Carmen de Passione Domini (Latin)
The Latin text of Carmen de Passione Domini. This page has 1 section group and about 517 words. Each row carries its standard reference.
Siste parum insontemque tuo pro crimine passum
Respice me, me conde animo, me pectore serua.
Ille ego qui casus hominum miseratus acerbos,
Huc ueni pacis promissae interpres et ampla
Communis culpae uenia: hic clarissima ab alto
Reddita lux terris, hic alma salutis imago,
Hic tibi sum requies, uia recta, redemptio uera,
Te propter uitamque tuam sum uirginis aluum
Ingressus, sum factus homo atque horrentia passus
Funera, nec requiem terrarum in finibus usquam
Inueni, sed ubique minas et ubique labores.
Horrida prima mihi in terris magalia Iudae
Hospitia in partu sociaeque fuere parenti:
Hic mihi fusa dedit bruta inter inertia primum
In Phariis primos uixi regionibus annos
Herodis regno profugus reliquosque reuersus
Iudaeam, semper ieiunia, semper et ipsam
Pauperiem extremam et rerum inferiora secutus,
Semper agens monitis humana salubribus almae
Ingenia ad studium probitatis, aperta salubri
Plurima doctrinae iniungens miracula. quare
Inuidiae saeuisque odiis et caeca furore
Insonti est poenis letalibus ausa cruentam
In cruce terribili mortem mihi quaerere. quae si
Latius ipse uelim distinguere sique per omnes
Ire iuuet gemitus mecum et sentire dolores,
Collige consilia insidiasue meique nefandum
Sanguinis innocui pretium et simulata clientis.
Verbera praeterea et promptas ad crimina linguas
Fige animo et testes et caeci infanda Pilati
Iudicia ingentemque humeros et fessa prementem -
Terga crucem atque graues horrenda ad funera gressus.
Nunc me, nunc uero desertum extrema secutum
Supplicia et dulci procul a genetrice leuatum-
Vertice ad usque pedes me lustra: en aspice crines
Colla comis spinisque caput crudelibus haustum,
Undique diua pluens uiuum super ora cruorem.
Compressos speculare oculos et luce carentes
45 Afflictasque genas, arentem suspice linguam
Fello uenenatam et pallentes funere uultus.
Cerne manus clauis fixas tractosque lacertos
Atque ingens lateris uulnus, cerne inde fluorem
Flecte genu lignumque crucis uenerabile adora
Flebilis, innocuo terramque cruore madentem
Ore petens humili lacrimis suffunde subortis
Et me nonnumquam deuoto in corde meosque
Fer monitus. sectare meae uestigia uitae
Ipsaque supplicia inspiciens mortemque seueram.
Corporis innumeros memorans animique dolores.
Haec monumenta tibi si quando in mente iuuabit
Voluere, si qua fides animo tibi forte meorum,
Debita si pietas et gratia digna laborum
Surget, erunt uerae stimuli uirtutis eruntque
Hostis in insidias clipei, quibus acer in omni
Tutus eris uictorque feres certamine palmam.
Haec monumenta tuos si labilis orbis amicos
Mundani, efficient ne spe captatus inani
Mobilis occiduis fortunae fidere rebus
Auseris aut uitae sperare fugacibus annis.
Sed te nimirum sic ista caduca uidentem
Saecula et exutum patriae melioris amore
Orbis opes rerumque usus et uota priorum
Moribus extollent sacris uitaeque beatae
Caelesti pactique boni dulcedine pascent,
Purpuream donec post ultima fata relicto
Corpore sublimes animam reuocabit ad auras
Gratia magna dei. tunc omnem exuta laborem,
Angelicos tunc laeta choros aciesque beatas
Sanctorum inspiciens aeternae pacis amoena
Perpetuo felix mecum regnabit in aula.
Source. Latin text from the Corpus Scriptorum Ecclesiasticorum Latinorum (CSEL) collection of the Open Greek and Latin project (digital edition of L. Caeli Firmiani Lactanti Opera omnia edited by Samuel Brandt; Georg Laubmann (Vienna, Austria, Österreichische Akademie der Wissenschaften (ÖAW): 1897) Corpus scriptorum ecclesiasticorum Latinorum 27), encoded in EpiDoc TEI XML. Digitised and corrected by the Open Greek and Latin team (University of Leipzig and partners); the text is taken from the printed edition by OCR with correction, so some errors may remain. SermonIndex has only divided it into short sections for reading; the critical notes, margin notes and apparatus of the printed edition are not shown here but are kept in the XML download.
Licence. Creative Commons Attribution-ShareAlike 4.0 International (CC BY-SA 4.0). You may share and adapt this text if you credit the Open Greek and Latin project and release your version under the same licence.