, “Agi busauda garam idzuwai igi i busang�a garam ani i nanga gum ani? Ima�. Anutu Marapayaman irut garam ani." 39 Da Farau ini da Yosef ibiani, “Anutu runggan isanting� nam ani santan da agu, ibinigi da garam mangan wayu uwayant da mararuru bini ibi agu u. 40 Dzi tangin agu isu garam gudzun tsira� iming� dzi ungarang�, da dzi ampanggang� santan bung� atang� warang� i agu da naringant i u nanggam. Da dzi king runta� angu da u bung� ampa warang� i dzi." 41 Ibinigi da King Farau ini da Yosef ini bina�, “Yosef, waringantin. Aruani da dzi tangin agu isu gudzun i intap Idzip santan." 42 Da King Farau igru� gan ring gan suda i maran ming�a gin i bangin da yatsuf i Yosef bangi narun. Farau yatsuf ngarukui fa� fa� ngarubini angu iyab da Yosef da isungun tsein gol ifa i wan. 43 King Farau irim karis mangan i Yosef mpada gin yatsung� king da garam singaari imung� i arangan da inu� ini bina�, “Wawa� mana� i sanab da frap anuf! Garam tsira� iba!” I sanab bida nigi da itangin Yosef isu gudzun i intap Idzip santan. 44 Da Farau ini da Yosef ibiani, “Dzi runta� isu King Farau, da bitsinta� garam Idzip mangan wasang� i nanga nam mangan i maranggan furan. Ima�. Nau nan naming� agu gin mung� rai." 45 Da Farau irim bingan Tsafenat Pania da Yosef. Da irim Asenat, Potifera narun finam, da Yosef, isu i fininggan. (Da Potifera igi isu garam anutu wain i anutu umpur iming� gamp On, nida Heliopolis gin.) Da Yosef binganggan imunti isang� intap Idzip santan. 46 Gubu� Yosef uda king Idzip guman da udzufan isang� 30. Yosef itangin king rai da iyung itsuar gamp santan ming�a intap Idzip igi. 47 Da ming�a udzuf bini 7 aru Yosef nidan ugu da nam gadan inti iyus angu. 48 Yosef intsung� nam gadan ntidan ming�a udzuf 7 arigi santan da yufum iming� gamp tsira� santan. Nam gadan gum santan ming�a wafi�a gamp tsira� bitsinta� bitsinta� da yufum iming� gamp igi ruga rugan. 49 Yosef yufum wit nidzun isu marabuntup tsira� bingan iming� gamp tsira� santan, isang� sasanuai ming�a uruts, da arangan anung� isang� i kakara i gudzunggan da fantsupa sib u. Ima�. 50 Yosef fininggan Asenat irim arangan narun rusan marub iru�run raiyi da imus wa�a udzuf mangits tsira�. 51 Yosef ifaring� mama� marub miamun igi binganggan Manase (wainggan ibi ‘maran isamu’), da ini, “I Anutu inang da dzi marang� isamu barabin gang� santan da dzi ramanggang� utupan santan mpada dzi gampang� wain." 52 Da ifaring� narun marub isi� igi binganggan Ifraim (wainggan ibi ‘kapa nidzun’) da ini, “I Anutu inang da dzi kap nidzunggang� bini i mama� narun iru� iming� intap dzi mpada da barabin gin ani." 53 Udzuf 7 nam gadan ntidan ming�a gamp Idzip gubu� gan iba ntsup, 54 da udzuf 7 mangits tsira� iwa� ibi Yosef nidan ugu. Da mangits tsira� iwa� iming� intap fain aga, da bitsinta� ming�a intap Idzip santan da nam gadan ruming�. 55 Gubu� rib Idzip rabuba i nam gadan ntsupan da ifa yai� ruan da King Farau i nam gadan. Da king ini da rib Idzip santan ibiani, “Agam wafan da Yosef da agam wanang nam arangan nidan da agam." 56 Gubu� fus tsira� nam santan maring�a sib isang� intap Idzip igi santan. Da ibinigi da Yosef itus muantsi i ungar ufuma nam gadan gin, da irim wit da garam Idzip da iyu nam ntsuman gin. 57 Da garam intap fain iba Idzip i tsanganda Yosef da uda nam gadan bida nigi, i gubu� tsira� ingaung� intap santan.

‹ Chapter 40 Miamun — All Chapters Chapter 42 ›

Miamun 41

Cite / Share This Page