Miamun 14

1 Mingêa gubuê arigi da king nampang 4, Amrafel mingêa Sinar, Ariok mingêa Elasar, Kedoraumer mingêa Elam, da Tidal mingêa Goim, yatangê i ruan 2 da impruê ruan ifan i isa nam mpruêan da king gamp isiê isiê 5 bida ani: Bera mingêa Sodom, Birsa mingêa Gomora, Sinab mingêa Adma, Simeber mingêa Tseboim, da king mingêa gamp Bela (gamp Bela igi binganggan mangan Tsoar). 3 I wain ibiani: king gamp isiê isiê 5 igi impa warangê i King Kedoraumer isangê udzuf 12, da bitsintaê bawaêa udzuf 13 da intap ruan sinungê arangan da ifa mpruê ruan imingê Bump Sidim (aru uruts Sur mingêa gin da aruani). 5 Da waêa udzuf 14, King Kedoraumer irut king iruê da bits ugu impruê da gan garaman singaari impruê ruan ifan da yis garam Refa mpada Astirot Karnaim, garam Tsuts mpada Ham da garam Em mpada Bump Kiriataim, 6 da garam Hur mpada mamai Seir, da idaru ribarangan ifan isangê waêa El Paran mingêa uts da nam dadauntan. 7 King Kedoraumer ruta king fain ugu itip yitam i ruan da ifa gamp En Mispat (nida Kades gin) da yis garam mpada intap Amalek sib impruê da garam Amor mpada Hatsatson Tamar. 8 Mingêa gubuê arigi da king mingêa gamp 5 ugu, Sodom, Gomora, Adma, Tseboim da Bela iyu garaman singaari santan impruê ruan ifan da irants ruan imunti mungê i isa nam mingêa Bump Sidim. 9 Ribarangan irut king nampang 4 ugu, Kedoraumer, Tidal, Amrafel, da Ariok, yis ruan. 10 Da mingêa Bump Sidim da ntsuf ampi bingan uda kolta gin imingê gin. Da gubuê ribarangan isa ruan da king Sodom da Gomora irut garaman irunt sinungê nam isan da gan garaman fain iruaê iruê ntsuf da santan irunt sib iyab mamai. 11 Da king 4 igi iyu garam Sodom da Gomora fain impruê da nam bunumpan da nanggan gadan santan da ifan. 12 Da gubuê arigi da Lot impa Sodom da ribarangan iyu arangan impruê da nam bunumpan santan ibinigi. 13 Da Abram impai uts da Mamri gai gan tsiraê tsiraê ugu. Mamri igi garam Amur, Eskol da Anir rainggan. Rib iruê da bits igi yudzu nan mangan impruê da Abram i rima ruan sib. Da garam bits runta sinungê adziang igi ibawaê da Abram, garam Hibru, da ini rutin i king 4 ugu idaru garam Sodom da Gomora rai sib da iyu Lot da ifan. 14 Gubuê Abram uda nan i garam ipiap mpunga Lot da uda fada sib, da inuê gan garaman singaari 318 waêa mingêa arangan garam guman ruta mpadan ugu impruê. Da imungê i ribarangan ifan da idaru garam ipiap ifan isangê waêa gamp Dan. 15 Da idziang arigi, Abram irants gan garaman singaari imunti utup utup da ibrang garam ipiap ruta nam runta fafun da idaru yis ribigi titaê angu ifa isangê waêa Hoba, mingêa dzraê i gamp Damaskus. 16 Abram itip iyu nam bunump garam ipiap udan ugu impruê da rainggan narunggan Lot da gan nam bunumpan impruê da sagat da garam fain itip iba. 17 Gubuê Abram isa King Kedoraumer da king fain ugu da gan garaman singaari sib da tipa badan, da king Sodom iba i tsanganda arangan mingêa Bump Sawe (nida King Intap Bumpan). 18 Mingêan nigi Melkisedek, king Salem, iyu bret da wain gurun iba i tsanganda Abram. Arangan isu Anutu Garam Nampang Wain Wagungê garam pumuêan gan. 19 Melkisedek ifinti Abram da ini ibiani, “Anutu Garam Nampang Wain Wagungê tanginda gunungun da intap nafinti agu. 20 Da agi natsarif Anutu Garam Nampang Wain Wagungê aru rima agu sib i u yaba ragun i garam ipiap.” Da Abram ibrang nam santan uda mingêa nam isan ugu da ifab isangê 10 da irim 10 igi gan bits ifan da Melkisedek. 21 Ntsupa sib da king Sodom ini da Abram ibiani, “Nam santan u udan ugu da nasu u gam, da bitsintaê dzi ampanggangê angu da watangin naba da dzi." 22 Da bitsintaê Abram ini da king Sodom ibiani, “Dzi tsaf ruangê da dzi ni nan nidzun imingê Yawe, Anutu Garam Nampang Wain Wagungê tanginda gunungun da intap maranggan, 23 i dzi wasangê uda u nanggam mangan, bida fufuai udzuda faga gangkang gin ma nam isiê mangan u, imaê. Wain ibiani, u mani u nanga dzi Abram suda garam nam bunump tsiraê i. 24 Dzi wasangê uda nam mangan u, da bitsintaê nam gadan aru dzi garamangê gadan ugu angu, nigi isu dzi gangê. Da wanang da garam rima dzi sib, Anir, Eskol, da Mamri nayu nam bunump igi nasangê ruan."