Miamun 25

1 Abraham itip iyu sagat mangan, binganggan Kitura. 2 Sagat igi irim narun rusan ibiani, Tsimran, Dzoksan, Medan, Midian, Isbak da Sua. 3 Dzoksan isu Siba da Didan ramanggan. Da Didan isu garam Asur da Letus da Leum tafanggan. 4 Da Midian narun rusan marub binganggan ibiani, Efa, Efer, Hanok, Abida da Elda. Utup tuas arigi isu Kitura tafan rusan. 5 Abraham itangin nam santan arangan suda wain gin ugu sib angu da narunggan Isak. 6 Da aru arangan rumpada marataê da ifab nam bunump pas pas angu isangê narun rusan riman da sagat iruê ugu, Hagar da Kitura. Da Abraham itangin ribarangan santan ifa intap mingêa gubuê yaban i mpada guntiê i Isak. 7 Mpruêa Abraham udzufan mpada rutin isangê 175. 8 Arangan inang nam santan maran furan intsup sib da ifufi nidzun angu da imamp da ifa da utupan mampa sib ugu. 9 Da arangan narunggan Isak da Ismail irim arangan i tauf bampun Makpela mingêa uts da gamp Mamri, mingêa Tsohar narunggan Efron, garam Hit, intapan. 10 Abraham runggan irim nam ntsuman i intap arigi da garam Hit. Da arangan narun rusan irim arangan i nigi impruê da fininggan Sara. 11 Gubuê Abraham mampa sib, da Yawe ifinti arangan narunggan Isak. Da Isak impa uts da mpui maran Bir-Lahai-Roi. 12 Abraham narunggan Ismail rima da Hagar, sagat Idzip aru Sara sagat guman ugu, yangin rusan nanggan ani. 13 Ismail narun rusan bingangan atsungêa i ruan ibiani: Nebaiot, Ismail narun marub miamun, da Kedar, Adbil, Mipsam, 14 Misma, Duma, Masa, 15 Hadat, Tema, Dzetur, Nafis da Kedema. 16 Nigi Ismail narun rusan. Garam 12 igi tafan rusan binganggan imunti imingê gamp ruga rugan da intap ribarangan mpada gin. 17 Ismail impa udzufan isangê 137, da arangan imamp da ifa da tafan rusan mampan ugu. 18 Ismail yangin rusan impai imingê intap Hawila ifa isangê gamp Sur, intap Idzip marafain gan gubuê yaban, sanab fada Asiria gin. Da anungê irut rain rusan impa bini u. 19 Nani Abraham narunggan Isak nanggan ragidan ani. 20 Gubuê Isak udzufan sangêa 40 da iyu Rebeka, Betuel narunggan finam da Laban nafunggan, ribarangan garam Aram mpada Mesopotemia ugu. 21 Isak fininggan isu sagat yami, ibinigi da Isak yugin da Yawe i rima arangan fininggan sib. Yawe iringant i arangan nanggan udagin da Rebeka iwangun. 22 Mamaê narun iruê mingêa Rebeka wangun igi yis ruan imingê rinan wangun wasaê. Ibinigi da arangan ifan da Yawe i nan udagin da ini binaê, “Wain idzuwai da nam bida ani iwaê da dzi?" 23 Da Yawe ini da arangan ibiani, “Garam utup iruêrun imingê u wangum. Garam utup iruêrun u nida riman igi bungê antap ruan namunti ruga rugan. Da utup mangan bungê asu riniurun da nayab ragun i mangan. Da mamaê narun waêa miamun bungê asu mamaê waêa bampan garam guman." 24 Iwaê arangan gubuê gan rima narun da irim narun bampungê. 25 Mamaê miamun waêan igi rinin isu biê funub da rinifufun iyus, da ribigi inuê arangan binganggan Isau. 26 Da rainggan waêa atsungêa arangan da bangin ruturiê i faga mutun. Ibinigi da ribigi inuê arangan binganggan Yakop (wainggan ‘gifa faga mutun’ ). Isak udzufan isangê 60 da gubuê aru Rebeka rima mamaê bampungê iruê igi. 27 Mamaê narun iruê igi ibasu garam sib da Isau isu garam mararuru da bangi-tatiê i yunga wap da waêan da apu. Da Yakop arangan garam mpada ntras angu, da arangan inang da impa gamp angu. 28 Isak maran yari nidzun angu i Isau, wain ibiani, arangan nugun itsiaê i gada apu Isau yunga gin. Da Rebeka ibinigi maran yari nidzun i Yakop. 29 Gubuê mangan da Yakop itip mpuaê i upis nidzun, da Isau imingê wap iba da mangits irut arangan nidzun angu, 30 da ini da Yakop, “Mangits yis dzi funub angu! Warim nam biê igi fain da dzi nagan!” (I wain igi da ifaringê arangan binganggan Idom, i wainggan ibi ‘biê’.) 31 Da bitsintaê Yakop ini da arangan ibiani, “Hai, da bitsintaê warim mamaê miamun nanggan suda wain gin da dzi raiyi, ida dzi bungê arim mpuaê ani da agu." 32 Da Isau ini, “Oiyo! U tsangan dzi nang i mampan! Da dzi nanggangê miamun dzi suda wain gin igi burima dzi sib bida anungê? Isangê i!" 33 Da Yakop itip ini, “Wataga ruam da wani nan nidzun mungê da dzi i u rima nam mamaê miamun gan suda wain gin da dzi.” Ibinigi da Isau itaga ruan da irim nam mamaê miamun gan ifan da Yakop. 34 Intsup sib da Yakop irab mpuaê upis nidzun da nam gadan arangan tipan da Isau. Da arangan iga nam da inum mpuaê isangê arangan sufan, da yuriê da ifan. Uwayant Isau santingêan igi arangan itsanga nam mamaê miamun gan suda wain gin igi ibi nam utaê angu.