SALMOS 124

1 “Chela’ bi gokḻen X̱anžo Dios žo’o”, žaḻa’ nnagak benne’ Israel ka’ na’a. 2 “Chela’ bi gokḻen X̱anžo Dios žo’o kate’ bdíḻ-ḻengak benne’ ka’ žo’o, 3 na’ bžia yí’gake’ žo’o to chi’ize ḻo yeḻa’ ẕža’a ẕen chégake’, 4 na’ gok chežo ka žak che to benne’ ẕkache’ nisdo’ ḻe’, na’ žoten ḻe’." 5 Chela’ gok ki chežo, na’ la’ betten žo’o. 6 Žaḻa’ ye’žo X̱anžo Dios “žóx̱keno’”, dan’ bi bi’e latje benne’ ka’ wžía yí’gake’ žo’o. 7 Belažo kan želá to byinne ḻo yix̱jw che to benne’ wezén byinne ka’. Beká’a X̱anžon’ yeḻa’ wnná bia’ chegak benne’ ka’, na’ belažo. 8 Nak X̱anžo Dios Bennen’ benkze’ ya’abá, na’ yežlyó. Ḻekze’ žákḻene’ žo’o.