SALMOS 82

1 Zoa Dios gan zej ndobe benne’ ka’ ẕchi’a ḻáže’gake’ benne’ chie’ ka’. Dios ẕchi’a ḻaže’e benne’ ka’ ẕchi’a ḻáže’gake’ benne’ chie’ ka’. 2 Ẕnna Dios: “¿Wchi’a ḻáže’tezle benne’ chia’ ka’ ḻo da’ bi nak chawe’, na’ gaple ba la’ne benne’ ka’ bebéj yíchjgake’ neda’? 3 Le gakḻen benne’ yache’ ka’, na’ bi’ wzebe ka’. Le yeyón ẕen benne’ gax̱jw ḻaže’ ka’, na’ benne’ ka’ žiážjegekle’. 4 Le gon choch benne’ ka’ žedó ḻáže’gake’, na’ benne’ yache’ ka’. Le yeslá ḻégake’ ḻo na’gak benne’ wen da’ ẕinnj ka’. 5 Bi be nnézlele, na’ bi žejní’ilele, na’ ẕdale ḻo da’ choḻ. Žẕizgak yógo’te da’ zej de yežlyó. 6 Neda’ wnnía’: nakkzle ḻe’e ka dios ka’, na’ nakle yógo’tele ka ẕi’nkze Dios ẕente, 7 san gatle ka žatgak yógo’te benne’ ka’, na’ chejchégwle kan žon nóte’teze benne’ wnná bia’." 8 Wzó ža’, Dios, na’ bchi’a ḻaže’ benne’ yežlyó ka’, dan’ yógo’te yež ka’ yó’ogaken ḻo no’o.