Hechos 27

1 Na ornu mnii too Festo nu zeed yu de̱ Italia nañ tub barc, orzeê bguê dey Baly nu la be deê zir pres yaa tub jef ni de soldad, yu nu la Julio. Yu zeê riib ic yu tub nac soldad nu bloo la dey De Soldad ni Augusto. 2 Orzeê gu̱ê de̱ nañ tub barc ni tub mbecy gyedz Adramitio. Barc zeê bi zu lily ñii par nu ruuñ chañ par de gyedz ni Asia nu yuê ruê nisyudoo. Orzeê bruu barc zeê. Orzeê za̱ de̱. Aristarco, tub mbecy Tesalónica, tub gyedz nu ri lo yu ni Macedonia, yu zeê za nuy de̱. 3 Orzeê na tuubaê dzi bri̱ de̱ Sidón. Julio dzi nap bicy nuy Baly. Bzaan yu nu cha güiiy de amig niy, nunu bzaañ yu nu cuic de amig niy dela coz nu cyiiñ niy. 4 Orzeê bru̱u̱ de̱ Sidón za̱. Bzeeñ de̱ Chipre, tub nac yu nu ri lo nisyudoo, par yaa reg na, gun tonaê la druu bi par zeê nu za de̱. 5 Orzeê bded de̱ lo nisyudoo ruê yu ni Cilicia nu Panfilia. Orzeê bri̱ de̱ Mira, tub gyedz nu ri lo de yu ni Licia. 6 Orzeê lugaar zeê jef ni soldad zeê byap yu tub barc ni de mbecy gyedz Alejandría. Barc zeê chañ par Italia. Orzeê bguêy de̱ nañ barc zeê. 7 Orzeê guly za̱ de̱ nañ la be dzi. Orzeê dzi gyee bri̱ de̱ lo nis nu ri gaab ga tub gyedz nu la Gnido, gun gabee rzub bi par zeê nu za̱ de̱. Orzeê bded de̱ tub gyedz nu la Salmón. Gazeê nu bded de̱ cuit Creta, tub nac yu nu ri lo nisyudoo. 8 Bded de̱ gaab ga lo yu zeê, nunu dzi gyee bded de̱. Orzeê bruêña de̱ tub lugaar nu la Buenos Puertos. Zeê gaab ga ri tub gyedz nu la Lasea. 9 Mnit lo zañ dzi. Orzeê byarishdzidz nu cha̱ de̱ nañ barc, gun bi rgaab tiem nu ri gyey. Orzeê Baly byooy rishlo de mbecy. 10 Orzeê nay: âDer mbecy, ya̱ rze̱e̱ nu dzi rishdzidz za̱ den na. Tonaê la coz ily nit lo. Walab barc ziêl, nunu walab yuu ziêl nit loñ, sinu gnit lo gaê mbecy ânay. 11 Tees yu nu riib ic de soldad wansuub gyidag yu ni Baly. Bzuub gyidag zir yu ni yu nu riib ic barc zeê, gal nu ni shuaan ñi. 12 Nunu lugaar zeê nu byeeñ barc zeê walab lugaar nap par tiem nu gri gyey. Ndeê nu sñuu ga ziêl gac dela mbecy rlagy yu ruuy lugaar zeê. Orzeê cha dey ben a wariy tub gyedz ni Creta nu la Fenice. Zeê tub lugaar nu dri barc, nunu druuñ. Nunu ornu rgüiin par zeê nu rza doo, orzeê nis zeê zub roê niñ par yaa been nu par yaa reg na. Orzeê zeê gac cyiiñ de̱ lascyey. 13 Orzeê brugyiê nu yagugy druu bi par yaa reg na ornu rgüiin par zeê nu rza doo. Orzeê de mbecy psaê lagy dey nu gyicy yu gan gal mod nu mnii tooy. Gazeê nu bruu dey lugaar zeê, za dey gaab ga lo de yu ni Creta. 14 Tees ornu sa ziêl bruu dey zeê zay, orzeê brugyiê druu tub bi ily rdugyiñ par lo barc nu yu̱ê de̱ zeê. Bi zeê bloo la dey ñi Bi nu Druu Par Yaa Reg Na Ornu Güiin Par Zeê nu Rza Doo. 15 Bi zeê tonaê la bicy nuñ barc, nunu wangacaê saa dey barc zeê par zeê nu rdugyiñ. Orzeê blaa yaa dey ñi. Orzeê za nu biñ. 16 Orzeê za̱ de̱ cuit tub nac yu miê nu ri lo nisyudoo nu la Cauda. Za̱ de̱ tub lo nis zeê nu beñ ricy bi. Orzeê zeê gyee bzu nap de̱ barc miê nu zaab par ich zeê. 17 Despuees ornu bi pshup de̱ barc miê zeê, orzeê bguê dey ñi nañ barc ily. Gazeê nu ptiish dey duu cacy nañ barc par nu gyafert ñi. Orzeê rdzib dey nu ches ti̱ barc lo tub nac yu uzh nu ri par iiñ nis gaab ga lo yu ni Libia. Gazeê nu pshet te dey negy nu zaab too barc zeê. Orzeê bzaan dey nu za nu biñ. 18 Orzeê tuubaê dzi, como ni ziêl dzi ricy bi, orzeê brugyiê rneê dey de yuu nu yuê nañ barc zeê lo nis. 19 Orzeê dzi chon de coz nu ricy nu barc riiñ mneê dey ñi lo nis laab nu yaay. 20 Zañ dzi wansaca̱ê de̱ doo güidz, nunu niê ziêl wansac de̱ bel baa. Nunu ii zaab druu la bi ily. Orzeê brugyiê nu wagrish lo ga̱ê de̱ nu gruu mbaña̱. 21 Orzeê como dela mbecy bi guzañ dzi wagowaê dey gyit, orzeê Baly wes suy lat dey. Gazeê nu nay rab yu dey: âDer mbecy, nap zir benu nzuub gyidag der ne̱, nunu cueê ndruun lo yu ni Creta, gun orzeê cueê nnit lo de coz sheñ zeê. 22 Tees cueê dzib der, gun wat ni tub la den. Nomaas barc ii nit loñ. 23 Gun che bruu zac tub anc ni Ãgyoozh lo̱, biñ nu nac nu ya̱, nunu biñ nu ya̱ rca̱. 24 Orzeê nay rab yu ya̱: “Cueê dzib ru Baly. Rlagy ñi nu char lo mbecy nu riib ic de nasyoong. Nunu par nu nac ru, wazaan Ãgyoozh nu gat ni tub mbecy nu yuê nur nañ barc ii”, nay. 25 Ndeê nu cueê dzib der, gun ya̱ ricy cupa̱ consuel lo Ãgyoozh nu gyicy mi gal nu mnii anc zeê. 26 Orzeê gyet lag den lo tub nac yu nu ri lo nisyudoo âna Baly. 27 Despuees ornu bzaê trotap dzi nu dzi ricy bi, na or bi rel, bi bri nuñ barc lo tub nisyudoo nu la Nisyudoo Adriatico. Na or guzeel rel mnii too dey nu cyup ridz yagaab dey lo tub nac yu nu ri lo nisyudoo. 28 Gazeê nu pcaa dey tub coz ye lo tub duu cacy. Orzeê mneê dey ñi lo nis. Orzeê gud lagy dey nu yuê tub gal rub tiiñ zu tub metr nu gyi ri nis. Na ornu bzaañ sñuu miiñ, niê ziêl bicy dey. Orzeê gud lagy dey nu yuê gal rub gaay zu cyup metr nu gyi. 29 Na orzeê gudzib dey nis dugyi barc lo de gyitaê nu yuê par iiñ nis zeê. Orzeê mneê dey tap duu cacy nu ca coz ye lo par ich barc, gun orzeê chesab riñ lo nis. Orzeê brish lo dey nu dzach zaê yu. 30 De yu nu rsaa barc bicy pee dey nu ndruu chuy. Orzeê brugyiê rshet lag dey barc miê zeê lo nis. Bicy pee dey nu ñgya nuy tub coz ye nu neêy par lo barc zeê. 31 Orzeê na Baly rab yu yu nu riib ic de soldad, nu deê zir de soldad: âBenu de yu nu rsaa barc re wabez dey nañ barc, orzeê wac ruu mbañ der âna Baly. 32 Orzeê de soldad pshiêñ yu de duu cacy nu nag barc miê zeê. Orzeê bet lag ñi lo nisyudoo. 33 Na ornu gabee cow ruê, orzeê Baly mnishbaay lo dela mbecy nu gow dey ñuu gyit. Gazeê nu nay rab yu dey: âBi bzaê trotap dzi nu yuê der dzi rash ru shcab, nunu wangow der gyit. 34 Ndeê nu ya̱ rnishba̱a̱ lo der nu gow ru ñuu. Gun ndeê coz nu rlagy ñi par nu gagye der. Nunu wat ni tub der, nunu ni tub gyich too der waduneêñ ânay. 35 Ornu blazh mnii Baly de coz zeê, orzeê bduê yaay tub gyishtily. Orzeê briic yu gras ni Ãgyoozh lat dela mbecy zeê. Orzeê blew yu gyishtily zeê. Gazeê nu brugyiê row yu. 36 Orzeê dela mbecy guud baloor ni dey, nunu bdowaê dey ñuu gyit. 37 Yuê cyup gaynal zub chon gal rub gaay zu tub mbecy nu yuê nañ barc zeê. 38 Na ornu bi bdow gyel dey na, orzeê mneê dey de trig lo nisyudoo par nu gyadzach barc zeê. 39 Na ornu bzaê yu, orzeê bzaac dey lo yu par wagyuê lo gaê dey ca lugaar ni yu zeê. Orzeê bzaac dey tub nis nu ri reñ, tees ñgyiid la ruêñ nu nisyudoo. Nunu ruê nis zeê ri tub lacy she. Gazeê nu mnii too dey benu gac cha nu dey barc par zeê nu ri lacy zeê. 40 Gazeê nu pshiêñ dey duu cacy nu nag barc zeê nu coz ye zeê. Orzeê bzeeñ dey ñi lo nis. Nunu pshaagy dey duu cacy nu nag yag nu rlyuu ca na nez nu cha barc. Gazeê nu pshes nañ dey negy nu zaab too barc zeê, gun orzeê bi saañ barc zeê. Na orzeê brugyiê nu rza barc par garee ga zeê nu ri yu zeê. 41 Tees orzeê bdugyiñ zeê nu ri tub nac yu uzh nu ri par iiñ nis. Orzeê wes ti̱ par loñ lat yu uzh zeê. Wangacaê ruuñ. Nunu tonaê la bicy nu nis par ich ñi, gashtal brugyiê rduzug lañ. 42 Orzeê de soldad rlagy dey cut yu de mbecy nu nac pres nis riib dze dey ornu lazh nu cub dey nis nu riy gal lo yu bigy. 43 Tees yu nu riib ic de soldad rlagy yu co mbañ yu Baly. Orzeê wansaan yu nu ni gyicy dey. Sinu bicy yu mandaar lo de mbecy ben ca na dey gac cub yu nis, orzeê yu zeê gyet yu lo nis loga la. Orzeê cub yu nis par nu riy lo yu bigy. 44 Orzeê dela deê zir mbecy za ca dey ich yu. Yuê dey zay lo tub yala. Yuê gaêy zay lo tub laê barc blaê. Ni mod bruu nap de̱. Bri̱ de̱la̱ de̱ lo yu bigy.