SALMOS 126

1 Kate’ X̱anžo Dios beslé’ žo’o ḻo na’gak benne’ zi’to’ ka’, na’ begoé’e žo’o ḻo yež Sión, gókežo zoažo bichgale. 2 Naž bẕížežo, na’ be ḻawžo X̱anžo Dios. Naž wnnagak benne’ zi’to’ ka’: “Da’ ẕente ben Dios, X̱angak benne’ ka’, chégake’." 3 Da’ likze, ẕenḻe’e nak da’ ben X̱anžo Dios chežo žo’o. Žak chežo yeḻa’ ba nez ẕen. 4 Beslá X̱anžon’ žo’o ḻo na’gak benne’ zi’to’ ka’. Naž bežinžo ḻo yežlyó chežo, kan žežín nis wba’w ḻo yegw biž ka’. 5 Benne’ ka’ ẕbéžegake’ kate’ žázgake’, ḻo yeḻa’ žebele chégake’ yezí’gake’ linne. 6 Bennen’ ẕbeže’ kate’ zeje’ zjeze’ binne cháwe’do’ ka’, ḻo yeḻa’ žebele yežine’ zedjnoé’e linne chien’.