Miamun 18

1 Gubuê mangan da Abraham impa ungaran apu rini gangan muantsi maranggan imingê gai tsiraê tsiraê mingêa Mamri gin da gubuê wasaê da Yawe iwaê da arangan. 2 Abraham iraê i maran da irunt fafun i tsanganda garam iruê da bits bamuntidan. Da gubuê tsanganda ribarangan da arangan iraê i ruan sung angu da irunt ifa rutin da yidzaê fagan da itatapuangê iruê ribarangan maranggan. 3 Da Abraham ini, “O dzi nifutsarifangê! Dzi su u mamaê gumam, da dzi marangê yari iyus i agam bada dzi ungarangê. 4 Wampa asap yaung ani da mpui pas naba da agam wadzuê fagamin. 5 Agam iba dzi maragab ungarangê sib da waga nam isiê pas wasuf i, ida wamus yunga sanabam.” Da rib iruê da bits igi ini binaê, “Isangê. Wanang nabi u nidan." 6 Ibinigi da Abraham yatangê sung angu ifa ungar apu rini gangan da Sara da ini da arangan, “Ariê Sara! Sung angu! Wayu parawaê bini 20 kg ugu da wamuat da watai bret fain." 7 Da arangan irunt ifa makau gan mpada gin da ipiriangê makau narun faê bini mangan da ini da mamaê guman i isa funub da tipa sung angu. 8 Gubuê nam gadan nuêa sib da arangan iyu tsis da makau sisu gurun da makau tipan ugu iba, da irim da garam igi igan, da Abraham impa tayangê ribarangan imingê yaung wasaê igi. 9 Tuasarangan igut i arangan, “U fininggam Sara impa anungê?” Da Abraham ini, “Rumpa ungar wasaê." 10 Da Yawe ini da Abraham, “Waêa gubuê bida aruani da udzuf mangan aga da dzi nida tipa badan da u fininggam Sara bungê apingê narun marub mangan sib.” Sara impa imingê ungar muantsi nifun mingêa garam igi barun da irim ringan i nan igi. 11 Abraham da Sara ifufi sib da Sara gubuê gan rima narun intsup sib. 12 Sara irubungê da ini imingê wangunggan ibiani, “Mai, dzi da gabunggangê ifufi sib, da aga rininggangê iraraiê wa. Da aga bu waêa da nam nugun tsiaêan igi bida anung?" 13 Da Yawe ini da Abraham, “Ibianungê da Sara irubungê da ini, ‘Dzi fufi sib da isangê i dzi rima narungê?’ 14 Nam mangan wabarabin da Dzi, Yawe, i nangan u. Imaê. Da waringantin. Dzi bungê aba da gubuê aru Dzi nidan da agu da aruani da udzuf mangan aga da Sara bungê arim narun marub mangan sib." 15 Da Sara irat da itung i ruan da ini, “Dzi warubungê u.” Da bitsintaê Yawe ini, “Imaê. U rubungê." 16 Da gubuê ribarangan uriêa i fadan da Abraham iyu ifan i tanginda i sanab, da ifa munti da itsangan Sodom iruê. 17 Mingêan nigi da Yawe ini i unggan ini binaê, “Dzi nani sisingê i nam Dzi nida nangan ani wasi da Abraham, ma? 18 Abraham tafan rusan bungê awaê nasu garam utup tsiraê mangan ruta nampang, da mingêa Abraham da Dzi bungê afinti garam intap wain wain sib angu. 19 I dzi piriangê arangan sib i santingêa Dzi sanabangê da narun rusan da tafan rusan waêa bampan i atsungêa gin da nanga Dzi sanabangê dauman da rururungan angu. Da Dzi bungê anang nam santan dzi ragada arangan gin ugu nasu nidzun." 20 Ida Yawe ini da Abraham ini binaê, “Dzi ringant i nam rangan tsiraê ampi bingan i raruda garam Sodom da Gomora i uwayant maisan ampi bingan mingêa gamp igi. 21 Ibinigi da Dzi bungê aruê da natsangan i maranggangê i nam rangan Dzi ringantagin ani. Da Dzi bungê atsangan da nasruê gin." 22 Da garam iruê igi itangin Abraham rai da iyung ifa i waêa gamp Sodom, da bitsintaê Yawe rurut Abraham imunti. 23 Da Abraham iba su uts da Yawe da igutin ini binaê, “Nan nidzun? U bungê asiat garam rururungan nampruê da garam maisan, ma? 24 Bida anungê i bida garam rururungan 50 mpada wasaê i gamp igi, U bungê asiat garam rururungan 50 igi nampruê da garam maisan rai, ma isangê U gantsida gamp igi i garam rururungan 50? 25 U Garam atsungêa sanampun rururungan angu i raruda garam intap santan. Da anungê isangê u, i U siata garam rururungan mpruêa da garam maisan sangêa ruan angu, yaba i garam nanga asub nanggan. Imaê!" 26 Da Yawe ini Abraham nanggan mungaê ibiani, “Bida Dzi tsanganda garam rururungan 50 mpada gamp Sodom da Dzi bungê agantsi gamp i ribigi binganggan." 27 Da Abraham iraê i nifun da itip ini da Yawe, “O Nifutsarif, wasiat dzi asubangê nida nan babampaf da Agu. Dzi nam utaê santan ibi ngaruntsuaf da pap. 28 Da bitsintaê bida anungê i garam rururungan 50 maêan da 45 angu mpada gamp igi, da U bungê asiat sib angu rai i garam 5 maêan igi?” Da Yawe ini, “Bida Dzi tsanganda garam rururungan 45 mpadan, da Dzi wasangê i siata gamp igi rai u." 29 Abraham itip igut i Yawe ini binaê, “Da bida U tsanganda garam rururungan 40 angu mpadan nigi, da U bungê asiat gamp igi rai, ma?” Da Yawe itip ini, “Bida Dzi tsanganda garam rururungan 40 mpadan, da Dzi wasangê i siata gamp igi rai u." 30 Da Abraham itip ini, “O Nifutsarif, nugum anungê ruaêa i dzi u, dzi ni rungê guta i Agu, bida anungê i garam rururungan 30 angu mpadan, U bungê asiat rai, ma?” Da Yawe ini, “Dzi wasangê i siatan bida garam rururungan 30 angu mpadan." 31 Da Abraham itip ini, “Nifutsarif, wasiat dzi nanggangê ru rima udzungê da Agu gin ani. Bida garam rururungan 20 angu mpadan, da U bungê anang nabianungê gin?” Da Yawe ini, “Dzi wasangê i siatan rai bida Dzi tsanganda garam rururungan 20 angu mpada gamp igi." 32 Da Abraham itip ini, “Nifutsarif, dzi ni gampunda ruangê da Agu da nugum anungê ruaêa i dzi u. Dzi ni tipa nida nan bits angu bida ani, bida U tsanganda garam rururungan 10 angu mpadan, da U bungê anang nabianungê gin?” Da Yawe ini, “Dzi wasangê i siata gamp igi rai bida Dzi tsanganda garam rururungan 10 angu mpadan." 33 Gubuê Yawe ruta Abraham nida nan sib, da itangin arangan rai da ifan. Da Abraham itip iba gan gampan.